Amos 7
7
ǂHomn di ais
1 ǃKhūb Elob ge ai-e ge ǁgau te. ǁÎb ge kaise ǂgui ǂhomna ge kuru, ǀasa ǀgâb ra ǁhaitsoatsoa hîa, gao-aob di ǀgân ge ǃgaoǁnâhes khaoǃgâ. 2Tsî ǃhūb di ǁhaon hoanan ge hapu, o ta ge ge mî: “ǃKhū ti Elotse, sa ǁaesa ǀûba re. Mâtin kha ǁîna nî ûiǃkharu ǁkhā? ǁÎn ge a ǂkhari.”
3Ob ge ǃKhūba ǂâibasens âba ge ǀkharaǀkhara tsî “Nē ǃkhais ge ī tide” ti ge mî.
ǀAes di ais
4 ǃKhūb Elob ge nē ai-e ge ǁgau te. ǃKhūb Elob ge ǀaes ǀkha gere ǁkhara ǂgao, ǁîs ge kai ǁgamma ǂnâ kai tsî ǃhanaǃhūba ge khauǃkhū. 5O ta ge tita ge mî: “ǃKhū Elotse, sa ǁaesa ǀûba re. Mâtin kha ǁîna nî ûiǃkharu ǁkhā? ǁÎn ge a ǂkhari.”
6Ob ge ǃKhūba ǂâibasens âba ge ǀkharaǀkhara tsî “Nē ǃkhais tsîn ge ī tide,”
tib ge ǃKhūb Eloba ge mî.
ǀNō-ūtsurib di ais
7ǁÎb ge nēsa ge ǁgau te. ǃKhūb ge ǂgōse a omkhâisa ǂnubiǂgoab tawa ge mâ i, ǀnō-ūtsuriba ǃomǁae ūhâse. 8Tsîb ge ǁîba ge dî te: “Amotse, tare-ets ra mû?”
O ta ge “ǀNō-ūtsurib” ti ge ǃeream.
Ob ge ǃKhūba ge mî: “Tita ge ǀnō-ūtsuriba ti ǁaes Israels ǁaegu nî ǁgui. Tita ge ǁîna ǃaruǀî sâu tide. 9Isaki di ǁguibaǀgapigu ge nî hîkākāhe tsî Israeli di ǃanusib ǃkhaidi ge nî khôaǂkhūhe. Tita ge gôab ǀkha Jerobeammi ommi ǃoagu nî khâimâ.”
Amosi ge Amasiaba ra mâǃoa
10Betels pristeri Amasiab ge Israeli gao-aob Jerobeamma ge haisiba: “Amosi ge Israeli ǃnâ sats ǃoagu ra ǀapeǀhao. ǃHūb ge ǁîb di mîdi xa nî hîkākāhe. 11Nētib ge Amosa ge mî: ‘Jerobeammi ge gôab ǃnâ nî ǁō tsî Israels ge ǁîs di ǃhūba xu ǃkhōsabese nî ǃgû-ūhe.’ ”
12Ob ge Amasiaba Amosi ǃoa ge mî: “Mû-aotse, ǃgû. Judab ǃhūb ǃoa ǃhū, îts ǁnāpa sī sa pere-e ǃoaǂuibasen tsî ǁnāpa sī kēbo. 13Tā ǁkhawa Betels tawa kēbo, ǁîs a gao-aob di ǃanusib ǃkhai tsî gaosib di Tempel xuige.”
14Ob ge Amosa Amasiaba ge ǃeream: “Tita ge kēbo-ao tama tsî ǁkhāti kēbo-aob ôas tsîna hî tama hâ, xawe ta ge a gūǃûi-ao tsî ǀnomahaide ra kōǃgâ. 15Xaweb ge ǃKhūba gūna ǃûisa xu ge ūbē te, tsîb ge ǁîba tita ǃoa ge mî: ‘ǃGû, î ti ǁaes Israelsa sī kēboba.’
16“Nēsi ǁnâi ǃKhūb di mîsa ǁnâu re. Sats ge Israeli ǃoagu ta nî kēbo tsî Isaki ommi ǃoagu ta nî ǃhoasa ra ǂkhā te. 17ǁNā-amagab ge ǃKhūba ra mî: ‘Sa taras ge ǃās ǃnâ nî ǀai-ao kai, sa ôagu tsî sa ôadi tsîn ge gôab ǃnâ nî ǁō. Sa ǃhūb ge ǀnōhe tsî nauna nî ǀgorabahe. Sats ge ǃanuoǃnâ ǃhūb ǃnâ nî ǁō tsî Israels ge ǁîs di ǃhūba xu ǃkhōsis ǃnâ nî ǃgû-ūhe.’ ”
Currently Selected:
Amos 7: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
