BI NGI ISRAYELEY 30

Li gi mikuli ti urdi

1Yo kisa ɗiyi li gi mikuli ti dum ngi ngalalay, ɓa ngi zluma urdi. 2Jek naŋ ati sliprik naŋ i misi purla, saŋtimetir kukur zlum, yo gil naŋ metir pal. Mivay naŋhaya yoŋ yoŋ kaɓa durum, sirlim jom ati vu naŋ. 3Ki sa kuroŋ ɓiri tapasl tapasl pal naŋ, vay hirnga naŋ, mivay naŋhay miyoŋ yoŋ tuwa waɗ vay huroˀo gun gar, yo kisakaŋ ɓiri tapasl tapasl gilaɗ gilaɗ a mi naŋ gun. 4Ki sa ɗiyi ɓalaŋhay cuw ti ɓiri tapasl tapasl, kisa nga taŋ ar cakay naŋhaya ti ka ti ka, asi virzi ngi ɓiri tapasl tapasl migilaɗɗa tuwa, ngi sa ci ɓeɓele anga ngi jijir naŋ. 5Ki sa ɗiyi ɓeɓele ngi ngalalayay cuw, ki kuro taŋ ɓiri tapasl tapasl. 6Ki sa ɗuva li gi mikuli misenna tuwa, taˀ a mbuŋ zana minjar matika hiri ngi akoti misi ɗerewol ngi jumoˀay anga a mbuŋ mi ngi akoti ngi jumoˀaya, ar li ndra masa zliram na. 7Ti miprik gar na, Aroŋ muru le nga sumuɗo lampehey misi ar guɗuko na, a zluma urdi ngi vul da ya Buymisemuŋ. 8Yo ti li zuyyo gar, naŋ masa ra bula vu avu lampehey na, a sa zluma ma. I urdi mazlumaka hã ngi set a mbuŋ ɗu. 9Urdi ngi zlum anga, naŋ taˀ ti ɗuf. Ko mikuli mizlam zlam wãˀ, ko gwat ngi migam ngi vul, yo ko pusla mbaazla anta sa gam anga ta ma. 10«Sar pal angi vi gar na, Aroŋ a sa zuɓa hiryi ngi li gi mikuli avra, a sa gica pumbus ngi gwat ngi mikuli da mivay naŋhay muyoŋ yoŋ na, ngi pula mungra ngi mizli. A sa mahiri ngi mikuli nah na vur vi vur vi hã ngi set. Li gi mikuli nah na, a sa ndir da ya Bumbulvuŋ, i li mipal wãˀ.»

Buutu mawurkaka ar hay ngi Bumbulvuŋ

11Bumbulvuŋ a ɓa Moyise ma: 12«Ti ka masa slufa Israyeley na, mbur gar a sa vul gwat da ya Bumbulvuŋ ngi mbiɗa hirnga ngi siifa naŋ, ɓa ko mendere a lumukum ar li slufa vu ta. 13Mbur ngi sluf gar na, a sa vul suloy zlum, i reta ngi buutu mawurkaka ar hay nga ya Buymisemuŋ. Ki sa tiɓaka dala nah ti slimiɗ ɗu. 14Mbur masa slufaka gar, mindila le vi kukur cuw malla a funa le gar na, a wuruk buutu da ya Bumbulvuŋ. 15Mbur misi zlili a vul fineˀ nah ta, na misi murgahay kwana, a wurkam keɗec ta, mbur gar a wuruk suloy zlum da ya Bumbulvuŋ ngi mbiɗa hirnga ngi siifa naŋ. 16Ki sa tiɓa dala ngi mbiɗa hirnga ngi Israyeleye, ki vula ngi gi slra ar guɗuk ngi zlir ati Buymisemuŋ. Israyeley mimbiɗaka hirnga ngi siifa taŋ na, wuluk naŋ a sa so keŋ a hirnga.»

