BI NGI ISRAYELEY 36
36
1Besalel ati Oholiyap waɗ mizli mekelemey misina gwatay na, Bumbulvuŋ a vula taŋ sinmijileŋ ati lesle le ngi gi slraˀahaya, a sa ɗiyaka gwat ngi gi slra ar hay ngi Bumbulvuŋ, kaɓa Bumbulvuŋ mupula jiviɗ naŋ. 2Akẽh na, Moyis a zilo Besalel ati Oholiyap waɗ mizli mekelemey misina gwatay, Bumbulvuŋ muvula taŋ sinmijileŋ haɗi, yo muwuna taŋ ngi gi slra nah na. 3Moyis a vula taŋ gwatay Israyeley mucukuloko taŋ ngi ɗiya hay ngi Bumbulvuŋ tuwa. Vur miprik gar na, mizli ara soko ti gwat ngi vulo ngi mongoy taŋ na si. 4Dar misina gwatay maɗiyam gwatay wal wal tuwa, a cicaka slra, 5a ram, ara ɓaka Moyise na: «Gwat ngi ɗiya gwatay Bumbulvuŋ mucufuɗa na, mizli ara soko di fineˀ gidaŋ.» 6Akẽh na, haŋ haŋ si na, Moyis a ɓi ɓa a tilaka mi da mizli ngir walahay guɗuko gar: «Anja ko zil malla ngwas, a cikilo gwat ngi vul ngi ɗiya hay ngi Bumbulvuŋ mata.» Joˀ mizli a pulaka so ti gwat ngi vulo. 7Asi a soko di le ngi ɗiyi nah muk si, hã is naŋ ara ndir ma.
Ɗiya guɗuk ngi Bumbulvuŋ
8Mizli misina ɗiya gwat gisiŋ gisiŋheye, a ɗiyaka guɗuk ngi Buymisemuŋ: a juɓom gabagahay kuruˀ kifilih arleˀeŋ, gabaga ngi gugumay mislirkeɗ, lahaɗ ti ngwic ngi tumuŋhoy munduva naŋ wit wit, cihhe ati ndezze, waɗ wuya ava, geˀ geˀ ti kerubeŋhey. 9Gabagahaya gar na, kifilih taŋ i misi purla, jek taŋ metir kuruˀ nga mufaɗ kuruˀ nga mufaɗa, sliprik taŋ kwana, metir cuw cuw. 10A juɓom dumbuŋ gabagahay zlum arleˀe kwaɗay, waɗ muzlum mekelemeye, kanah ma. 11Avi mi ngi gabaga ngi dirba wãˀ, a wuzla mujuɓo mikifilih mudumbuŋ na, a tufam lawarje gagaza wit wit avu mi naŋ, waɗ avu mi ngi mudumbuŋ ngi wuzla mikifilih mucuw naŋ na ma. 12A tufam lawarje kukurzlum avu gabaga mikifilih mudumbuŋ, waɗ kukurzlum avu mikifilih mucuw naŋ, lawarjeheye taŋ cir ar cala cir ar cala. 13A ɗiyam gwat ngi kilika zana ti ɓiri tapasl tapasl kukur zlum, ɓa ngi kilika gabagahay mikifilih kifilih cuw tuwa arleˀeŋ, ɓa guɗuk a tiri kiɓiŋ kiɓiŋ arleˀeŋ. 14A dirba nah, a jam godohoy kuruˀ ngaŋ kaˀ, ti ngwic ngi ˀaway, ɓa ngi sirta guɗuk mucuw naŋ na ma. 15Kifilih ngi godo gar i misi purla, jek taŋ metir kuruˀ nga zlum kuruˀ nga zlum, sliprik taŋ metir cuw cuw. 16A juɓom dumbuŋ i godohoy zlum arleˀe kwaɗay, waɗ mimerkeɗ mekelemeye joɓ joɓ arleˀe pala ma. 17Avi mi ngi godo ngi dirba wãˀ, a wuzla mujoɓ joɓ kifilih mudumbuŋ na, a tufam lawarje kukur zlum ava, waɗ kukur zlum avu mi ngi mikifilih numuŋ ma. 18A ɗiyam gwat ngi kilika zanahay, ti ɓiri gaza kukur zlum, a kilikaka gabaga mikifilih kifilih cuw tuwa arleˀeŋ, ɓa guɗuk a tiri kiɓiŋ kiɓiŋ arleˀeŋ. 