Amos 5
5
ǃHobasens ǃoa hâ ǂgais
1ǁNâu re nē mîdi, sas ǂama ta ra ǁnae ǃgaetsanas dide, Israelse:
2ǂKhamkhoes Israels ge go ǁnā,
tsîs ge ǁkhawa khâi tide.
ǁÎs ge ǁnāxūhe hâse ǃhūb ai ǁgoe,
khoe-i xare-i ge ǁîsa ūkhâi tama hâ.
3Nētib ge ǃKhūb Eloba ra mî: “ǀGuiǀoadisigu ǀkha ra ǁnāǂam ǃās ge ǀguikaidisigu ǀkha ǀgui ra ǃgau tsî ǀguikaidisigu ǀkha ra ǂoas ge disigu ǀkha ǀgui Israelsa ra ǃgauba.”
4Nētib ge ǃKhūba Israelǁaes ǃoa ra mî: “Tita ôa re, o du ge nî ûi. 5Tā Betelsa ôa, tā Gilgals ǁga ǃgû tamas ka io Bersebas ǃoa ǃkharu. Gilgals ge ǃkhōsis ǃnâ nî ǃgû-ūhe tsî Betels ge nî hîkākāhe.”
6 ǃKhūba ôa re, o du ge nî ûi. ǁNā tamas ka io, ob ge ǁîba Josefi omma ǀaeǁhabub khami nî hāǂam tsî Betelsa nî khauǃkhū tsî khoe-i xare-i ge ǁîsa ǀari ǁkhā tide. 7Sadu ge ǂhanuba dabaǃkhuni tsî ǂhanu-aisiba ǂaidi ǀkha ra dāǃgâ.
8ǁNāb ǀgamirode ge kurub,
ǃkharagaǃnâgu ǀgamirode.
ǃKhaenaba ǁgoas ǃnâ ra ǀkharaǀkharab
tsî tsēba ǃkhaenab ǃnâb.
ǁNāb hurib di ǁgamma ra ǂgaib
tsî ǁîba ǃhūbaib ai ra ǁhōǂuiba,
ǁîb ge ǃKhūb ti ǀon hâ.#Job 9:9; 38:31
9ǁÎb ge ǀgaisana ra hîkākā,
ǁîb ge ǁkhui-omga ra ǂkhūǂkhū.
10Sadu ge ǂhanu tama ǀgoraǃgâde ra mâǃoa khoe-e ǁkhan tsî amaba ra ǃhoa khoe-e a ǃhuisa. 11Sadu ge ǀgâsana dāǂkhū tsî ǁîna ǃhoroba ra ǁgūǀhana. Sadu ge ǁhāsa ǀuidi ǀkha omde ge ombasen, xawe du ge ǁîdi ǃnâ ǁan tide. Sadu ge îsa draibeǃhanaga ge ǂgā, xawe du ge ǁîgu ǂauxûi-e ā tide. 12Tita ge mâtikōse di sadu ǃûǂamde a ǂgui tsî mâtikōseb sadu ǁoreba a kai ǃkhaisa a ǂan. Sadu ge ǂhanu-aina ǁgâiǀā tsî ǁamaǃkhunimari-e ra ū tsî ǂhâ hâna ǀgoraǃgâǃkhaidi tawa ra ǁkhaebē. 13ǁNā-amaga i ge ǁnâuǃāxa-e nēti ī ǁaeb ai ra ǃnō, nēb a ǂkhaba ǁae amaga.
14ǃGâina ôa re, ǂkhabana tama, î du ûi. Ob ge ǃKhūb Elob Hoaǀgaixaba sadu ǀkha nî hâ, sadu ǀkhab hâ ti du ra mî khami. 15Tsū xūna ǁkhan î ǃgâina ǀnam, î du ǂhanu-aisiba ǀgoraǃgâǃkhaidi ǃnâ ǁgūba. ǀNîsib ge ǃKhūb Elob Hoaǀgaixaba, ǃgau hâ khoen Josefi dina nî ǀkhomxa.
16ǁNā-amagab ge ǃKhūb Elob, Hoaǀgaixa ǃKhūba ra mî: “Ās tsî ǃgaes tsîra ge ǃās di ǃgangu hoagu ǃnâ nî hâ. ǃHanasîsenaogu tsîn ge ā gu hā nîse nî ǂgaihe tsî ǃoatsanadi ǁnae-aona ǃoaǀhaon nîse. 17Hoa draibeǃhanagu ǃnâb ge ǃgaeba nî hâ, sadu ǁaegu ta nî ǃkharu amaga,”
tib ge ǃKhūba ra mî.
18Tsūb ge ǃâu du hâ sadu hîa ǃKhūb di tsēsa ra ǁkhoredo. Tare-i ǃaroma du ǃKhūb di tsēsa ra ǁkhore? ǁNā tsēs ge nî ǃkhae, ǁîs ge ǃnâ tide. 19ǁÎs ge khoe-i xamma ǃkhoeni tsî xawe bēri ǀkha ra ǀhao i khami nî ī. Tamas ka io khoe-i oms â-i ǃnâ ǂgâ tsî i ga ǂnubiǂgoab ai ǁgâibasen, o ǀaob xa ra nâhe-i khami. 20ǃKhūb di tsēs ge a ǃkhaeb di tsî ǃnâb di tama hâ; ǃkhaenas ǀguis, ǃnâ-i a ǀkhaise.
21ǁKhan ta hâ, tita ge sadu di ǁâudītsēde ra uixa, tsî ta ge sadu ǁâudīgu di ǀhaodi ǃnâ ǃgâiǃgâibasen-e ūhâ tama hâ.#Jes. 1:11-14 22Khauǁguibadi tsî ǃhoroǁguibadi tsîde du ga hā-ūba te, xawe ta ge ǁîde ūǃoa tide. ǂKhîbagus ǁguibadi sadu di kaukauhe hâ tsâun dide ta ge kōǀîs tsîna hî tide. 23Sadu ǁnaeb di ǂkhupiba tita xu ūbē. Tita ge sadu harpdi ǀōba ǃgâ tide. 24Ab ǂhanuba ǁgammi khami dâuǀkhī re tsî ǂhanu-aisiba toa tama ǁgam-e ūhâ ǃāb khami.
25“Hakadisi kurigu ǃgaroǃhūb ǃnâ du ge hâ i gu ǃnâ ǂāǁguibadi tsî ǃhoroǁguibadi tsîde hā-ūba te du gere, sadu Israelǁaes dido?#ǃNǃkh. 7:42-43 26Sadu ge sadu gao-aob Sakuti di īb tsî sadu ǀgamiro-elob Kaiwanni di īb hîa du ge kurubasenni tsîkha nî tani, 27tita ga sado ǃkhōsabese Damaskus nauǀkhāb kōse ǃgû-ūo,”
tib ge ǃKhūb, Hoaǀgaixa Elob ti ǀon hâba ra mî.
Currently Selected:
Amos 5: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