Kisa ngi buna haŋ ati saray

17Bumbulvuŋ a ɓa Moyise ma: 18«Ki sa ɗiyi kisa ngi ɓiri gaza jom ti li ɗuv naŋ, ɓa ngi buna haŋ ati saray, kisa ɗuva taˀ ar wala ngi guɗuk ngi zlir ati Buymisemuŋ ati li gi mikuli waɗ yam cer cer ara. 19Aroŋ ati ziri naŋhay a sa bunam di haŋ ati saray. 20Taŋ masa cam ng'ar guɗuk ngi zlir ti ya Buymisemuŋ malla taŋ masa kiraham ng'ar li gi mikuli, ɓa ngi giy mikuli na, a sa bunam ti yam nah ɗagay. 21Naŋ kine, a sa bunaka haŋ ati saraya vur taŋ mamicam. Hana i ɓimujuwa vur taŋ ati dideˀ taŋhay nga mbuŋ nga mbuŋ.»

Mal ngi vula slra

22Bumbulvuŋ a ɓa Moyise ma: 23«Wi vu ti urdi hirngahay: urdi mikuler mazilaka mir, kilo zlum, sinamom mazĩˀĩ ndum, kilo cuw ti reta, kanel mazĩˀĩ ndum, kilo cuw ti reta, 24waɗ urdi mazilaka kas, kilo zlum, kaɓa mawam gwat wurenna ar hay ngi Buymisemuŋ, waɗ mal ngi tutumbur litir merkeɗ. 25Mbur misina vurɗo urdi, a sa jihiɗa taŋ, ɓa a tiri di mal ngi vula slra, i mal ngi gi mezegwel ngi wini mbur ngi slra. 26Ki sa pa da guɗuk ngi zlir ti ya Buymisemuŋ, da akoti misi ɗerewol ngi jumoˀay anga, 27da tabul ati gwat ngi slra naŋhay, da li ɗuva lampe ati gwat ngi slra naŋhay, da li gi mikuli ti urdi, 28da li gi mikuli ti ginew zlam zlam ati gwat ngi slra naŋhay, da kisa ati li ɗuv naŋ. 29Ki sa vula taŋ ɓa a tiram i gwat muvuku vu taŋ wãˀ, gwat muduk di vu le gar na, a tiri le inga ya Buymisemuŋ. 30Ki sa pa mal nah da Aroŋ ati ziri naŋhay aya. Ki sa tiri taŋ nga yahay ɓa a gikiy mikuli. 31Ki sa ɓa Israyeleye na: hana i mal ngi Buymisemuŋ, ngi wini mbur ngi slra. Angi pas wanaka gar na, sey a sa gam di slra nga ya Buymisemuŋ. 32Mbur masa ga avu vu anta, ko ki lihiɗam mal ɓa a bam vu ati naŋ ta, asi i mal ngi mezegwel, yo anja a ndir avu kum i ngi mezegwel. 33Mbur mijihiɗ urdi misi purla kahana le, yo a puya le da mbur ho gar na, a sa ɓulaka ti wuzla muy naŋhay avra.»

Vurɗo urdi ngi mezegwel

34Bumbulvuŋ a ɓa Moyise ma: «Wi vu ti yam ngi gwat mazãˀãm ndum: Sitorak, onik, waɗ galbanum, wuɗ mukuturɓuy ngi zlum ti zlum pal naŋ, jihiɗa taŋ rak rak ati urdihey tuwa. 35Mbur misina di urdi, a sa jihiɗa taŋ ti mandaŋ, ɓa a tiri leɗeɗe ngi gi mezegwel. 36Cahha, a sa tiri di hapa hapa, kuɗ kuɗ, ɓa a sa gam di slra ar guɗuk ngi zlir ti ya Buymisemuŋ, a mbuŋ akoti nga ya Buymisemuŋ, ar li ya masa wuw haŋ anga. A sa gi avu kum i urdi mipal wãˀ. 37Anta sa jihiɗam urdi mubam vu ati hana, ɓa a gam di slra lambaˀ ta, anja a ndir avu kum i ngi gi slra ɗu tewle. 38Mbur misa jihiɗ urdi mibam vu le ati hana, ɓa a mumul ti zĩˀĩ naŋ mundum na, a sa ɓulaka ti wuzla muy naŋhay avra.»

Currently Selected:

BI NGI ISRAYELEY 30: BEGDC

Highlight

Copy