BI NGI ISRAYELEY 32

ISRAYELEY MINGILAKA ƁI NGI JUMOˀAY TAŊ ATI BUYMISEMUŊ 32—34

Zuŋ sla ngi ɓiri tapasl tapasl

1Israyeley a puraka keɗ keɗ na, Moyis a zum vu le ngi po sar ti muwã, a kusom timbiɗim a ciki Aroŋ, a ɓakaŋ: «Slikiɗi! Ga ndra buymisemuŋ maki ɓaˀ a mbuŋ ndra, asi Moyis mbur mubo ti ndra ti hirwuy Ezipte tuwa, da i mi migi ava ka na, i si na ka ta 2Aroŋ a mbiɗa taŋ di: «Cukoko gwat ngi ɓiri tapasl tapasl ngivi slimiɗ ngi ngwas kumoy, ngi ziri mizile kumoy waɗ ngi ziri mongoso kumoyo, sikiy taŋ.» 3Israyeley gar a cukoko gwat ngi slimiɗ taŋhay ngi ɓiri tapasl tapasla cek, a soko taŋ da Aroŋ. 4Aroŋ tuwa, a tiɓa taŋ, a luwusla taŋ, a zluro ng'ar gwat ngi ndira zuŋ sla, a bo ti zuŋ sla mindira deŋ. Akẽh Israyeley a ɓam so na: «Hana i buymisemuŋ ndra mubo ti ndra ti hirwuy Ezipte tuwa!» 5Aroŋ mupura keɗ keɗ na, a ɗiyi li gi mikuli a mbuŋ zuŋ sla tuwa, dar a til mi, a ɓi na: «Ti prike, i muguzlum ngi hunuma Bumbulvuŋ!» 6Li naŋ muwuno, ceɗ hiri si na, mizli a gam mikuli mizlam zlam wãˀ, waɗ mikuli ngi luuma zuy, mizli a cifam jojoˀ, a zumam gwat, a sam mbaazla, a slikiɗam ɓa a gam dungur. 7Akẽh Bumbulvuŋ a ɓa Moyise na: «Pi sar kutum so, asi mizli ɗikey, ka mubo taŋ ti Ezipte tuwa, a gam mungra madiɗa le. 8A ngizlam le kutum mbak jiviɗ ya mibiga taŋ di na, a luwuslam ɓiri tapasl tapasl, a gam di zuŋ sla, a huruk hurukam a mbuŋ naŋ, a gakaŋ mikuli, a ɓam: Ndra Israyeleye, buymisemuŋ ndra mubo ti ndra ti hirwuy Ezipte n'anihĩ! 9Bumbulvuŋ a ɓaŋ ma: Yi pura mizli hanayna keɗ keɗ na, kay! I sukwi macin mi ta! 10Yo wurenna, puliy i ga gwat ya mawuɗo: mevel a jiy le ar taŋ, i sa ngizla taŋ kuɗup, i sa ɗuv sukwi madiɗa taˀ mabo tivi ka.» 11Amma Moyis a tisla mevel da Bumbulvuŋ Buymisemuŋ naŋ, a ɓaŋ: «Bumbulvuŋ, sukwi ɗik ka mubo di ti hirwuy Ezipte ti gidaŋ ɗik mihaɗi, yo ti hirbazla ɗik migidaŋ na, ki ji mevel ar taŋ vur mike? 12Da ki ga le kahana na, Eziptehey a sa ɓam: Bumbulvuŋ mibi ti Israyeley ti hirwuy ndra na, a bi ti taŋ ngi moˀore, a wuɗ ɓa ara kiɗa taŋ vagay vagay a ruwuy muwãhay, a ngizla taŋ kuɗup wãˀ asi ruwuyo. Buymisemuŋ ɗu, tisla mevele, pula gi malambaˀ da sukwi ɗike. 13Wuluk ar gawla ɗikey Abraham, Izak waɗ Zakop na kwaɗay ayɗi, ki hudum le a mbuŋ taŋ ti slimiɗ ɗik tehhe a muŋ, ki ɓi na: I sa ga ɓa dideˀ kumoy a yam haɗi kaɓa wurzlaŋhay a muŋ. Hirwuy ya miɓa ɗaˀ le, i sa vula taŋ di tuwa, a sa ndir wãˀ da taŋ.» 14Dar Bumbulvuŋ a pula malambaˀ, naŋ mawuɗ a ga da mizli naŋhay zleˀe tuwa. 15Akẽh na, Moyis a po sar baɗ a muwã a muŋ. Naŋ kaw ti belelerey mucuw, Buymisemuŋ mutoho ɓimuɗuva ara nguɗ nguɗ ti ka ti ka tuwa. 16Beleler tayna, i slra ngi Buymisemuŋ, i Buymisemuŋ ti haŋ naŋ mutoho nguɗ nguɗu. 17Ti Zozuwe micina mizli majam salalay na, a ɓa Moyise: «Cina hurum ngi vurum ar walahay guɗuko!» 18Amma Moyis a mbiɗaŋ di: «Aˀa, i salalay asi a lumam bugawla le ta, asi a hĩhĩyam le ta ma. Ya macina na, i ˀay ngi dimis!» 19Ti taŋ mindiloko gweˀ avu walahay guɗuko muduba na, Moyis a pur zuŋ sla waɗ mizli maɓurgam. Mevel a jaŋ haɗi: a zliɗa belelerey mikaw a haŋ naŋ tuwa, a waham meɗ meɗ a sar muwã. 20A zuɓa zuŋ sla taŋ mipaka ti pi ar vu tuwa, a hiziga ng'ar vu, a musukuɗo kuɗ kuɗu, a futo fut fut ar yam, a vula da Israyeley a sakaŋ. 21Dar a ɓa Aroŋ na: «sukwi hana vuna, a guw mi ɓa ki ci ti taŋ ng'ar mungra madiɗa kahana ka?» 22Aroŋ a mbiɗaŋ di: «Ambuh ki ji mevel ta! Ka vuna ti haŋ ɗike, ki si na le, mizli hanayna a wusam vu haɗi ngi gi malambaˀa. 23A ɓikiy na: Ɗiya ndra buymisemuŋ maki ɓaˀ a mbuŋ ndra, asi Moyis mbur mubo ti ndra ti hirwuy Ezipte tuwa, da i mi migi ava ka na, i si na ka ta 24Yi cufuɗa taŋ na: mbur misi ɓiri tapasl tapasl ava i waka? A cukoko taŋ avu slimiɗ taŋhaya, a vulikiy taŋ. Yi luwusla taŋ ar vu, joˀ yi bo ti zuŋ sla misenna.»

