EZEKIYEL 39

Guco mi da buy Gok ava ma

1«Ka mburu, njika mingiɓi ani vur Gok, kisa ɓi: Ya Bumbulvuŋ, Buymisemuŋ i ɓaŋ na: Ka Gok, buy madiɗa ngi mizli Mesek ati Tubalaya, y'ani i ra lumuw akẽh. 2I sa ɗuɗuw, i ru ti ka, i sa bo tika tir vay muŋ wãˀ, i sa ru ti ka nga zla kiɗa vu ati muwã Israyeley. 3I sa kiɗuw ɓa lek ɗik a diɗ tisi haŋ gula ɗike, yo ɓa luvut ɗikey a ndilam tisi haŋ hazumo. 4Ka ati soje ɗikey waɗ mizli misi asi kahay gar na, kisa ndilam a muwã Israyeley. I sa vuluw da muluhoy a zumukuw, da ɗiyuwoy gar waɗ da gwat misãmi ngi ɓuhoy. 5Ki sa diɗ ɓaˀ a ɓuh, asi yi ɓa le. I ya Bumbulvuŋ, Buymisemuŋ maɓi. 6I sa wura Magok ati mizli micifa ngir maturahay muroko setette na, dar mizli a sa sinaka, yi Bumbulvuŋ. 7I sa biga slimiɗ ɗu mipal na a wuzla Israyel, mizli ɗuwoyo, yo y'anta sa pula jiviɗ ɓa a hiryakiy slimiɗ ɗu mipal na mata. Dar sukwi ngi mizli a sa sinaka, yi Bumbulvuŋ mipal a Israyele. 8Ani gwat nah ara ndilawa, a ndilo le vuna si, i hin ya miɓa ɓi naŋ na. I ya Bumbulvuŋ, Buymisemuŋ maɓi. 9Akẽh na, mizli ngir walahay Israyele a sa bam, a sa ɗiyam vu ti gwat ngi vurum ngi mesene taŋhay mupulaka taŋ hũyõf na, hã a gam di vi tarnaˀa: i mbaray meciɗek ati madiɗahay, lek ati luvutoy, ziwit ngi ɓirihey ati ziwit ngi dumoy, 10Tˀanta sa giram vu nga juwo dum a ɓuh malla ko nga nguma widisey a ɓuh mata, asi a sa ɗiyaka vu ti gwat ngi vurum tayna vuna si. A sa vaka gwat ngi mizli mivaka taŋ gwatay zleˀe na ya, yo a sa hilaka gwat ngi mizli mihilaka taŋ gwatay zleˀe na ya. I ya Bumbulvuŋ Buymisemuŋ maɓi.

11Angi hin nah na, i sa ɗuva zivi ngi Gok asi ruwuy Israyele, i sozo ngi mizli macohom ng'asi pas ngi miprik ngi mubuliy mumuca. Sozo nah vuna ada tika jiviɗ ngi mizli macohomo. Gok ati mizli naŋhay zigiduw taˀ na, a sa dikaka taŋ a diga. Joˀ a sa zilaka sozo nah vuna: ‹Sozo ngi mizli ngi Gokoy zigiduw taˀa›. 12Sey Israyeley a gam kiya tarnaˀ ar li dik taŋ, ɓa dili ngi si ruwuy a zuɓ avra. 13Masa dikaka taŋ na, i mizli ngi si ruwuy gar, tapas masa vulikiy dudok na, taŋ a sa jijaham asi ɓi nah. I ya Bumbulvuŋ, Buymisemuŋ maɓi. 14Angi kiɗa mi ngi kiya mitarnaˀ naŋ na, ada sa pam mizli hĩˀĩ sek ndrehhe ngi bula hirwuyo, a sa dikaka vagay ngi mizli mindiram manja dikay na, jom ati jini ngi mizli muzuɓa mulakay na, ɓa dili ngi si ruwuy a zuɓ avra. 15Mubula lihey tuwa, taŋ masa bulaka hirwuyo, da taŋ mupuram tesl ngi mbur le na, a sa kusom ɗugur kos kos a ciki tesle ɓa ngi biga, ɓa mili vigiɗey a dikaka taŋ angi Sozo ngi mizli ngi Gokoy zigiduw taˀ tuwa. 16Walahay ada, a sa zilaka Hamona, a mbiɗeˀvra: Zigiduw. Taŋ masa bam ti dili ngi si ruwuy avra na, kahana so.»

