EZEKIYEL 37

Ezekiyel mupura tesl salawaɗay ti kleŋ

1Gidaŋ ngi Bumbulvuŋ naŋ da angi ya, ˀUf naŋ a zuɓiy fangal, ara kiy ɓaˀ ar sozo. Sozo nah vuna tesl salawaɗ hũyõf. 2A liˀi ti ya ar wala ngi tesleye gun gun zlar. Taŋ hũyõf haɗa ar sozo. I tesl salawaɗ mikpazlaŋ kpazlaŋhay. 3A ɓiy na: «Ka mburu, tesl hanayna a slikiɗam ti siifa gu aruŋ kwa?» I mbiɗaŋ di: «Bumbulvuŋ, Buymisemuŋ, misina i ka!» 4A mbiɗiy di: «Njika mingiɓi ɗu ya maɓa a hirnga tesl hanayna, ɓa taŋ na: Tesl salawaɗ mikpazlaŋ kpazlaŋhay, cinaka mingiɓi ngi Bumbulvuŋ ani. 5Bumbulvuŋ, Buymisemuŋ a ɓukum, kum tesl hanayna na: I wuɗ i pulo musuwun ng'ar kum, ɓa ki ndiram ti siifa. 6I sa juɓukum dimbasl avu kum, i sirtukum useˀ, i sirtukum kuturkuy, i cukum musuwun, ɓa kisa ndiram ti siifa. Dar kisa sinaka muduba, yi Bumbulvuŋ.»

7Akẽh na, yi njika mingiɓi tuwa kaɓa muvulikiy jiviɗ naŋ. Ti ya mira njika aruŋ sina, i cin hurum ngi gwat, i pur gwatay mawusam: Tesley tuwa a cikilam hirnga arleˀe. 8I pura na, dimbasl ara juɓo taŋ, useˀ ara giɗawa, yo kuturkuy ara sirta taŋ, amma musuwun anta ɓula.

9A ɓiy na: «Njika mingiɓi ɗu a hirnga musuwun, ka mburu, njika mingiɓi ɗu, ɓa musuwuno na, Bumbulvuŋ, Buymisemuŋ a ɓuw na: ‹Musuwun, so tisi diˀis wal wal, ci ng'ar dumvu hanayna, ɓa a lumam siifa.» 10I ra njika mingiɓi kaɓa muvulikiy jiviɗ naŋ tuwa, musuwun a ci angi taŋ, joˀ taŋ ti siifa, a slikiɗam dedeŋ. I vurum madiɗa taˀa.

11A ɓiy na: «Ka mburu, tes salawaɗ hanayna i Israyeley. A ɓam na: ‹Tesl ndra i tesl salawaɗ mikpazlaŋ kpazlaŋhay, njaha hiri ndr'anta mata, i zizam le wãˀ.› 12Vurˀe, njika mingiɓi ɗu, ɓa taŋ: Ya Bumbulvuŋ, Buymisemuŋ i ɓi na: I sa wuna mi ngi zivi kumoyo. Kum mizli ɗuwoyo, i sa bo ti kum tir ziviheye, i sa mi ti kum ng'ar hirwuy kum a muŋ. 13Kum mizli ɗuwoy, ti ya misa wuna mi ngi zivi kumoy na le, yo i bo ti kum le tir zivi kumoyo na, kisa sinaka, yi Bumbulvuŋ. 14I sa ˀufo musuwun ɗu a hur kumo, ɓa kisa lumam siifa a muŋ. I sa cufukum ar hirwuy kum a muŋ, dar kisa sinaka muduba, yi Bumbulvuŋ, i ɓa ɓi le na, i ga gwat nah.

I ya Bumbulvuŋ maɓi.»

Bumbulvuŋ masa jumoˀay da mizli naŋhay ɓa a ndiram purla

15Bumbulvuŋ a ɓiy mi naŋ ani: 16«Ka, mburu, zuɓ dum, toho anga ani: ‹Da Zudahay ati dideˀ ngi Israyeley mujom ng'avaŋ.› Yo zuɓ mekelem ma, toho anga: ‹Da Zozef, malla Efrayim waɗ jum ngi Israyeley mujom ng'avaŋ.› 17Zlra mi ngi dumoy vuna arleˀe, ɓa a tiram dum purla, a sa tiram a haŋ ɗike dum purla. 18Mizli ɗikey a sa cufuɗukuw, ɓa ki ɓa taŋ pulaˀavra ngi gwat ka maga nah vuna. 19Dar kisa ɓa taŋ: Ya Bumbulvuŋ, Buymisemuŋ i ɓi na: Dum ngi Zozef misi a haŋ Efrayim ati sukwi Israyel mujom ng'ava na, i sa hila taŋ, i sa zlira taŋ ati dum ngi Zuda. I sa tiri taŋ dum purla, a sa ndiram, taŋ purla a haŋ ɗu. 20Dumoy ka mutoho gwat ar taŋ tuwa na, a sa ndiram a haŋ ɗike, taŋ gar a sa purakaŋ.

21Ɓa taŋ, ya Bumbulvuŋ, Buymisemuŋ i ɓi na: I sa hulukum, kum Israyeleye ti wuzla sukwi, kum miram nga wuzla taŋ na. I sa kuso hirnga kumo tir li gar, i sa ru ti kum nga hirwuy kum a muŋ. 22I sa tiri ti kum sukwi purla asi ruwuy, waɗ a muwã Israyeleye. Buy purla a sa cifi buy kum gar. Kum anta sa ndiram sukwi cuw mata, yo kum anta sa wunkam zumabuy wal wal cuw mata. 23Kuli kumoy ati gi gwat kum mukuyta wãˀ, malla ko slikiɗa ɓi kum na, anta sa ar dili mata. I sa loho kum tir li kum misi ara gar, li kum migam mungra ara. I sa zuɓa dili kumoy avra, joˀ kisa tiram mizli ɗuwoy, yo ya kwana, i sa tiri Buymisemuŋ kum. 24Gawla ɗu Davit a sa zum buy ar kum, mijigin purla vur kum gar. Kisa gaka gwata kaɓa sirik ɗu mawuɗo, kisa jaka ɓimujuwa ɗuwoy a hirnga, yo kisa gam taŋ slra. 25Ki sa cifam angi hirwuy, ya muvula da gawla ɗu Zakop, i hirwuy dideˀ kumoy mucufam zleˀe angaŋ. Kum ati ziri kumoy waɗ dideˀ kumoyo, kisa cifam anga wãˀa. Gawla ɗu Davit a sa ndir i buy kum ngi wãˀa. 26I sa cica ɓi ngi ngiɓiˀay ati kum. A sa tiri i jumoˀay misi hã ngi sete. I sa cufukum ar li kum a muŋ, i sa sukukum. I sa ɗuva hay ɗu a wuzla kum ngi wãˀa. 27Li cifi ɗu a sa ndir a wuzla kum. I sa ndir yi Buymisemuŋ kum, yo kumo, kisa ndiram i mizli ɗuwoy. 28Ti ya misa ɗuva hay ɗu le a wuzla kum ngi wãˀ na, sukwi mekelemey a sa sinaka, yi Bumbulvuŋ mitiri ti Israyeleye pal vur slra ɗu.»

Currently Selected:

EZEKIYEL 37: BEGDC

Highlight

Copy