EZEKIYEL 35

Guco mi da Edomoy

1Bumbulvuŋ a ɓiy mi naŋ ani: 2«Ka mburu, ɗuva hiri kini ng'ar muwã Edom, njika ɓi ɗu ani a hirnga mizli ngi digahaya. 3Ki sa ɓa taŋ na, ya Bumbulvuŋ, Buymisemuŋ i ɓi na:

Kum mizli ngi muwã Edomoy, y'ani i ra lumukum akẽh.

I sa biga gidaŋ ɗu ar kum,

i sa tiri ti kum ɓuh midaŋ daŋ.

4Walahay ɗikeye, i sa tiri taŋ diŋhey.

Ka Edom vuna, kisa tiri wuzlaɓuh kirɗak kirɗaka.

Dar kisa sina, yi Bumbulvuŋ.

5Ki gi mesene ti Israyeleye mbak le ta. Ar hin ngi bonoy taŋ, ti di mungra taŋ mindilakaslsla ɓa a gaka taŋ kiita muduba na, ki kiɗa taŋ ti maslalam. 6Vurˀe so na, kaɓa ya misi ti siifa gisiŋ na! I sa kiɗuw vagay, kiɗa hirnga a sa supuw. Ka muwuluk neˀ le ar kiɗa hirnga ta na, vurˀe, kiɗa hirnga a sa supuw.

I ya Bumbulvuŋ, Buymisemuŋ maɓi: 7Hirwuy muwã Edomo, i sa tiri di ɓuh kirɗak kirɗak, daŋ daŋ. Mizli macohom ti raˀa gar na, i sa ngizla taŋ. 8I sa sirta muwãhaya sirit sirit ti vagay ngi mizli naŋhay mikiɗahay. Mizli masa kiɗaka taŋ ti maslalam na, vagay taŋhay a sa ndilam saɓalak nga muwãhay, ar sozohoy waɗ ng'ar zlazlar ɗikeye. 9I sa tiri ti ka wuzlaɓuh mikirɗak kirɗak, hã ngi sete, yo mizli anta sa cifam ar walahay ɗikeye mata. Dar kisa sina, yi Bumbulvuŋ.

10Asi ki ɓi na: ‹Sukwi mucuw ati hirwuy mucuwoy na, a sa ndiram da ka, kisa tiɓa taŋ›, dambalaka ya Bumbulvuŋ, y'ada akẽh vuna. 11Vurˀe so na, kaɓa ya misi ti siifa gisiŋ na! mevel ati suloŋ ɗik, ka migi di mesene avu taŋ na, i sa gi ti ka weˀe ava ya. I sa biga vu ɗu avu taŋ ti jiviɗ ya masa guw kiita na.

I ya Bumbulvuŋ, Buymisemuŋ maɓi. 12Dar kisa sina, yi Bumbulvuŋ. Ka miza muwã Israyeley na, yi cine le gar, ki ɓi: ‹A tiram wuzlaɓuhoy le kirɗak kirɗak! A vulaka ndra taŋ le ngi li zum ngi ginew ndrahay!› 13Ki ɓiy mi mididal hirnga ɗu, ki ɓiy mi ngi huhumo vu. I cine le kuy kuy!

14Ya Bumbulvuŋ, Buymisemuŋ i ɓi na: Da hirwuy gar ara mumul na, i sa tiri ti ka wuzlaɓuh mikirɗak kirɗaka. 15Ti ka mupura hirwuy Israyel ngi mizli ɗuwoy, mitiri diŋ na, ki mumul le vurˀe, na i sa tiri ti ka diŋ kanah ya.

Muwã Edom a sa tiri wuzlaɓuh mikirɗak kirɗak,

hirwuy Edom keɗeɗe.

Dar mizli a sa sinaka, yi Bumbulvuŋ.»

Currently Selected:

EZEKIYEL 35: BEGDC

Highlight

Copy