EZEKIYEL 42

Hayay mujom ng'avi hay ngi Bumbuvuŋ

1Mbur tuwa a bi ti ya ti wazlaray ngi vra, aru ti ya kini tir vay muŋ naŋ. A ci ti ya ng'ar viŋ vay muŋhoy, mupuɗak puɗak hiri ng'ar li mupula firndiw, yo ng'ar hay misi ti durba hay ngi Bumbulvuŋ tuwa. 2Tir vay muŋ naŋ misi mizlingre ti raˀa na, jek naŋ: metir kukur zlum, sliprik naŋ: metir kukur cuw nga zlum. 3A mbuŋ wazlaray ngi huroˀo ngi metir kuruˀ waɗ a mbuŋ li midirka ngi vra na, li cuhoy ada ar cala ar cala, jirngasl jirngasl makir. 4Jiviɗ ada ɓaˀa a mbuŋ viŋheye, sliprik naŋ ngir kini tivi wazlaray ngi huroˀo: metir zlum, jek naŋ: metir kukur zlum. Miviŋ taŋhaya hiri pula pula kini tir vay muŋ. 5Viŋ vay muŋhoyo taŋ i meciɗekey ar mekelemeye, asi li cuhoy tuwa a zumaka li ngi hay mijirngasl mimakir taŋ na le haɗa fineˀ ngi hay mijirngasl ngi wuzla ati ngi ruwuy wãˀa. 6Viŋ tayna taŋ jom gar, hay jirngasl jirngasl makir, yo ɓamtal taŋhay antakaɓa ɓamtal ngi wazlarayay na ta. Yo ma na, taŋ hurɗuk hurɗuk ar viŋ ngi ruwuyoy ati ngi wuzlahaya, diga naŋ muzlo zle a ruwuyo. 7Mohol vay ngi vra misilaɓɓa tivi viŋhey, kini ngir tivi wazlaray ngi huroˀo, mupuɗak ar viŋheye, jek naŋ: metir kukur cuw nga zlum. 8Asi viŋ ngi wazlaray ngi vra, jek naŋ: metir kukur cuw nga zlum, amma tir vay mupulaˀ hiri ngir tivi viŋ madiɗa na: metir kukur zlum. 9Tisi virzi ngi viŋ tayna vuna ma, tir vay si pas ngi miprike, mizli masoko zle a wazlaray ngi vra na, li ci t'ada. 10Ar sliprik ngi mohol ngi wazlaray, kini tisi pas ngi miprik, puɗak hiri ng'ar li mupula firndiw, yo puɗak hiri ng'ar hay ngi duba hay ngi Bumbulvuŋ na, viŋhey ada, 11jiviɗ ada ɓaˀ a mbuŋ taŋ. Viŋ tayna a bam vu ati viŋhey misi kini tir vay muŋ, jek ati sliprik taŋ i misi purla, yo slra taŋ ati miviŋ taŋhayakanah ma. 12Miviŋ ngi viŋ vay muŋ hanayna taŋ kaɓa ngi misi kini tir vay ruwuy: ar zli virzi ngi jiviɗe, miviŋ ada, puɗak hiri ng'avi mohol ngi tika hiri ngi li mipal na. Mizli a ndiloko ng'ara tir vay si pas ngi mipriki. 13Mbur tuwa a ɓiy na: «Viŋ vay muŋhoy ati viŋ vay ruwuyoy mupuɗak puɗak hiri ng'ar li mupula firndiw na, i viŋ muvuku vu taŋ. Asi masayay masoko nga mbuŋ Bumbulvuŋ, a zumaka gwat ngi zum muvuku vu taŋ wãˀ na, a diga. Gwat muvuku vu taŋ wãˀ, gwat ngi mikuli ti gwat ngi migamay, mikuli vur mungra ati mikuli ngi ɗiya ɓi na, a paka taŋ a diga, asi i li mipal. 14Masayay micam le ng'ar li mipal tuwa na, t'anta bam put kine nga wazlaray ngi vra ta, amma zana taŋhay, taŋ magam taŋ slra na, a paka taŋ a diga, asi zana tayna taŋ pal. A kam zana mekelemey, a bam zuy ng'ar li mihĩˀĩ ngi mizli gar muduba so.»

Miwaka dalam vay ngi vra

15Mbur tuwa a kiɗa mi ngi wa hur hay ngi Bumbulvuŋ, a dirba nah, a bi ti ya ti mizlingre mupuɗak hiri ng'asi pas ngi mipriki, a wa gun gun zlar. 16A wa vay misi kini tisi pas ngi miprike ti ganday ngi wi gwat tuwa na: ganday ɓaˀ ɓaˀ skat skat zlum. 17A wa misi kini tir vay muŋ naŋ ma: ganday ɓaˀ ɓaˀ skat skat zlum. 18A wa misi kini tir vay ruwuyo ti ganday ngi wi gwat tuwa ma: ganday skat skat zlum. 19A kiɗa mi ngi wi naŋ kini tir vay si pas ngi pastaˀa, weˀ weˀ na: ganday ɓaˀ ɓaˀ skat skat zlum. 20A wa mohol mugun hirnga ngi hay ngi Bumbulvuŋ vay mufaɗ taŋ gar. Giluw ngi moholo ti ka ti ka gar na, rak rak: ganday ɓaˀ ɓaˀ skat skat zlum, skat skat zlum. Mohol nah ngi wunka wala ngi li mipal ati li muho gar.

Currently Selected:

EZEKIYEL 42: BEGDC

Highlight

Copy