EZEKIYEL 34

Ɓi a hirnga mizli madiɗa ngi Israyeley

1Bumbulvuŋ a ɓiy mi naŋ ani: 2«Ka mburu, ɓa ɓi ani vur mijigina Israyeley, njika taŋ di. Njika da mijigina Israyeleye, ɓa taŋ na: Ya Bumbulvuŋ, Buymisemuŋ i ɓi na: Bonoy a hirnga mijigina Israyeley, majiginam hirnga taŋ tehhe a muŋ na. Mijigineye, sey a jiginaka tumuŋhoyo takwa? 3Ki sam ɗuwa, ki kam zana mija ti ngwic ngi tumuŋhoy, ki kiɗam ngi gi mikuli i ginew muzlumbrahay ɓula, amma tumuŋhoyo so na, ki jiginaka taŋ ta. 4Ginew muvusohoy na, ki vulaka taŋ gwat ngi zum ɓa a slikiɗam ta, misi jiji, ki vulakaŋ slalak ta, mingila sara le, ki kufakaŋ di ta, maru digi lambaˀa, ki moko di ta, miziza le, ki supoko ta, amma ki waka taŋ ti gidaŋ, ki gaka taŋ moˀore, waɗ ki guzuvuraka taŋ jaka. 5Ginewey mizliɗam hirnga bilyaˀ lambaˀ na, asi mijigin anta. A zliɗam hirnga le, a tiram le i gwat ngi zum ngi gwat misãmi ngi ɓuhoy gar. 6Ginew ɗuwoyo, a ram ti liˀi kiŋkiŋ lambaˀ a muwãhay gar, ar li miɗingir ɗingirey gar. Tumuŋ ɗuwoy a zliɗam hirnga le asi ruwuy gar, ko mbur maki slimiɗ ar taŋ malla maru ti supo taŋ anta. 7Vurˀe, kum mijiginey, cinaka mingiɓi nga ya Bumbulvuŋ. 8Kaɓa ya misi ti siifa gisiŋ na! mijigin misi anta tuwa na, mizli a vaka tumuŋ ɗuwoyo lambaˀ, gwat misãmi ngi ɓuhoy gar a jaka taŋ lambaˀ. Mijigin ɗuwoy anta kam slimiɗ neˀ le ar tumuŋ ɗuwoyo ta, mijigin ɗuwoy a jiginam di i hirnga taŋ tehhe a muŋ, ko t'anta jiginaka tumuŋ ɗuwoyo jigan le ta.

I ya Bumbulvuŋ, Buymisemuŋ maɓi.

9Vurˀe, kum mijiginey, cinaka mingiɓi nga ya Bumbulvuŋ. 10Ya Bumbulvuŋ, Buymisemuŋ i ɓi na: Y'ani i ra luuma mijiginay vuna akẽh. I sa cufuɗa ɓi ngi ginew ɗuwoy avu taŋ. Y'anta sa pula taŋ a jiginikiy tumuŋ ɗuwoyo mata. A sa tiram i mijiginay mata. Tˀanta sa jiginaka hirnga taŋ tehhe a muŋ mata. I sa tuɓo tumuŋ ɗuwoy avu mi taŋ, ɓa t'anta sa humbuɗaka taŋ mata.

11Asi ya Bumbulvuŋ, Buymisemuŋ i ɓi na: Ya vuna ti haŋ ɗu, i sa ki slimiɗ ar ginew ɗuwoyo, ɓa i sa pura taŋ bileŋ bileŋ. 12Ginewey mizliɗam hirnga le, mijigin masupo taŋ na, ya kwana, i sa sipa ɗuwoyo ginew kanah ya. I sa mo taŋ tir li taŋ mizliɗam hirnga ng'ara, ti hin ngi kutup misirta li le timbiɗim malla ti hin ngi vuŋ ti burkataŋ aseˀeŋ. 13I sa bo taŋ ti wuzla mizli, i sa cikilo hirnga taŋ ti ngi hirwuy wal wala, i sa mo taŋ ng'asi ruwuy taŋ. I sa jigina taŋ a muwã Israyeley, a mi zlazlaray waɗ angi li misi mizli ara ara gar. 14I sa jigina taŋ ar li mezleŋ. A sa zumam giziŋ taŋ a muwã ngi li miɗingir ngi si ruwuy Israyeley. A sa musukam vu a diga ar li jigin mezle, yo i sa jigina taŋ a muwã Israyeley, ar li zum mezle ngi ginewey. 15I ya ti haŋ ɗu masa jigina ginew ɗuwoyo, yo i ya ti haŋ ɗu masa ru taŋ ar li musuko vu. I ya Bumbulvuŋ, Buymisemuŋ maɓi. 16I sa ra supo tumuŋ miziza le, maru ti liˀi kiŋkiŋ lamabaˀa, i sa mo di, mingila sara le, i sa mbizaŋ di, misi jiji, i sa vulaŋ gwat ngi zum, ɓa a slikiɗi. Amma ginew muzlumburahay ati migidaŋ gidaŋhaya, i sa ngizla taŋ. Joˀ i sa jigina tumuŋ ɗuwoyo jeŋŋe ti jiviɗ naŋ.»

