BI NGI ISRAYELEY 31

Migi slrahay ar hay ngi Bumbulvuŋ

1Akẽh na, Bumbulvuŋ a ɓa Moyise: 2«Cina ɗi, Besalel mbur Zuda, mangal ngi Uri, dideˀ ngi Huro, i wunaŋ le da ya. 3I nahaŋ le ti ˀUf ɗu, ɓa a tiri misi sinmijileŋ, yo misi lesle. A si na ɗiya gwataya le gar ti jiviɗ naŋ ti jiviɗ naŋ. 4A si na wulka gwat ngi sa gi tumbuŋ le, a si na ɗiya gwat ti ɓiri tapasl tapasl, ti ɓiri bara waɗ ɓiri gaza le. 5A si na ciɗa ɗugur mupuɗaw puɗaway ngi gi wuya da gwataya le, a si na ciɗa dumo le, na zle, a si na gwataya le gar si. 6Ani ma na, Oholiyap mbur Daŋ, mangal ngi Ahisamaka, i vulaŋ di le, ɓa a jumom cuwa, yo ma na, i vula sin le haɗi da misina gwatay mbeˀ mbeˀ, ɓa taŋ jom gar na, a sa kiɗaka mi ngi gwatay ya muvuluw taŋ ngi gi na gar: 7guɗuk ngi zlir ti ya Buymisemuŋ, akoti misi ɗerewol ngi jumoˀay araŋ, mi ngi akoti, gwat misi ar guɗuk gar, 8tabul, li ɗuva lampe misi ti ɓiri tapasl tapasl pal naŋ ati gwat ngi slra naŋhay gar, li gi mikuli ti urdi, 9li gi mikuli vuna jom ati gwat ngi slra naŋhay, kisa ati li ɗuv naŋ, 10zana ngi slrahay, zana ngi gi mezegweley, ɓa masay Aroŋ maka taŋ, zana ziri naŋhay masa kaka taŋ ngi gi mikuli. 11Mal ngi vula slra waɗ urdi ngi zlum ar hay ngi Bumbulvuŋ. Misina gwatay a sa gaka kasl kasl kaɓa ya muɓuw di na.»

Ɗuva hirnga da hin ngi Sabat

12Bumbulvuŋ a ɓa Moyise: 13«Ɓa Israyeleye na: Sey ki ɗuvaka hirnga da hin ngi sabata, asi i gwat masa biga kum jom ati ya ngi caˀa, yo ɓa a sinaka i ya Bumbulvuŋ muwunukum ɓa ki tiram da ya. 14Ɗuvaka hirnga da hin ngi sabata so, anja ki puraka kaɓa i hin ho gar ta. Mbur misa gi di le lambaˀ lambaˀ, yo a gi slra le tapasa na, a sa bam di ti wuzla mizli avra, a kiɗaka vagay. 15Vur luuma gar na, hin ngi gi slra ada merkeɗ, amma hin mitarnaˀ naŋ na, i sabat, pas musuka vu, hin muvula le da ya. Ko wa gar migi slra le tapas sabat na, a sa kiɗaka vagay. 16Dideˀ ngi Israyeley nga mbuŋ nga mbuŋ, sey a sa ɗuvaka hirnga da pas sabata, ɓa a tiri i jumoˀay masa ndir hã ngi set. 17Hin nah na, i gwat masa biga Israyeley mujom ati ya vuna. Naŋ kine, i ga muŋ ati gwat ngi raˀahay gar, yo hirwuy ati gwat ngi raˀahay gar na, angi hin merkeɗe, amma angi hin mitarnaˀ naŋ na, i cica slra ɓa i musuk vu.» 18Akẽh na, Buymisemuŋ mikiɗa mingiɓi naŋ ati Moyis a muwã Sinay muduba na, belelerey mucuw, naŋ mutoho ɓimuɗuvahay ti haŋ naŋ ar taŋ na, a vula taŋ da Moyise.

Currently Selected:

BI NGI ISRAYELEY 31: BEGDC

Highlight

Copy