Amos 4
4
1Nē mîsa ǃgâ, saso Basanni gomaso, Samariaǃhommi ai hâso. Saso hîa ǀgâsana ǁgâiǀā, ǂhâ hâna tsūse sîsenū tsî saso aoga ǃoa “Hā-ūba se, î se ā” ti ra mîso. 2ǃKhūb Elob ge ǁîb di ǃanusib tawa ge nū: “Tsēdi ge nî hāǂamdu, ǁîdi ai du ǁgapeb ǀkha nî ūbēhede, ǀuniga-i kōse ǁaun ǁgapegu ǀkha. 3Sadu ge mâ-i hoa-e, ǁî-i ais ai ǂnubiǂgoab ǃnâ hâ khôaǃkhais ǃnâ nî ǂoa tsî du ge Hermonǃhomma ǃoa nî doeǁgābēhe,”
tib ge ǃKhūba ra mî.
Israels di ǁkhāǁkhāsen tama is
4“Betels ǃoa hā, î hā ǁore, Gilgals ǃoa, î ǃnāǂamsase hā ǁore. Sadu ǁguibade ǃnauǁgoaga hā-ū, sadu disiǁîǃâde ǃnonaǁî tsēs ai. 5Khūkhū-e ūhâ tama pere-e ganganǁguibas ase ǁguiba, î sadu di māsenxa ǁguibadi xa koasen, ǁîde ǂanǂan. Sadu Israelǁîdu kom ǁnāti dīs xa ǃgâibaheo,”
tib ge ǃKhūb Eloba ra mî.
6“Tita ge ǃâtsūǀkhāba sadu ǃādi hoadi ǃnâ ge hā-ū; pere-i tôasisasiba sadu ǁanǃkhaidi hoadi ǃnâ, xawe du ge tita ǃoa ǃhobasen tama ge i,”
tib ge ǃKhūba ra mî.
7“ǀNanuba ta ge sado xu ge ūbē, ǃnona ǁkhâgu noxopa ǃgaos xa ǃgau hâ hîa. ǀGui ǃās ai ta ge ǀapi kai, xawe ta ge nausa xu ǀnanuba ge ūbē; ǀgui ǃhanaǃhūb aib ge ǀnanuba ge ǁnā, xawe naub ǀapiba hō tamab ge ge ǂnâ. 8ǀGam tamas ka io ǃnona ǃādi khoen ge ǁgam-i ǃaroma ǀnî ǃāsa ǃoa ge ǃgû, xawen ge ǂâu hâ ǁgam-e hō tama ge i, xawes tsîna du ge tita ǃoa ǃhobasen tama ge i,”
tib ge ǃKhūba ra mî.
9“Tita ge sadu ǃhoroba ǀgamsa ǂoab tsî ǀae-ain ǀkha ge hîkākā. Tita ge sadu ǃhanagu tsî draibehain tsîna ge hîkākā. Sadu ǀnomahaidi tsî ǀkherahaidi tsîn ge ǂhomn xa ge haputoahe, xawe du ge tita ǃoa ǃhobasen tama ge i,”
tib ge ǃKhūba ra mî.
10“Tita ge ǁgaisi ǀae-i, Egipteb ǃnâ ta ge dī hâ i khami ī-e sadu ǃnâ nî sîǂgā. Sadu ǂkham khoega gôab ǀkha ǃgam tsî ta ge sadu hāna ge ūbē. Sadu hâǃkhaib di ǀō hamma ta ge sadu ǂguidi ǃnâ ge ǂgâ kai, xawe du ge tita ǃoa ǃhobasen tama ge i,”
tib ge ǃKhūba ra mî.
11“Tita ge ǀnîn âdo ge hîkākā, Sodoms tsî Gomoras tsîra ta ge hîkākā khami. Sadu ge ǀaesa xu go ǂgaeǂuihe ǀae-ammi khami ge ī i, xawe du ge tita ǃoa ǃhobasen tama ge i,”
tib ge ǃKhūba ra mî.#Gen. 19:24
12“ǁNā-amaga ta ge sats ǀkha ǁnāti nî dī, Israeltse. ǁNāti ta sats ǀkha nî dī xuige sa Elob ǀkhats nî ǀhaos ǃoa ǂhomisen, Israeltse.”
13ǁNāb ǃhomga ge ǂnubib
tsî ǂoaba ge kurub;
ǁnāb khoesiba ǁîb ǂâisa ra ǂanǂanni,
ǁgoaǃaromasa ra ǃkhae kaib,
ǃhūbaib di ǀgapigu ai ra ǃgûb,
ǁîb ge ǃKhūb, Hoaǀgaixa Elob ti ǀon hâ.
Currently Selected:
Amos 4: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.