Buymisemuŋ mukulo widi ngi mizli naŋhay

17«Na kum ginew ɗuwoy vuna kwana, ya Bumbulvuŋ, Buymisemuŋ i ɓi na: I sa sla kiita ar wala kumo, tumuŋ ati tumuŋ, yo ar wala ngi zlengrekey ati bazuwayay. 18Kum mazumam ar li mezle na, a kuɗukum may ta, hã ki kirpaka is ngi giziŋ ngir li zum kum na asi sar ma kwa? Kum masam yam miɗelele na, a kuɗukum may ta, hã ki duɓoko is ngi yama ti sar ma kwa? 19Naŋ kine, sey ginew ɗuwoy a zumaka gwat kum mukurpaka asi sar na, yo a saka yam kum muduɓoko na. 20Vurˀe, ya Bumbulvuŋ, Buymisemuŋ i ɓukum na: Ya ti haŋ ɗu, i sa sla kiita ar wala ngi tumuŋ muzlumbura ati mizaha. 21Ginew muvusohoyo, ki mbizlaka taŋ ti sar waɗ ki dumbuslaka ti didak, yo ki kiɗaka taŋ ti durum tuwa, hã ki zliɗaka hirnga taŋ mber mber. 22I sa kilo widi ngi ginew ɗuwoyo, ɓa anta sa vaka taŋ lambaˀ mata, yo i sa sla kiita ar wala ngi tumuŋ ati tumuŋ. 23I sa ki mijigin purla masa ru taŋ nga zumo: i gawla ɗu Daviti. Naŋ, a sa ru taŋ nga zum, a sa tiri mijigin taŋ. 24Ya Bumbulvuŋ, i sa tiri Buymisemuŋ taŋ, yo gawla ɗu Davite, a sa tiri yarama a wuzla taŋ. Ya Bumbulvuŋ i ɓa le. 25I sa ga ɓa i slamˀay kiri ati ginew ɗuwoyo. I sa ziza gwat misãmi miji vu ngi ɓuhoyo gar tisi ruwuyo. Ginew ɗuwoy a sa cifam setette a wuzlaɓuh mikirɗak kirɗaka, a sa hinam a wuzla dum mingiriɗ. 26I sa ɗuwula taŋ mi, ɓa a cifam asi ruwuy hana waɗ ar li mugun hirnga li miɗingir nga ya na. I sa go vuŋ ar hin naŋ, a sa tiri vuŋ ngi ɗuwula mi. 27Widis ngi ɓuh a sa yi, yo hirwuy a sa gi gwat. Mizli ɗuwoy a sa ndiram setette ar li taŋhaya. Ti ya misa ngila galalaŋ ngi si ˀay taŋ na le avra, yo ya misa laha taŋ le tisi haŋ ngi mizli mitiram taŋ beke na, a sa sinaka, yi Bumbulvuŋ. 28Sukwi ngi mizli anta sa vaka taŋ gwataya mata, gwat misãmi ngi si ruwuyoy anta sa humbuɗaka taŋ mata. A sa ndiram setette, ko mbur masa ga taŋ ngaˀa anta mata. 29I sa vula taŋ guva mazil slimiɗ haɗa, t'anta sa sam bonoy ti may asi ruwuyo mata, yo sukwi ngi mizli anta sa paka taŋ mesem mata. 30Dar taŋ Israyeley a sa sinaka, yi Bumbulvuŋ, Buymisemuŋ taŋ, y'ada ati taŋ, yo taŋ Israyeleye i mizli ɗuwoy. I ya Bumbulvuŋ Buymisemuŋ maɓi.

31Kum mizli titirahay, kum i tumuŋ ɗuwoy mitaˀ gezleŋ, tumuŋ ngir li zum mezle. Ya kwana, yi Buymisemuŋ kum. I ya Bumbulvuŋ Buymisemuŋ maɓi.»

Currently Selected:

EZEKIYEL 34: BEGDC

Highlight

Copy