EZEKIYEL 38

Guco mi da buy Gok

1Bumbulvuŋ a ɓiy mi naŋ ani: 2«Ka mburu, ɗuva hiri kini ng'ar Gok, buy madiɗa ngi mizli Tubal ati Mesekey, angi hirwuy Magok, njika mingiɓi ani vur naŋ. 3Ki sa ɓaŋ, ya Bumbulvuŋ, Buymisemuŋ i ɓi na: Gok, ka buy madiɗa ngi Mesek ati Tubalaya, y'ani i ra lumuw akẽh. 4I sa cuw ɓiri muhurtokko kik a balama, i sa ɗiɗuw gbor gbor, i bi ti ka jom ati soje ɗikeye: Pilisey ati misi pilisey, zana mezlehey ɓaˀ ɓaˀ avu vu waɗ zigiduw ˀurnok ˀurnok haɗa ti mbaray meciɗek ati madiɗahay, taŋ gar taŋ ti maslalam asi haŋ asi haŋ. 5Soje Perse ati Etiyopi waɗ Putoyo, a sa juwam vu ti mbarayay ati jiiku ngi ɓirihey a hirngahaya, a sa bam asi ka. 6Soje ngi ruwuy Gomerey ati ngi ruwuy Bet-Togorma ar kiɗa mi ndok vay muŋ waɗ mizli haɗa a sa ram asi ka. 7Ka juw vu kuy kuy ati zigiduw ka mukuso taŋ avu ka na, masa jigina taŋ i kaha. 8Nga mbuŋ na, i sa puluw jiviɗ ɓa ki zuma hirwuy Israyele. Mizli ngi si ruwuy Israyele, a dirba taŋ munguroko vi haɗa ti gi vurum na, a bam le tisi ruwuy wal wal, taŋ misi zleˀe angi taŋ na, ara kusom hirnga a muwã Israyeley misi i diŋhey zlezle na. Zle ti taŋ muwunkam wunak ati mizli ngir sukwi mekelemeye na, a cufoko le setette. 9Ka ati soje ɗikey waɗ mizli mihaɗa asi ka na, kisa ra zlaka taŋ, kisa ra lumaka taŋ ɓuyoh kaɓa burkataŋ, kisa sirtaka taŋ ngbulum kaɓa gazlavay masirta li.

10Ya Bumbulvuŋ, Buymisemuŋ i ɓi na: Tapasa, kisa wuluk slra ngi gi ngi gihey haɗa a mevel ɗike, joˀ kisa kiluwo slra masukum ti ɓi malambaˀ. 11Ki sa ɓi: I sa kiɗam vu ati mizli ngi ruwuy manja micika vu ar taŋ, mizli muroko zuyzuy, setette na, i sa ra luuma taŋ: taŋ gar i mizli micifa ngir walahay manja moholoy, yo mizlingreheye, i manja miviŋhey, manja magandaŋhay. 12I sa ra tiɓa zlili taŋ muluma ar vurumo, i sa hila gwat taŋhaya, yo diŋ mipahay a muŋ na, i sa ngizla taŋ, i sa ra luuma mizli muboko ti wuzla sukwi majiginaka ginew taŋhay ati zlili taŋhay, micifam a wuzla duniya na. 13Mizli Sabahay ati Dedaŋhay waɗ migi terere ngi Tarsisey ati prok naŋhay gar a sa ɓukuw: ‹Ki so ngi hila zlili muluma ar vurum kwa? Ki kuso mizli ɗikeye ɓa ngi hila gwatay kwa? Malla ɓa ngi hila ɓiri bara ati ɓiri tapasl tapasl, ginew ati gwat ngi lum waɗ ngi tiɓi zlili haɗa ar vurum kwa?› 14Vurˀe, ka mburu, njika mingiɓi ɗu, kisa ɓa Goko: Ya Bumbulvuŋ, Buymisemuŋ i ɓi na: Tapas Israyel, mizli ɗuwoy misa cifam le setette na, kisa si na takwa? 15Ka ati mizli haɗa asi ka, kisa soko ti ruwuy vay muŋ wãˀ. Ki sa gam zigiduw haɗa, vurum madiɗa taˀa, gar kumo gilaˀ gilaˀ pilisey. 16Ki sa ra luuma Israyel, mizli ɗuwoyo, hã hirwuyo sirit wãˀ kaɓa gazlavay masirta li. Hana a sa gi sey hin naŋ mindila le. Ka Gok, ti ya misa biga ya mipal na le a mihiri mizli tisi ka na, i sa puluw jiviɗ ɓa ki ra zuma hirwuy ɗu, ɓa sukwi mekelemey a sinaka, yi Buymisemuŋ gisiŋ.

17Ya Bumbulvuŋ, Buymisemuŋ i ɓuw na: Zlezle zleˀe, ya miga ɓa gawla ɗu mijiviɗ Israyeley a ɓam na vur ka. Ti hin tayna, a njikaka mingiɓi ɗu le, a gam di le vi mbeˀ mbeˀe. I sa pula jiviɗe da ka masa ra luuma taŋ. 18Tapas hin ka Gok masa ndil angi hirwuy Israyel na, kay Gok, i sa ji mevel haɗa. I ya Bumbuluŋ, Buymisemuŋ maɓi. 19Vur himaˀ ɗu mufõh fõk, yo mevel vik vik ka vu na, hadam: ti hin nah na, hirwuy a sa jijik ngbir ngbir a Israyele. 20Kilifey, ɗiyuwoy, gwat misãmi ngi ɓuhoy, gwatay maram ti kwacay waɗ mizli titrahay gar asi ruwuyo, a sa jijikam ngbar ngbar a mbuŋ ɗu. Muwãhay a sa cifam virzi, mandazlay muwãhay a sa luwuslam, yo moholoy gar a sa mbizlam. 21I sa gi vurum ti ka a muwã ɗuwoyo Gok. Soje ɗikey a sa kiɗam vu vagay vagay ar wala taŋ.

I ya Bumbulvuŋ, Buymisemuŋ maɓi.

22I sa guw kiita ti slino jiji mozorbono ati kiɗ vagay vagay. I sa go vuŋ, a zuɓ mekepel, a sa gi ti yam waɗ i sa po vu waɗ baruudu ar ka ati soje ɗikeye waɗ ar mizli mihaɗa masa ram asi kahaya. 23I sa biga, yi madiɗa, ya pal, yo i sa biga vu ɗu a mihiri sukwi haɗi. Dar a sa sinaka, yi Bumbulvuŋ.»

Currently Selected:

EZEKIYEL 38: BEGDC

Highlight

Copy