Jr 9
9
1Kama' taxaq jun yu'amha' linjolom,
ut li xya'al wu kama' taxaq li roq nima'
re yaab'ak chi q'eq ut chi kutan
chirix lintenamit li xe'kamsiik!#9,1 Lm 3,48-51.
2Ani taxaq xk'ehok junaq wochochnaal sa' li chaqich'och'
b'arwi' tinhilanq jo' aj numel b'e,
re raj tinkanab' lintenamit!
Xb'aan naq aj muxuleb' rib' chixjunileb',
tik jun tuub'eb' chi aj b'alaq';
3yo'oon wankeb' chi yehok tik'ti',
ut chanchan xq'esnal li simaj li ru'uj raq'eb'.
Li tik'ti' nanumtaak sa' li tenamit a'in
ut li yaal maak'a' na'ok wi'.
Moko te'xtaw ta chik xna'leb'eb'
ut ink'a' neke'xnaw ru li Qaawa'.
4Li junjunq chixkolaq rib' chiru li ras riitz'in,
chi moko chixk'ojob' xch'ool chirix li ramiiw,
xb'aan naq eb' li ras riitz'ineb' rib' neke'b'alaq'ik
ut chixjunileb' li amiiw junes q'ab'ank neke'xb'aanu.
5Neke'xb'alaq'i rib' chirib'ileb' rib'
ut maajun nayehok li yaal sa' xyanqeb';
k'aynaqeb' chi tik'ti'ik, xe'xpo' xk'a'uxeb'
ut ink'a' chik neke'raj xjalb'al xna'leb'eb'.
6Ka'aj chik li b'alaq'ik ut li tik'ti'ik wank sa' xch'ooleb',
ink'a' neke'raj xnawb'al ru li Qaawa'.
7Jo'kan naq li Qaawa', li Nimajwal Yos, kixye chi jo'ka'in:
“Tinrahob'tesi lintenamit re xch'ajob'resinkileb',
xb'aan naq k'a' ta chik ru tinb'aanu reheb' re te'usaaq?
8Li ru'uj raq'eb' chanchan li simaj nakamsink,
junes b'alaq'il aatin wank chi xtz'uumal reheb'.
Sa neke'xk'e xsahil xch'ooleb' li ras riitz'in,
ab'an sa' li xch'ooleb' yookeb' xsik'b'al li xluktesinkileb'.
9Ma ink'a' tab'i' tink'eheb' chi xtojb'al rix li maak a'an?
Ma ink'a' tab'i' tink'ajtesi ruheb' li tenamit jo'ka'aneb'?
-chan li Qaawa'-.
10“Chexyaab'aq ut chexq'oqonq chirixeb' li tzuul,
b'ichahomaq junaq b'ich re rahil ch'oolej chirixeb' li taq'a,
xb'aan naq xe'choqleek ut maajun chik nanume'k aran.
Ink'a' chik neke'me'lok li wakax;
eb' li xik'anel xul chiru choxa ut eb' li josq' aj xul xe'elelikje'k.
11“Jun tuub' chi pek tinsutq'isi wi' Jerusalén,
cho'q xna'ajeb' laj xojb';
nakirirnak tinkanab' chixjunileb' li tenamit sa' xteepal Judá
ut maajun chik taakanaaq chisa'”.
12Ani tz'aqal wank xna'leb' chi xtawb'al ru a'in?
Ani x'aatinaak xb'aan li Qaawa'?
Xyehaq anaqwan.
K'a'ut naq x'oso'k li qana'aj ut xkanaak jo' li chaqich'och',
chi maajun chik nanume'k aran?
