EZEKIYEL 36

Israyeley a sa tiɓaka hirwuy taŋ da taŋ a muŋ

1«Ka mburu, cin, njika mingiɓi ɗu ani ar muwã Israyeley, kisa ɓa taŋ na: Muwã Israyeley, cinaka mingiɓi ngi Bumbulvuŋ ani. 2Bumbulvuŋ, Buymisemuŋ a ɓi na: Mesene kum a ɓi vur kumo na: ‹Yawwa! Muwã Israyel misi zlezle ngi set hanayna, a tiram ngi ndrahay le so!› 3Yawwa, njika ɓi ɗu, kisa ɓi: Ya Bumbulvuŋ, Buymisemuŋ i ɓi na: Naŋ kanah, a zumaka hirwuy kumo le ti ka ti ka, a gam suloŋ le ti kum, ki cam le asi haŋ ngi sukwi mekelemey gar. A zukum le, yo a singiram le ar kum a wuzla mizli gar. 4Vurˀe, kum muwã Israyeley, cinaka mingiɓi ngi Bumbulvuŋ, Buymisemuŋ: Ya Bumbulvuŋ, Buymisemuŋ i ra ɓi ɓi da muwãhay, li miɗingir ɗingirey, zlazlaray, sozohoy, diŋ mikirɗak kirɗakay, walahay mupulahay le mbak, sukwi mekelemey mugun hirnga taŋ mihilaka gwat ngir taŋhaya le, yo a singiram le ar taŋ. 5Ya Bumbulvuŋ, Buymisemuŋ i ɓi na: Hadam, ya maɓi ti mevel vik vik ka vu ar sukwi mekelemey gar waɗ ar Edom keɗeɗe na, vur a tiɓaka hirwuy ɗu le da taŋ. Asi taŋ mitiɓaka gwat ngir li zum ti ginew ngi si ruwuy ɗu na, a mumulom le haɗa vurˀe, yo taŋ ti hiris hã ar membezleŋ ngi vu taŋ. 6Vurˀe, njika mingiɓi ɗu ar hirwuy Israyele. Muwãhay, li miɗingir ɗingirey, zlazlaray waɗ sozohoyo, ɓa taŋ na: Ya Bumbulvuŋ, Buymisemuŋ i ɓi na: Y'ani! I ra ɓi ti himaˀ, mevel vik vik ka vu, asi sukwi mekelemey mupukum mesem na. 7Vurˀe, Ya Bumbulvuŋ, Buymisemuŋ i ɓi na: Hadam ti haŋ paɗ a muŋ: Sukwi mekelemey mugun hirnga kum vuna a sa pam mesem aya. 8Ti pas nah, ar muwã Israyeleye, widisey a sa ɗuɗoko mihaŋ taŋhay, yo a sa yam da kum Israyel mizli ɗuwoyo, asi kisa ra moko gweˀ ng'ar hirwuy muyukum ara. 9Haˀaw, i ra ru ng'avu kum, i ra mbiɗi hiri ng'avu kum. I sa ga ɓa a huvam asi ruwuy kumo, yo a sa zligam gwat ara. 10Mizli, Israyeley taˀ gar, a jam haɗi asi ruwuy kumo. Walahayay a sa pam, a sa ndiram hayay ar diŋhey a muŋ. 11I sa ga ɓa mizli ati ginewey a jam haɗa. A sa sikam, a sa yam. I sa ga ɓa ki paka li kaɓa misi zleˀe. I sa vulukum zlili kaɓa ar zli virzi naŋ zleˀe. Dar kisa sinaka, yi Bumbulvuŋ. 12I sa ga ɓa Israyel mizli ɗuwoy a laˀam ar ka, joˀ kisa ndir da taŋ. Ki sa ndir ki gwat taŋ, yo k'anta sa pulaŋ ɗoɗok manja zuŋ mata. 13Ya Bumbulvuŋ, Buymisemuŋ i ɓi na: Mizli ar wala kum maɓam: ‹Ki hirwuy mazum mizli, ki pula sukwi ɗike le ɗoɗok manja zuŋ› na, 14yawwa, k'anta sa zum mizli mata, k'anta sa ga ɓa mizli ɗikey a ndilam ar mungra mata. I ya Bumbulvuŋ Buymisemuŋ maɓi. 15Sukwi mekelemey mupukuw mesem na, y'anta sa puluw ɓa ki cine ɓi nah mata, yo y'anta sa puluw ɓa mizli a zukuw mata. K'anta sa ga ɓa mizli ɗikey a ndilam ar mungra mata. I ya Bumbulvuŋ, Buymisemuŋ maɓi.»

