Amos 3
3
1ǁNâu re Israelǁîdo nē mîs ǃKhūb sadu ǃoagu ra mîsa; sadu Egipteba xu ta ge ǂgaeǂguiǂui ǁaes didu hoado. 2“Sadu ǀguido ta ge ǃhūbaib di ǁaedi hoade xu ge ǁhûiǂui, ǁnā-amaga ta ge sadu di ǁoren hoan ǂama nî ǁkhara du.”
Kēbo-aob di ǁguiǂams
3ǀGam khoena ǀguipa ǃgûn nî, ǁnāsan ga ǁnâugu tama io?
4Xamma kha ǃgurub nî ǃaub ǃnâ, amǀnē-eb ga ǃkhō tama io?
ǂKham xamma kha ǁîb hâǃkhaisa xu ǃgurub nî, xū-eb ǃkhō tama hîa?
5ǀHomani-e ǃhūb ai ǁnoas ǃnâ ǃkhōhe i nî, ǁnoa-i ga ǁî-i ǃaroma ǀkhaio?
ǁNoasa ǃhūba xu ǃaekhâis nî, xū-es ǃkhō tama hîa?
6Xâiǁnâsa ǃās ǃnâ xâihes nî, khoenas ǃhuri kai tamase?
ǃĀsa ǂōǂōsi-i xa hāǂamhes ra, ǃKhūb ga ǁnāsa ī kai tama io?
7 ǃKhūb Elob ge tātsē xū-i xare-e dī tama hâ, ǁîb di ǃgāgu kēbo-aogab ǁîb ǀapesa ǂanǂan tamase.
8Xammi ga ǃguruo, tari-e ǃao tide?
ǃKhūb Elob ga ǃhoao, tari-e kēbo tide?
Samarias di hîkākāhes
9Nē ǃkhaisa Asdods di gao-omgu tsî Egipteb di gao-omgu ǃnâ ǂanǂan: “Samarias ǂnamipe ǁgoe ǃhomgu ai ǀhao, î kai ǀgomaxasib tsî ǁgâiǀāb ǁîs ǃnâ hâba mû re.”
10 ǃKhūb ge ra mî: “ǁÎn ge ǂhanuse dīs tsîna a ǀū. ǁÎn ge ǂkhabadīb tsî ǁkhâuǁnâs ǀkhan ge hō xūn ǀkha ǁkhui-omgu âna ra ǀoaǀoa.”
11ǁNā-amagab ge ǃKhūb Eloba ra mî: “Khākhoeb ge ǃhūba nî ǃnamiǂgā tsî sa ǀgaisa ǂnubiǂgoaga khôaǁnâ tsî sa ǁkhui-omga nî ǃnariǂuiǃnâ.”
12Nētib ge ǃKhūba ra mî: “ǃÛi-aob ra xammi amǃnâba xu ǀnūkha kas, ǂgaes ǃâro-i kas hoasa ores ǁkhās khamin ge Samariab ǃnâ hâ Israelǁîna kharo-i di ǃâs tsî sâ-aikharo-i di ǁhôas ǀkha nî orehe. 13Nēsa ǃgâ, î Jakob ommi ǃoagu ǃkhō-am re”
tib ge ǃKhūb Elob, Hoaǀgaixa Eloba ra mî.
14“Israelǁaesa ta ga ǁîs di ǁoren ǃaroma ǁkhara tsēs ai ta ge Betels di altarde nî hîkākā; ǁîdi ǁnâgu ge ǁhāǁnâhe tsî ǃhūb ai nî ǁnā.#2Gao. 23:15 15Tita ge saob ǁaeb di oms tsî soreb di oms tsîra nî khôaǁnâ; ǂkhoaǁgûgu ǀkha anisa omdi ge nî hîkākāhe, ǂgui omdi ge nî bē”
tib ge ǃKhūba ra mî.
Currently Selected:
Amos 3: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
