Jr 10
10
Li jalanil yos ut li yo'yookil Yos
1Ex ralal xk'ajol laj Israel, ab'ihomaq li ok re chi xyeeb'al eere li Qaawa'. 2Li Qaawa' naxye chi jo'ka'in:
“Meetzol eerib' rik'ineb' li jalanil tenamit
chi moko chexiwa li k'aru nekeril chiru choxa,
jo' neke'xb'aanu eb' li junch'ol chik.
3Maak'a' na'ok wi' li xpaab'ahomeb' li tenamit a'an.
Neke'xyok' jun tololaq li che' sa' k'iche'
ut jun aj peech' natuqub'ank ru rik'in li xch'iich';
4naruutz'u'uji ru rik'in oor ut plaat,
naxt'oj chi klawx re naq ink'a' taa'eek'anq sa' xna'aj.#10,3-4 Sal 115,4-8; 135,15-18; Is 40,19-20; 44,9-20; Sab 13,10-14,21; Bar 6,7-72.
5Chanchaneb' li xxib'enkileb' li xul sa'eb' li awimq,
xb'aan naq ink'a' neke'ruuk chi aatinak.
Tento xpaqonkileb', xb'aan naq ink'a' neke'b'eek.#10,5 Is 46,1-7.
Meexiwaheb', xb'aan naq maak'a' k'aru us neke'xb'aanu
chi moko k'a' ta ru ink'a' us”.#10,5 41,23-24.29.
6Maajun junaq juntaq'eetat wi', at Qaawa':
jwal nim laaloq'al ut k'ajo' xnimal laawankil!
7Ani ink'a' taaxiwanq aawu, at xReyeb' li xninqal ru tenamit?#10,7 Ap 15,4.
Relik chi yaal naq aak'ulub' naq xiwanb'ilaq aawu.
Sa' xyanqeb' chixjunileb' li wankeb' xna'leb'
ut sa' xyanqeb' li awab'ej sa' ruuchich'och'
maajun chik wank jo' laa'at, at Qaawa'.
8Chixjunileb' a'an jwal jipeb' ut memeb' chawu laa'at;
junes memil neke'xtzol chirixeb' li che'il yos.
9Neke'xk'am chaq li tenb'il plaat aran Tarsis ut li oor re Ofir;
laj tenol plaat ut laj pak'onel neke'yiib'ank re
ut neke'xtiqib' rik'in kaq ut kaqmoqinkil t'ikr:
chixjunil a'an yal xk'uub'ahom li xseeb'al li winq.
10A'ut li Qaawa' a'an li tz'aqal Yos:
A'an li yo'yookil Yos ut li Rey wank chi junelik.
Naq najosq'o'k li Qaawa', nahich'hotk li ruuchich'och';
ut eb' li tenamit ink'a' neke'xkuy li xjosq'il li Yos.
11Jo'ka'in teeye reheb' li tenamit maak'a' xpaab'aaleb', ex ralal xk'ajol laj Israel: “Eb' li yos, li ink'a' ke'yiib'ank re li choxach'och', te'oso'q junsut junrub'el choxa”, cha'qex.
12Li Qaawa' kixk'uub' li ruuchich'och' rik'in li xwankil;
kixk'ojob' sa' xna'aj li choxach'och' rik'in xseeb'al li xk'a'uxl,
ut rik'in li xnimal xnawom kixhel ru li choxa.
13Rik'in xyaab' li xkux neke'ch'utlaak li ha' sa' choxa,
ut naxwaklesi eb' li choql toj sa' xmaril li ruuchich'och'.
A'an nak'ehok chi repok li kaaq naq yo li hab',
ut narisiheb' chaq li iq' b'arwi' k'uulanb'ileb' xb'aan.#10,13 Sal 135,7.
14Chixjunileb' li poyanam jwal jipeb' ut maak'a' neke'xnaw;
eb' laj tenol ch'iich' neke'kanaak sa' xutaan xb'aaneb' li xyoseb',
xb'aan naq eb' li jalam u li neke'xyiib',
a'an yal tik'ti' ut maak'a' xyu'ameb'.
15Maak'a' xyaalal ut xk'ulub'eb' li tz'eqtaanaak;
te'oso'q sa' xkutankil li raqb'a aatin.
16A'ut li xYos laj Jakob moko jo'kan ta:
A'an kiyiib'ank re li choxach'och'
ut kixsik' ru laj Israel cho'q reechanihom:
“Li Nimajwal Yos” a'an li xk'ab'a'.
Te'cha'cha'iiq eb' li ketomq
17Ex aj Jerusalén, xokomaq li k'a'aq ru eere ut elenqex,
xb'aan naq sutsuukex xb'aaneb' li xik' neke'ilok eere.
18Jo'ka'in naxye li Qaawa':
“Anaqwan twaanilasiheb' chi najt li wankeb' sa' li na'ajej a'in;
relik chi yaal naq tinrahob'tesiheb'
re rilb'al ma tine'xtaw wi' chik”.
19Jwal toq'ob' wu, q'axal ra wankin
ut maak'a' xb'anol linrahilal.
Sa' inch'ool laa'in naq ink'a' nim linrahilal
ut moko ch'a'aj ta xkuyb'al li xmay.
20Juk'b'ileb' chik linmuheb'aal anaqwan
ut chixjunileb' li xk'aamal xet'upe'k.
Eb' li walal ink'ajol xine'xkanab' injunes
ut maajun chik xkanaak.
Maajun chik taawaklesinq re linmuheb'aal
ut maa'ani chik taaheloq re li xt'ikrul.
21Eb' laj k'aak'alehom re li tenamit a'in xe'jipo'k
ut ink'a' xe'xsik' li Qaawa'.
Jo'kan naq ink'a' us neke'elk sa' xk'anjeleb'
ut chixjunileb' li ketomq xe'cha'cha'iik yalaq b'ar.#10,21 Jr 23,1-4; Ez 34,1-10.
22Ab'ihomaq li esil a'in ut k'ehomaq reetal.
chalk re jun nimla choqink, tz'aapixik rab'inkil;
chalk chaq re sa' xjayal releb'l iq'.
Chixjunileb' li tenamit sa' xteepal Judá te'sache'q ru
ut te'kanaaq chi po'lem, cho'q xna'ajeb' laj xojb'.
23At Qaawa', ninnaw naq li winq moko a'an ta yaal re sa' xb'een li xyu'am,
chi moko sa' ruq' wank li xb'eenik.#10,23 Pr 20,24.
24Choohaaq'us, at Qaawa', jo' chanru li xtiikilal laach'ool
ut ink'a' xb'aan laajosq'il:
mare anchal toohaasach chi junwaakaj.#10,24 Sal 6,2; 38,2.
25Isi laajosq'il sa' xb'eeneb' li tenamit li ink'a' neke'nawok aawu,
jo' ajwi' sa' xb'eeneb' li poyanam li ink'a' neke'tijok chawu.
Xb'aan naq xe'xsach ruheb' li ralal xk'ajol laj Jakob
toj reetal xe'oso'k chi junajwa,
ut nakirirnak aj chik li xna'ajeb' xe'xkanab'.#10,25 Sal 79,6-7.
Currently Selected:
Jr 10: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
