Jr 11
11
Xsachb'al xwankil li Sumwank
1Laa'in, laj Jeremías, kinraatina li Qaawa' ut kixye we chi jo'ka'in: 2“Ab'i k'aru naxye li Sumwank a'in ut ye reheb' laj Judá jo'wi' reheb' laj Jerusalén. 3Taaye reheb' sa' ink'ab'a' laa'in li Qaawa', li xYos laj Israel, naq majewanb'ilaq li ani ink'a' tixpaab' li raatinul li Sumwank a'in.#11,3 Dt 27,26. 4A'an a'in li Sumwank li kink'ojob' rik'ineb' leena' leeyuwa' naq ke'wisi chaq Ejiipt, sa' li tenamit ke'wank wi' chaq kama' wi' wank sa' xam re ha'lesink ch'iich'. Kinye reheb': Paab'omaq li waatin ut b'aanuhomaq chixjunil li ninye eere; chi jo'kan laa'exaq lintenamit ut laa'inaq leeYos.#11,4 Dt 4,20; 1 R 8,51; Jr 7,23. 5Wi tex'ab'inq chiwu, laa'in tinb'aanu li kinye sa' jurament reheb' leena' leeyuwa' ut texink'e chi wank sa' xq'emal li ch'och', jo' wankex wi' anaqwan”.#11,5 Dt 7,12-13.
Ut laa'in kinsume: “Jo'kan taxaq, at Qaawa'”, chankin.
6Toja' naq li Qaawa' kixye we: “Puktesi li esil a'in sa'eb' li tenamit sa' xteepal Judá ut sa'eb' li b'e re Jerusalén. Ye reheb' li poyanam: «Ab'ihomaq k'aru naxye li Sumwank a'in ut paab'omaq. 7Naq ke'wisi chaq Ejiipt eb' leena' leeyuwa', kinye reheb' naq tine'xpaab', ut chalen toj anaqwan junelik yookin cheq'usb'al: Ab'ihomaq xyaab' linkux, chankin. 8Ab'anan ink'a' ke'ab'ink chiwu chi moko kine'xpaab', ke'xq'etq'eti b'an chik rib' chiwu ut ke'ok chi xb'aanunkil li naraj li xjip aj ch'ooleb'. Ink'a' ke'xpaab' li k'aru kinchaq'rab'iheb' wi'; jo'kan naq kinrahob'tesiheb' jo' yeeb'il sa' li Sumwank»”.
9Li Qaawa' kixye wi' chik we: “Eb' laj Judá ut eb' laj Jerusalén xe'xk'amchi'i rib' chintz'eqtaanankil. 10Xe'ok chi xb'aanunkil li maa'usilal jo' ke'xb'aanu chaq eb' li xna' xyuwa'eb', li ink'a' ke'ab'ink chiwu ut koheb' chirixeb' li jalanil yos re k'anjelak chiruheb'. Eb' li ralal xk'ajoleb' laj Israel ut eb' laj Judá ke'xmux xwankil li Sumwank kink'ojob' rik'ineb' li xxe'toonil yuwa'eb'. 11Jo'kan naq tintaqla chaq jun nimla rahilal sa' xb'eeneb' ut ink'a' te'xkol rib' chiru. Us ta japjo'qeb' re chi xpatz'b'al xtenq'ankileb' chiwu, ink'a' tin'ab'inq chiruheb'. 12Toja' naq eb' laj Judá ut eb' laj Jerusalén te'xik chi xpatz'b'al xtenq'ankileb' reheb' li jalanil yos li neke'k'ate'k k'ajpom chiruheb', ab'anan eb' li yos a'an ink'a' te'ruhanq chi xkolb'aleb' sa' xkutankil li nimla rahilal. 13K'ajo' xyoseb' laj Judá jo' xk'ihaleb' li xtenamit; ut li xk'ihal li x'artaleb' laj Jerusalén re k'atok k'ajpom chiruheb' laj Bahal, kama' li xk'ihaleb' li b'e wank aran. 14Ut laa'at, a Jeremías, mattijok chirixeb' li tenamit a'in. Mattz'aamank chi moko chat-elajink chirixeb', xb'aan naq moko te'wab'i ta naq te'xpatz' xtenq'ankileb' sa' xkutankil li nimla rahilal.
15“K'aru naxsik' sa' li wochoch li xsum waanm,
naq naab'al li maa'usilal ak xb'aanu?
Ma tatkole'q chiru li rahilal naq nakak'oxla
rik'in xmayejankil li tib' ut li xxeeb'?
Ma taak'ojlaaq laach'ool rik'in a'an, a Israel?”.
16“Xchaq'alil ru oliiw li q'axal ch'ina'us na'uuchink”:
jo'kan laak'ab'a' xk'ehom li Qaawa'.
Ab'an anaqwan li Yos xloch xxamlel laaxaq
ut k'ajo' naq yookeb' chi k'atk laawuq' rik'in k'iila japok e.
17Li Nimajwal Yos, li ki'awok aawe, kixteneb' jun nimla rahilal sa' aab'een, xb'aan li xmaa'usilaleb' laj Israel ut eb' laj Judá: ke'xchiq' xjosq'il xb'aan naq ke'mayejak k'ajpom chiruheb' laj Bahal.
Ke'raj xkamsinkil laj Jeremías aran Anatot
18Li Qaawa' kik'ehok chinnaw naq eb' li xik' neke'ilok we yookeb' chaq chi xk'uub'ankil inkamsinkil. Laa'at, at Qaawa', kattehok xsa'eb' li wu, re naq tink'e reetal a'an. 19Ut laa'in wankin chaq jo' jun karneer li nak'ame'k sa' li kamsib'aal, chi ink'a' ninnaw naq yookeb' chi xk'uub'ankil linkamik: “Qayok'aq li che' naq kaw chi us; qisihaq sa' xyanqeb' li wankeb' xyu'am re naq ink'a' chik taapatz'manq li xk'ab'a'”, chankeb'.
20A'ut laa'at, at Qaawa', at Nimajwal Yos,
q'axal tiik laach'ool chi raqok aatin;
nakatz'il rix li xch'ool ut li xk'a'uxl li winq.
K'ut chiwu li rahilal taataqla chaq sa' xb'eeneb' a'an,
xb'aan naq sa' laawuq' xinq'axtesi linyu'am.#11,20 Jr 20,12; Bar 1,6-9.
21Jo'ka'in li Nimajwal Yos kiraqok aatin chirixeb' laj Anatot li ke'raj inkamsinkil rik'in xyeeb'al: “Mat-aatinak sa' xk'ab'a' li Qaawa', re naq ink'a' tatqakamsi”, chankeb'. 22Jo'kan naq li Nimajwal Yos kixye reheb' chi jo'ka'in: “Laa'in tinraqoq aatin sa' eeb'een: eb' li saaj winq te'kamq sa' li yalok ut eb' leeralal eek'ajol te'kamq xb'aan li we'ej. 23Maajun chik reheb' a'an taakanaaq chi yo'yo, xb'aan naq chalk re xkutankil naq laa'in tintaqla li nimla rahilal sa' xb'eeneb' laj Anatot, sa' xq'ehil li raqb'a aatin”, chan li Qaawa'.
Currently Selected:
Jr 11: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
