BI NGI ISRAYELEY 35
35
NDIRA HAY NGI BUMBULVUŊ (35—40)
Sabat i hin ngi musuka vu
1Moyis a cikila Israyeleye cek, a ɓa taŋ: «Bumbulvuŋ a ɓa ndra ɓihey ani ɗaˀ ɗaˀ ɓa i gam taŋ slra: 2Angi luuma gar na, kisa gam slra hin merkeɗe, amma hin mitarnaˀ naŋ na, i Sabat, pas musuka vu, hin nah da Bumbulvuŋ. Mbur misa gi slra le tapasa na, a sa kiɗaka vagay. 3Ko da kum angi hirwuy wanaka gar na, anja ko vu tekeɗe kwana, ki bulam tapas hin ngi Sabata ta.»
Israyeley musoko ti gwat ngi vul taŋhay vur hay ngi Bumbulvuŋ
4Moyis ara ɓa mingiɓi ngi Bumbulvuŋ tuwa da Israyeleye gar, a ɓa taŋ: Bumbulvuŋ a ɓi ani: 5«Cikilam gwat ngi vul da Bumbulvuŋ, muvul ti mevel purlahay, a sa soko ti sukwi ngi gwatay gar: ɓiri tapasl tapasl, ɓiri bara, ɓiri gaza, 6ngwic ngi tumuŋ, munduva naŋ wit wit, micihhe malla gagaza ndezze, gugumay mislirkeɗ, ngwic ngi ˀaway, 7garak ngi zlengerekey, munduva naŋ gagazahay, garak ngi kilif madiɗahay, dum ngi ngalalay, 8mal ngi lampe, urdi ngi pi ar mal ngi vula slra waɗ urdi ngi zlum ti zlum ar vu, 9ɗugur mupuɗaw kakayak kakayak waɗ ɗugur mekelem mupuɗaw puɗaway, ngi luw avu jampa ngi masay madiɗa, waɗ avu jiiba naŋ ma. 10Yo misina gwat ngisi kumoy gar na, a sa cikilam cek ɓa a ɗiyaka gwat Bumbulvuŋ miɓa na: 11Li mipal ati guɗuk naŋ, godo ngi njir, gwat ngi luwa zana, dum ngi ti ngi, ɓeɓelehey, ɓamtalay waɗ li ngi naŋhay, 12akoti ngi jumoˀay ati ɓeɓele ngi zuɓ naŋ waɗ mi naŋ, zana minjar ngi tika hiri, 13tabul ati ɓeɓele ngi zuɓ naŋ waɗ gwat ngi slra naŋhay gar jom ati ɗaf muvula le da Buymisemuŋ. 14Li ɗuva lampe ati gwat ngi slra naŋhay, lampe ati mal ngi lampe. 15Li gi mikuli ti urdi ati ɓeɓele ngi zuɓ naŋ, mal ngi vula slra, urdi ngi zlum waɗ zana minjar avu miviŋ ngi ci ng'ar guɗuko. 16Li zluma gwat ngi mikulihey ati griyaz naŋ ngi ɓiri gaza, ɓeɓele ngi zuɓ naŋhay waɗ gwat ngi slra naŋhay, kisa ati li ɗuv naŋ, 17zana ngi zlavaɗ waɗ ɓamtalay ati virzi naŋhay, zana minjar a mizlingreŋ ngi ci nga wazlaray, 18dum ngi ɗiya guɗuk, dum ngi zlavaɗ ngi wazlaray waɗ zeweɗ naŋhaya, 19zana ngi gi mezegweley ar hay ngi Bumbulvuŋ, zana muvuku vu taŋ, masay Aroŋ maka ka ati ziri naŋhay ɓa a gam di mikuli.» 20Israyeley gar a waham, a pulaka Moyise. 21Akẽh na, mizli misi mevel mezlehey, mavulam ti gula ti hazumo, a soko ti gwat ngi vul taŋhay da Bumbulvuŋ, ɓa ngi ɗiya guɗuk ngi zlir ti Buymisemuŋ, ngi gi slra naŋhay gar waɗ ngi tufa zana ngi slra a mbuŋ Buymisemuŋ. 22Mizli mizilehey ati ngwas mvul ti gula ti hazumoyo, a soko ti gwat ngi wuya taŋhay ngi ɓiri tapasl tapasl, gwat ngi slilih avu zana, gwat ngi slimiɗey, dangwahay, ɓalaŋhay malla gwat ngi ˀayay, a vulaka taŋ da Bumbulvuŋ ti gi mezegwel ngi vula gwat. 23Mizli misi ada ti ngwic ngi tumuŋhoy, munduva naŋ wit wit, cihhe malla gagaza ndezze, gugumay mislirkeɗ, ngwic ngi ˀaway, garak ngi zlengerekey, munduva gagaza, malla garak ngi kilif madiɗahay na, a soko taŋ. 24Mizli muwam vu ti dala malla ɓiri gaza na, a soko taŋ da Bumbulvuŋ. Mizli misi ada ti dum ngi ngalalay zliv a gi slra na, a soko taŋ. 25Ngwas misina gwatay gar na, a siram gugumay mislirkeɗ, ngwic ngi tumuŋhoy munduva naŋ wit wit, cihhe malla gagaza ndezze, taŋ misiraka taŋ ti haŋ taŋ, dar a soko taŋ. 26Ngwas mekelemey misina gwatay, a siram ngwic ngi ˀaway. 27Madiɗa ngi mizli a soko ti ɗugur mupuɗaw kakayak kakayak waɗ ɗugur mekelem mupuɗaw puɗaway, ngi luw avu jampa waɗ avu jiiba ngi didak masay madiɗa, 28waɗ gwat ngi zĩˀĩhey, ngi pi ar mal ngi lampehey, ar mal ngi vula slra, waɗ ar urdi ngi zlum ti zlum. 29Israyeley gar, ziley ati ngwas muvul ti gula ti hazumoy gar na, a soko ti gwat taŋhaya ngi mongoy taŋ, a vulaka da Bumbulvuŋ, ɓa ngi gi slra Bumbulvuŋ muɗuva da Moyis tuwa.
Besalel ati Oholiyap, mizlaka slra
30Moyis a ɓa Israyeleye na: «Puraka ɗi! Besalel mbur Zuda mangal ngi Uri, dideˀ ngi Huro, Bumbulvuŋ a wunaŋ le. 31A nahaŋ le ti ˀUf naŋ, ɓa a lum sinmijileŋ, lesl, waɗ sin ngi gwat ti jiviɗ naŋ gar. 32Ɗiya ɓi ngi gwat ɗiyeˀ ɗiyeˀ le ngi sa gi na, a si na le, yo slra ngi ɓiri tapasl tapasl, ngi ɓiri bara ati ngi ɓiri gaza na, a si na le maˀ. 33A si na ciɗa ɗugur mupuɗaw puɗuwaya le, ngi slupuˀ avu gwatay, ciɗa dumoy, na zle a ga gwatay a gar gu si. 34Bumbulvuŋ a vulaŋ sin le ngi dubuna gwat da mizli, kaɓa naŋ muvula da Oholiyap mbur Daŋ, mangal ngi Ahisamak na ya. 35Ciɗa ɗugur mupuɗaw puɗaway, ɗiya gwatay, gi wuya dar dar da zanahay ti ngwic ngi tumuŋ munduva naŋ wit wit, cihhe malla ndezze, yo ti gugumay misira mislirkeɗ, ji zana gar, gi gwat magaka ti haŋ, yo ɗiya gwatay gar na, a vula taŋ sin nah le.
Currently Selected:
BI NGI ISRAYELEY 35: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
