Amos 8
8
Haiǂûn hâǃnâ ǀharus di ais
1 ǃKhūb Elob ge nē aisa ge ǁgau te. ǁAn hâ haiǂûn hâǃnâ ǀharusa. 2Tsîb ge ǁîba “Amotse, tare-ets ra mû?” ti ge dî te.
O ta ge “Haiǂûn hâǃnâ ǀharus” ti ge ǃeream.
Ob ge ǃKhūba tita ǃoa ge mî: “ǀAms ge ti ǁaes Israels ǂama go hā. Tita ge ǁîsa ǃaruǀî ǃkharuǀkhā tide. 3ǁNātsē di ge gao-ommi di ǁnaetsanade āb ǃnâ nî ǀkharaǀkharasen, tib ge ǃKhūb Eloba ra mî. Kaise di ge ǂgui ǁō hâ sorode nî hâ; ǁîdi ge ǃnōsase nî aoxūhe.”
Israels di ǁkharab
4Nēsa ǃgâ re, sadu hîa ǂhâ hâna ra dāǂkhū tsî ǃhūb di ǀgâsana ra hîkākā ǂgao do. 5Sadu ge ra mî: “Mâǁaeb ǀasa ǁkhâba nî ǃkharu, î da sida ǃhoroba ǁamaxū ǁkhā tsî Sabbattsēsa ǃhorob ǀkha da nî ǂharugu ǁkhāse, î da ǂkhari ǃhororo-e kai mari-i ai ǁamaxū, gāxaǃnâ ǀnō-ūdas ai ǁî-i ǃgomma ǀnō tsî. 6Sadu ge ǀgâsa khoena mari-i ǃaroma ra ǁamaxū tsî ǀgâsa khoena ǀkhapura ǃaroma, ǃhoro-i di ǀhōb xaweb tsîna du ge ra ǁamaxū.”
7 ǃKhūb ge Jakob di ǂkhaisib tawa ge nū: “Tita ge tātse ǁîn di dīgu hoaga ǀuru tide. 8Nēs ǂamab kha ǃhūba ǂgubi tide tsî ǁîb ǃnâ ǁan hân hoana ǃoa tide. Hoaraga ǃhūb ge Nylǃāb khami nî khâi. ǁÎb ge ǁnobeǁnobehe tsî ǁkhawa Egipteb di ǃāb khami nî ǁgôa. 9ǁNātsē ta ge soresa tsēǃgâǁaeb ai nî ǂgâ kai tsî ǃhūbaiba tsēa nî ǃkhae kai,”
tib ge ǃKhūb Eloba ra mî.
10“Tita ge sadu ǁâudīga ǃoab ǃnâ tsî sadu ǁnaetsanade ǃgaetsanadi ǃnâ nî ǀkharaǀkhara. Tsî ta ge sado ǃoab sarana ana tsî danadi âdo nî ǂkhomǃgoraǃgora. ǀGuise ǀgui i ūhâ ǀgôa-i ǂama ra ǃoa khoe-i khami du ge nî ībahe, tsîs ge ǀamsa au tsēs khami nî ī.
11“Tsēdi ge nî hā, ǁîdi ǃnâ ta ǃâtsūǀkhāba ǃhūb ǃnâ nî sîba; ǃâsa pere-i ǃaroma tama tsî ǁgâsa ǁgam-i ǃaroma tama, xawe ǃKhūb di mîsa ǁnâu ǂgaos ǃaroma,”
tib ge ǃKhūb Eloba ra mî.
12“Khoen ge huriba xu hurib ǁga nî ǀnarema tsî ǀapasa xu aiǂoas ǁga nî ǃgûma, ǃKhūb di mîsa ra ôase, xawen ge ǁîsa hō tide. 13ǁNā tsēs ain ge îsa ǂkham khoedi tsî ǀgaisa ǂkham khoegu tsîna nî ǁgâǁō. 14ǁNān, Samarias di ǁgôa-elon tawa nū tsî ‘Sa elob ûi hâ ǃkhais ao Dantse, tamas ka io ǀgoreǀîdaob Bersebas ǃoa garub a ûitsama ǃkhais ao’ ti ra mîn ge nî ǁnā tsî ǁkhawa khâi tide.”
Currently Selected:
Amos 8: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
