BI NGI ISRAYELEY 37
37
Ɗiya akoti ngi jumoˀay
1A dirba nah, Besalel a ɗiya akoti ngi Buymisemuŋ ti dum ngi ngalalay, jek naŋ metir pal ti saŋtimetir kukur cuw nga zlum, sliprik naŋ, saŋtimetir kukur tarnaˀ nga zlum, yo gil naŋ saŋtimetir kukur tarnaˀ nga zlum. 2Besalel a kuroŋ ɓiri tapasl tapasl pal naŋ, ti huroˀo waɗ ti vra naŋ gar, a kaŋ teŋ ti ɓiri tapasl tapasl a mivay naŋ gun. 3A ɗiyi ɓalaŋhay mufaɗ, a nga taŋ a mivay ngi akoti, cuw ti ka cuw ti ka. 4A ɗiyi ɓeɓele ngi ngalalayay cuw, a kuro taŋ ɓiri tapasl tapasl, 5a ca taŋ ar ɓalaŋhay misi ti ka ti ka avu akoti tuwa, ɓa a zuɓaka ti naŋ. 6Yo a ɗiya mi ngi akoti ti ɓiri tapasl tapasl pal naŋ, jek naŋ metir pal ti saŋtimetir kukur cuw nga zlum, sliprik naŋ saŋtimetir kukur tarnaˀ nga zlum. 7Dar a vuɗ kerubeŋhey cuw ti ɓiri tapasl tapasl, kaˀ kaˀ a mivay ngi mi naŋ ti ka ti ka. 8Kerubeŋhey mucuw na, taŋ surlum jom ati mi naŋ a mivay naŋhaya ti ka ti ka. 9Taŋ hiri pulaˀ ng'ar cala ng'ar cala, hiri tataˀ avu akoti, kirpaslaya nga muŋ nga muŋ, ara jiginaka mi ngi akoti.
Ɗiya tabul ngi pi ɗaf muvula le da Buymisemuŋ
10A dirba nah, Besalel a ɗiyi tabul ti dum ngi ngalalay. Jek naŋ metir pal, sliprik naŋ reta metir, gil naŋ saŋtimetir kukur tarnaˀ nga zlum. 11A sirta sirit ti ɓiri tapasl tapasl pal naŋ, a kaŋ teŋ ti ɓiri tapasl tapasl a mivay naŋ gun. 12Dum misi ɓiɓir naŋ saŋtimetir dangafaɗ, a ka taŋ gilaɗ gilaɗ ar cakay naŋhay mufaɗ taŋ, waɗ teŋ ti ɓiri tapasl tapasl ɓaˀa ava ma. 13A ɗiyi ɓalaŋhay mufaɗ ti ɓiri tapasl tapasl, a nga taŋ a mivay naŋhay mufaɗ taŋ, gweˀ gweˀ avu sar naŋhay mumufaɗ na. 14Ɓalaŋhaya taŋ gweˀ avu dum ngir cakay naŋhay tuwa, ɓa a caka ɓeɓele ngi zuɓ naŋ ar taŋ. 15A ɗiyi ɓeɓele ngi ngalalayay cuw ngi zuɓ naŋ, a kuro taŋ ɓiri tapasl tapasl sirit wãˀ. 16Gazlanga ngir tabuloyo, a ɗiya taŋ ti ɓiri tapasl tapasl pal naŋ: taasa mupuɗaˀ puɗaˀhay, taasa ngi yamay, kopoy waɗ gwat ngi pusla mbaazlahay.
Li ɗuva lampe misi haŋ tarnaˀ ava
17A dirba nah, Besalel a vuɗ li ɗuva lampe ti ɓiri tapasl tapasl pal naŋ: sar naŋ, ganday naŋ, taasa naŋ, li wus naŋ waɗ gwat misi ka mufuyuk naŋ gar na, i muvuɗa simbirlim ar li purla. 18Mihaŋ ava ɓaˀ ɓaˀ merkeɗ, a zlo kasl avu ganday naŋ ngi wuzla tuwa, ɓaˀ ɓaˀ makir ti ka, makir ti ka. 19Angi mihaŋ naŋ ɓaˀ purla gar na, sikiɗ mipitikay pitikay makir, ti li wus naŋhay waɗ gwat naŋhay, misi ka mufuyuku. 20Ar ganday naŋ ngi wuzla, sikiɗ mipitikay pitikay mufaɗa, ti li wus naŋhay ati gwat naŋhay, misi kaɓa mufuyuku. 21Mihaŋ naŋhay mujumom cuw cuw ng'avi ganday ngi wuzla na, asi virzi taŋ, li wus naŋ ada gara ma. 22Li wus naŋhay ati haŋ naŋhay gar na, i muvuɗa ti ɓiri tapasl tapasl pal naŋ, sumburlum arleˀe ati mekelemeye. 23Besalel a vuɗ lampehey tarnaˀ, waɗ gwat ngi slrahay, i macamayay ati gwat ngi tiɓa fucu, cek i muvuɗa taŋ ti ɓiri tapasl tapasl pal naŋ. 24A tikam ngi ɗiya li ɗuva lampe ati gwat ngi slraˀahaya, ɓiri tapasl tapasl pal naŋ kilo kukur makir.
Ɗiya li gi mikuli ti urdi
25A dirba nah, ɓa ngi zluma urdi na, Besalel a ɗiyi li gi mikuli ti dum ngi ngalalay, jek naŋ ati sliprik naŋ i misi purla, saŋtimetir kukur zlum kukur zlum, yo gil naŋ metir pal. Mivay naŋhay mufaɗ taŋ yoŋ yoŋ kaɓa durum, sumburlum jom ati li gi mikuli vuna si. 26A sirta ngbulum wãˀ ti ɓiri tapasl tapasl pal naŋ, hirnga naŋ, mivay naŋhay muyoŋ yoŋ tuwa, waɗ cakay naŋhay mufaɗ taŋ gar, a kaŋ teŋ gunno ti ɓiri tapasl tapasl. 27A ɗiyaŋ ɓalaŋhay cuw ti ɓiri tapasl tapasl, a nga taŋ ti ka ti ka, tisi virzi ngi teŋ naŋ tuwa, ɓa a caka ɓeɓele ngi zuɓ naŋ ar taŋ. 28A ɗiyi ɓeɓele ngi ngalalayay cuw, a kuro taŋ ɓiri tapasl tapasl sirit. 29Midi urdi, a di mal mipal naŋ ngi vula slra, waɗ urdi pal naŋ mazlumaka ar li gi mikuli.
Currently Selected:
BI NGI ISRAYELEY 37: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.