Kuti ti bonoy

25Moyis a pura keɗ keɗ na, Aroŋ a pula mizli zlaɗ, a gam ka taŋ mawuɗam, ɓa mesene taŋhay a singiram ar taŋ. 26Akẽh na, Moyis a cici deŋ a mizlingre ngi walahaya, a ɓi: «Mizli mawuɗam Bumbulvuŋ, soko ng'avi ya aka!» Dideˀ ngi Levihey gar a kusoko ng'ava. 27A ɓa taŋ: «Bumbulvuŋ, Buymisemuŋ ngi Israyel a ɓi na: Ko wa gar asi kumo, a zuɓa maslalam naŋ. Bulaka walahaya vur hay vur hay, kiɗaka sukum kumoy, ngama kumoy, midigwi kumoyo.» 28Dideˀ ngi Levihey a cinaka mi da Moyise, hã Israyeley mumicam tapasa, a gam gwat ngi durmuk makir gu. 29Dar Moyis a ɓa Leviheye: «Zle dana, kum i muwunahay le ngi gi slra ngi Bumbulvuŋ, asi ko ki murom ngi kiɗa ziri kumoy malla sukum kumoyo ta. Yo anja Bumbulvuŋ a ɗuwulukum mi pas dana.»

Moyis mutumbulo Buymisemuŋ ɓa a pula mungra ngi Israyeley

30Ngi miprik naŋ na, Moyis a ɓa mizli: «Ki gam mungra madiɗa le, amma wurenna, i wuɗ i jiɗ nga muwã, avu Buymisemuŋ, asinta, i sa lum jiviɗ ɓa a pulukum mungra kumoyo kwani.» 31Moyis a mi ng'avu Bumbulvuŋ, a ɓaŋ: «ˀEy ehe! Mizli, a gam mungra madiɗa le, a ɗiyam zuŋ sla le ti ɓiri tapasl tapasl ar deɗe ngi buymisemuŋ taŋ. 32Amma wurenna, ambuh takwa, pula taŋ mungra taŋhaya! Da kine ta na, slimiɗ ɗu ka mutoho ar ɗerewol ngi siifa na, vuvuyo avra.» 33Bumbulvuŋ a ɓaŋ: «Kanah ta, ya masa vuvuy avra na, sey slimiɗ ngi mizli migam mungra le avu ya. 34Wurenna, aru so, aru ti mizli ng'ar li ya mubuguw di na, i modro ɗik masa ki ɓaˀ a mbuŋ ɗike. Amma tapas ya misa ndil le a wuzla taŋ na, i sa kuta taŋ ti bonoy vur mungra taŋ na.» 35Dar Bumbulvuŋ a kuta Israyeley ti bonoyoyo, asi taŋ mucufuɗaka Aroŋ ɓa a ɗiya taŋ zuŋ sla na.

Currently Selected:

BI NGI ISRAYELEY 32: BEGDC

Highlight

Copy