19Ɓa ngi sirta guɗuk mucuw naŋ na, a wuɗam garak ngi zlengerek, munduva gagaza, waɗ borgo ngi garak ngi kilif madiɗahay sirit a hirnga naŋ ma. 20Akẽh na, a ɗiyam ɓamtal ngi ngalalay, a ng'aka taŋ kaˀ kaˀ ngi jaha guɗuko. 21Ɓamtal gar na, jek naŋ metir zlum, yo ɓiɓir naŋ saŋtimetir kukur tarnaˀ nga zlum, 22sar avu taŋ cuw cuw, gweˀ avu cala avu cala. Ɓamtal ngir guɗuk ngi Buymisemuŋ, taŋ cek kanah so. 23A ɗiyam ɓamtal kukur cuw tir vay ruwuy ngi guɗuko, 24waɗ a ɗiyam li ngi naŋhay kukur mufaɗ ti ɓiri bara, asi virzi ngi ɓamtalay mizli ngir cuw tuwa, ɓamtal gar na, li ngi naŋ cuw, vur sar naŋhay mucuw na ya. 25Tir vay muŋ ngi guɗuko, a ɗiyam ɓamtalay kukur cuwo ma, 26waɗ li ngi naŋhay kukur mufaɗ ti ɓiri bara. Ɓamtal gar na, li ngi naŋ cuw. 27Ng'asi hay ngi guɗuk, tisi pas madiɗ na, a ngam ɓamtalay merkeɗe, 28waɗ ɓamtalay cuw ngi jaha mivay ngisi haya ti ka ti ka. 29Sivirzi taŋ faw, amma hirnga taŋ jom arleˀe avu ɓalaŋ mudumbuŋ. A sa gam cuw taŋ rak rak, i taŋ masa jahaka mivayaya cuw taŋ. 30Ti duba guɗuko, a ɗiyam ɓamtalaya dangafaɗ, waɗ li ngi naŋhay kuruˀ nga merkeɗ ti ɓiri bara, asi virzi ngi ɓamtal gar na, li ngi naŋhaya cuw cuw. 31A dirba nah, a ɗiyam ɓeɓele ngi ngalalay, ɓeɓele zlum ngi cica ɓamtal vay mudumbuŋhoy ngi guɗuko, 32zlum ngi cica ɓamtalay vay numuŋ ma, waɗ zlum ngi cica ɓamtal vay sihay tisi pas ngi pastaˀa. 33Mbal ngi wuzla, a kaka giw a didak ɓamtalay, zle a mivay hã sesẽŋ a mivay mekelem ngi guɗuko. 34Ɓamtalay ati ɓeɓelehey gar, a puyaka taŋ ɓiri tapasl tapasl, waɗ a ɗiyam ɓalaŋ ngi ɓiri tapasl tapasl, ɓa ngi ci ɓeɓelehey anga. 35Misina ɗiya gwatay, a jam zana ngi njir njar ngi tika hiri, ti gugumay mislirkeɗ lahaɗ ti ngwic ngi tumuŋhoy, munduva naŋ wit wit, cihhe, ndezze, waɗ geˀ geˀ wuya ti kerubeŋhey. 36A ciɗam ɓamtal ngi ngalalayay mufaɗ, waɗ kor kor ɓiri tapasl tapasl avu taŋ, a ngam ponti ngi ɓiri tapasl tapasl avu taŋ, ngi njira zana ngi tika hiri tuwa. Li ngi naŋhaya mufaɗ, a paka taŋ ti ɓiri bara. 37Misina dira ˀay ngi zanahay, a tufam zana mekelem ngi njir, a tufaka ti gugumay mislirkeɗ lahaɗ ti ngwic ngi tumuŋhoy munduva naŋ wit wit, cihhe waɗ ndezze. 38Yo ma na, a ɗiyam ɓamtalay zlum ngi njira zana ngi tika hiri, pontihey kaˀ kaˀ avu taŋ, vay muŋ naŋhay waɗ ponti naŋhaya, a puyaka taŋ ɓiri tapasl tapasl, yo li ngi naŋhay muzlum na, a puyaka taŋ ɓiri gaza.
Currently Selected:
BI NGI ISRAYELEY 36: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