Bumbulvuŋ a sa kuso hirnga ngi Israyeleye

16Bumbulvuŋ a ɓiy mi naŋ ani: 17«Ka mburu, cin, Israyeley micifam angi hirwuy taŋ na, a hiryaka le ti gwat ngi gi taŋ ati slra taŋ. Gwat ngi gi ngi Israyeleye naŋ a mbuŋ ɗu kaɓa dili ngi ngwasa. 18Ya muvunaha mevel ɗu ng'ar taŋ na, asi taŋ mikiɗam hirnga asi ruwuyo haɗa, yo asi taŋ mihiryaka hirwuy ti kulihey na. 19I zliɗa hirnga taŋ le mber mber nga wuzla sukwi mekelemey, a waham le purla purla fuk si ruwuy gar. I ga taŋ kiita le weˀe avu gwat ngi gi taŋ ati slra taŋ. 20Mizli ɗuwoy miram a wuzla sukwi mekelemey tuwa na, a hiryaka slimiɗ ɗu mipala le a diga. Asi mike na, mizli a ɓam a diga vur taŋ: ‹I mizli ngi Bumbulvuŋhay ngbaŋ, amma taŋ asi ruwuy nga naŋ ta.› 21Dar ya i ki slimiɗ ar slimiɗ ɗu mipala, asi a wuzla sukwi Israyeley miram le a diga gar na, a hiryaka le. 22Vurˀe, ɓa Israyeleye: Ya Bumbulvuŋ, Buymisemuŋ i ɓi na: Kum Israyeley, ya magi na vur kum ta, amma i gi vur slimiɗ ɗu mipal, kum mihiryaka a wuzla sukwi mekelemey, kum miram a wuzla taŋ na. 23Slimiɗ ɗu madiɗa mipal na, ki hiryaka le a wuzla sukwi mekelemeye. Ti nah gar kwana, yi sa biga taŋ di, yi Buymisemuŋ gisiŋ. I sa biga taŋ di tisi kum. Dar a sa sinaka, yi Bumbulvuŋ. I ya Bumbulvuŋ Buymisemuŋ maɓi.

24Naŋ kine, i sa bo ti kum ti wuzla sukwi ngi si ruwuy kum misi anga gar na, i sa kuso hirnga kumo, dar i sa mi ti kum nga hirwuy kum a muŋ. 25I sa kicukum yam miɗelelle, ɓa kisa ndiram manja dili. Dili kumoy ati ɓi ngi huruk huruk kum a mbuŋ kuli kumoy na, i sa zuɓukum taŋ avra. 26I sa vulukum mevel nawayaŋ, yo i sa cukum ˀUf nawaya a hur kumo. Mevel misi ka ɗugur ngi hur kum na, i sa zuɓa avra, dar i sa vulukum mevel mukuɗ kuɗu. 27I sa ci ˀUf nga ya a hur kumo, i sa ga ɓa ki sipaka jiviɗe kaɓa ɓimujuwa ɗu mawuɗo, yo sirik ɗuwoyo, ɓa ki jaka taŋ a hirnga, ki gam taŋ slra. 28Hirwuy, ya muvula da dideˀ kumoy na, kisa cifam anga. Ki sa ndiram kum i mizli ɗuwoy, ya i sa ndir yi Buymisemuŋ kum. 29I sa luhukum avu gwat ngi dili kumoy na. I sa pula jiviɗ ɓa alkamari a gi, a sa gi haɗi teˀe. Y'anta sa slino may ɓa a gi avu kumo mata. 30I sa ga ɓa widisey a yam haɗa, guva a gi gwat haɗa, ɓa kum anta sa pam mesem ti may a wuzla sukwi mekelemeye mata. 31Sipi jiviɗ malambaˀ kum ati slra kum mezlehey ta zleˀe tuwa gar na, kisa wulkaka taŋ keŋ. Mungra ati gwat malambaˀ mukuyta wãˀ, kum migaka taŋ na, a sa gukum mesem. 32Ya magi gar na vur kum ta, sey ki sinaka sin le, Israyeley, gwat ngi gi kum na, anja ki pam di mesem, a gukum gigisl.

I ya Bumbulvuŋ Buymisemuŋ maɓi.

33Ya Bumbulvuŋ, Buymisemuŋ, i ɓi na: Tapas ya misa zuɓa mungra kumoyo le avra gar na, i sa ga ɓa walahay a pi haɗa, yo a sa ndiram hayay ar diŋhey a muŋ. 34Hirwuy midaŋ daŋ tuwa a sa huvakaŋ, mizli masa cohom gar na, anta sa puraka i wuzlaɓuh mikirɗak kirɗak mata. 35Joˀ mizli vuna a sa ɓam: ‹Hirwuy midaŋ daŋ zleˀe tuwa, a tiri le kaɓa guva a Eden, yo walahayay mitiram diŋhey, daŋ daŋ, muwahahay le tuwa, i mugunohoy le ti mohol, yo mizli a pam le ar taŋ.› 36Dar mizli masa ndiram gun gun hirnga kum na, a sa sinaka, walahay muwaha zleˀe na, mandira hiri naŋ a muŋ i ya Bumbulvuŋ, yo guvahay mikirɗak kirɗak zleˀe na, mahirva hiri ngi gwat a muŋ ar taŋ i ya. Ya Bumbulvuŋ, i ɓi ani, i ga ani.

37Ya Bumbulvuŋ, Buymisemuŋ i ɓi na: gwat ya masa gi ani ma: I sa pula jiviɗe ɓa Israyeley a lumikiy, ɓa i sa jiniˀis asi taŋ. I sa ska taŋ kaɓa ginew taˀ gezleŋ. 38Naŋ kine, walahay a sa nih ti mizli heɓe heɓe kaɓa ginew mitaˀ gezleŋ, rak rak kaɓa ginew ar hay nga ya Bumbulvuŋ, ginew maram taŋ nga Zeruzalem tapas muguzlum. Dar mizli a sa sinaka muduba, yi Bumbulvuŋ.»

Currently Selected:

EZEKIYEL 36: BEGDC

Highlight

Copy