17Ka mburu, cin, ya Bumbulvuŋ Buymisemuŋ i ɓi na: «Ɓa ɗiyuwoy ati gwat maslikiɗam ti zlara gar, waɗ gwat misãmi ngi ɓuhoyo na: Soko, cikiloko tir lihey gar, kusom ɓa ki zumam gwat ngi mikuli ya masa gukum di, mikuli madiɗa a muwã Israyel. Ki sa zumam useˀe, kisa sam pumbusu. 18Ki sa zumam useˀ ngi bugawlahay, yo kisa sam pumbus ngi buy ngi si ruwuyoy. I sli di i ˀay ngi zlengerekey, ziri tumuŋhoy, bazuwayay, gusoŋhoy. Taŋ gar i gwat misãmi muzlumbra ngi Basaŋhay. 19Ki sa sluɓam mungulo hã ki mbam pecek, kisam pumbuso hã a wukum: hana i mikuli, ya mugukum di. 20Ar muguzlum ɗu, kisa mbam ndus ndus ti useˀ ngi pilisey ati ngi gwat misãmi ngi ɓuvoy, ti ngi bugawla ngi vurumoy waɗ ti ngi migi vurumoy gar. I ya Bumbulvuŋ Buymisemuŋ maɓi.

21I sa ga ɓa sukwi gar a vulikiy dudoko. Sukwi ngi mizli gar na, a sa puraka kiita ya masa ga taŋ di ati ya masa ja haŋ avu taŋ na. 22Akẽh na, zle tapasa ati nga mbuŋ gar na, Israyeley a sa sinaka, yi Bumbulvuŋ Buymisemuŋ taŋ.»

Jumo hirnga ngi mingiɓi ngi Ezekiyel

23Buymisemuŋ a ɓi na: «Sukwi ngi mizli a sa sinaka, Israyeley mijaka taŋ nga hirwuy mulak na, asi mungra taŋ, asi taŋ micifam teŋteŋ avu ya ta. Vurˀe, yi ɗum ɗum avu taŋ, waɗ i vula taŋ taˀ a haŋ mizli mazliram ti taŋ ta, a kiɗaka taŋ gar ti maslalam. 24Yi gi ti taŋ weˀe avu ci taŋ ar dili ati slikiɗa ɓi taŋ na. Ya muɗum ɗum avu taŋ na vurˀe. 25Amma ya Bumbulvuŋ Buymisemuŋ i ɓi na: Gwat masa gi avu mizli ngi Zakopoy na, i sa mbiɗa, i sa pura ircece da Israyeleye, yo slimiɗ ɗu mipal na, i sa wuɗ suloŋ suloŋ. 26Pi mesem taŋ ati cifi taŋ teŋteŋ ta avu ya, ti taŋ micifam setette asi ruwuy taŋ, ko mbur miga taŋ zluwun anta na, a sa puykoko hirnga naŋ. 27Ya masa bo ti taŋ ti wuzla mizli mekelemey na, yi sa kuso taŋ kileŋ avu hirwuy ngi mesene taŋhaya. Ya mipal na, i sa biga da sukwi ngi mizli mihaɗa tisi taŋ. 28Dar a sa sinaka, yi Bumbulvuŋ Buymisemuŋ taŋ. Asi a dirba ya mija taŋ nga wuzla sukwi mekelemey ruwuy mulak na, y'anta sa pula taŋ a diga mata, amma yi sa kuso hirnga taŋ ng'asi ruwuy nga taŋ. 29Y'anta sa ɗum avu taŋ mata, asi mike na, i pa ˀUf ɗu le ar Israyeleye. I ya Bumbulvuŋ Buymisemuŋ maɓi.»

Currently Selected:

EZEKIYEL 39: BEGDC

Highlight

Copy