Amos 6
6
Israels di hîkākāhes
1Tsūba ǁnān sâsase Sions ǃnâ ǁan hân tsî sadu Samarias ǃnâ ǃnorasase ra tsâsendu tsîdo. Sago ǃgôahesago, ǁaedi hoadi ǃnâs ǁîsa ǂguro ǁaes digo, sago ain Israeli ommi dina ra ǂgomaiǂnûigo. 2Kalnes ǁga ǃgû î sī kō, ǁnāpa xu kai ǃās Hamats ǁga ǃgû, î Filisteǁîn ǃās Gats ǃoa ǃkharu. ǁÎna kha sadu gaosigu xan a ama-ai? ǁÎn di ǀkhariga sadu digu xa gu a kai? 3Sadu ǂōǂōsib tsēsa ra ǃnūǃnū tsî ǂkhabasib ǂnû-aiǃnaosa ra ǀgūǀgūdo. 4Sadu ǂkhoaǁgûgu ǀkha ǁguiǂuiǃnâsa kharogu ai ǁgoe tsî sâ-aikharogu ai ǁgoe ra garosendu tsî ǃharade xu ǁkhaon tsî tsâun tsîna ra ǂûdo. 5Sadu ge harps di ǀōb ǃoa amde ra ǁnae tsî ǀkhōxūna Davidi khami ra dībasen. 6Sadu ge ǂauxûiba ǃhupu ǃoredi ǃnâ ra ā tsî ǂoaǂamsa olib ǀkha ra soposen, xawe du ge Josefi di hîkākāhes xa ǂâiǂhansen tama hâ. 7ǁNā-amaga du ge sado ǃkhōsis ǃnâ nî ǃgû-ūhen ǃnâ nî ǂguro. Sadu di ǁâudīgu ge nî ǀam.
8 ǃKhūb Elob ge ǁîb ǂûb tawa ge nū, tib ge ǃKhūb Hoaǀgaixa Eloba ra mî: “Tita ge Jakob di ǂnīsasiba ra uixa tsî ǁîb di ǁkhui-omga ǁkhan hâ. ǁNā-amaga ta ge ǃās tsî ǁîs ǃnâ hân hoana khākhoen ai nî māǁnâ.”
9Disi aogu ga ǀgui oms ǃnâ ǃgau, o gu ge nî ǁō. 10Tsî ǁîb di ǀaokhoeb ga ǂkhōna ūǂui tsîb nî ǂhubise hā, ob ge oms ǃnâ ǂgana hâb ǃoa “ǀNî kho-e noxopa hâ-e sats ǀkha?” ti nî mî.
Ob ge ǁîba “Hî-î” ti nî mî.
Ob ge ǀaokhoeba “ǃNō, tā ǃKhūb di ǀonsa ǂgai” ti nî mî.
11 ǃKhūb ga mîmā, o di ge omdi hoade nî ǂnauǂkhūǂkhūhe, kaidi tsî ǂkharidi tsîdi hoade. 12Hāna ǀuigu ai ǃkhoen ra? Gomagu ǀkha huriba ǃhūǃgaots ra? Xawe du ge ǂhanuba ǃgāb ǃnâ ge ǀkharaǀkhara tsî du ge ǂhanu-aisib di ǂûna ge au-au.
13Sadu ge Lodebars ǂama ra ǃgâiaǂgao. Sadu ge “Sida ǀgaib ǂûba xus ge Karnaimsa#6:13 Karnaimsa: Nē ǂkhari ǃāros di ǀons ge ǁnâgu ti ra ǂâibasen, nēs ge ǀgaib di ǁgauǁgausa. da ge ūsa” ti ra mî.
14“Tita ge ǁae-e sadu ǂama nî khâi kai Israelǁîdo,” tib ge ǃKhūb Hoaǀgaixa Eloba ra mî. ǁÎn ge sado nî ǁgâiǀā, Hamats ǂgâ-amsa xu Arabaǃgoaǃnāb kōse.
Currently Selected:
Amos 6: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