13Kichaq'ok li Qaawa' ut kixye: “Xb'aan naq ke'xkanab' xpaab'ankil linChaq'rab' ink'ehom reheb'. Ink'a' ke'rab'i xyaab' linkux chi moko ke'xpaab', 14ke'xb'aanu b'an chik li nawulak chiruheb' jo' chanru xkawilal li xjolomeb', ut ke'xloq'oni ru laj Bahal, jo' ke'tzole'k wi' chaq xb'aaneb' li xna' xyuwa'eb'. 15Jo'kan naq laa'in, li Nimajwal Yos, li xYos laj Israel, ninye chi jo'ka'in: Tink'eheb' chi xtzekankil li ch'am aj tzekemq ut tink'eheb' chi uk'ak li ha' nakamsink.#9,15 Jr 23,15. 16Tincha'cha'iheb' sa'atqeb' li tenamit, li ink'a' xnawom ruheb' a'an chi moko xnawom ruheb' li xna' xyuwa'eb'; ut tink'eheb' chi kamsiik chi q'esnal ch'iich' toj reetal te'sache'q ru chixjunileb'”.
Rahil ch'oolejil chirix Jerusalén ut Judá
17Jo'ka'in kixye li Nimajwal Yos:
“Ab'ihomaq chi us,
taqlahomaq xb'oqb'aleb' li ixq li neke'toje'k chi yaab'ak.
B'oqomaqeb' li jwal seeb'eb' sa' li k'anjel a'an ut chalqeb'!”.
18Xseeb'aaqeb' rib' chi chalk re te'yaab'aq chiqix,
re naq tootz'uyinq ajwi' laa'o
ut taat'ule'q xya'al li qu chi yaab'ak.
19Chalen chaq Sión na'ab'iik li rahil ch'oolejil:
“Toq'ob' qu, k'ajo' naq yo qarahob'tesinkil!
Relik chi yaal naq xookanab'aak sa' xutaan:
xoo'isiik sa' li qatenamit
ut li qochoch xkanaak chi po'lem”.
20Ex ixq, ab'ihomaq li raatin li Qaawa';
k'uulahomaq sa' leech'ool li aatin na'elk chi xtz'uumal re.
Tzolomaqeb' leeko' rik'in li b'ich a'in re rahil ch'oolejil
ut tzolomaqeb' ajwi' leeramiiw ixq chi jo'ka'in:
21“Li kamk x'ok sa'eb' li qab'entaan,
xwulak toj sa' li qachaq'alil ru ochoch.
Xkamsiheb' li kok'al sa'atqeb' li b'e,
ut sa'eb' li k'ayiil xe'kamsiik eb' li saaj al.
22Neke'jilixink eb' li kamenaq
chanchaneb' li k'ot chiru ch'och';
neke't'anlok chiru ch'och' jo' li pim naq ak xyok'e'k,
ut maajun chik naxokok reheb'”.
A' li Qaawa' xyehok re.
23Jo'ka'in kixye li Qaawa':
“Mixk'e xloq'al xjunes rib' li wank xna'leb' sa' xk'ab'a' naq wank xna'leb',
chi moko chixnima rib' li wank xwankil,
chi moko li b'ihom sa' xk'ab'a' li xb'ihomal.
24Li ani naraj xnimankil rib', xnimaaq rib' rik'in a'in:#9,24 1 Ko 1,31; 2 Ko 10,17; Stg 1,9.
naq naxnaw wu ut naxtaw ru naq laa'in li Qaawa',
li nin'uxtaanak u ut ninxaqab' xwankil li tiikil ch'oolej ut li yaal sa' ruuchich'och'.
Xb'aan naq a'an a'in li nawulak chiwu”,
chan li Qaawa'.
25Xyehom li Qaawa': “Chalk re xkutankil naq tink'ajtesi ruheb' chixjunil li tenamit li xk'ulumeb' li sirkunsisyon ka'ajwi' sa' li xjunxaqalileb': 26eb' laj Ejiipt, eb' laj Judá, eb' laj Edom, eb' laj Amón, eb' laj Mohab ut chixjunileb' laj Arabia li neke'xjo li xjolomeb' ut wankeb' sa' li chaqich'och'. Xb'aan naq chixjunileb' li tenamit a'in jo'wi' eb' laj Israel toj maak'a' li reetalil li Sumwank sa' li xch'ooleb'”.#9,25-26 Hch 7,51; Ro 2,25-29.
Currently Selected:
Jr 9: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
