Jr 12
12
Q'axal sa wankeb' li ink'a' useb' xna'leb'
1At Qaawa', naq ninwech'ok aawik'in,
laa'at junelik tiik aach'ool;
ab'anan nawaj xpatz'b'al aawe li na'leb' a'in:
K'a'ut naq jwal us neke'elk li ink'a' useb' xch'ool
ut sa wankeb' li neke'b'alaq'ink?#12,1-4 Job 21; Sal 73,4-14; Hab 1.
2Laa'at xat-awok reheb' jo'eb' li che',
ut eb' a'an neke'xchap xxe' ut neke'uuchink.
Laak'ab'a' junelik wank chi xtz'uumal reheb',
ab'an li xch'ooleb' najt wank aawik'in.#12,2 Is 29,13; Mt 15,8-9.
3At Qaawa', laa'at nakanaw wu;
xinaawil ut xak'e reetal naq linch'ool wank aawik'in.
K'ameb' sa' li kamsib'aal jo' naq nak'ame'k li karneer,
ut k'e reetalileb' cho'q re xkutankil li kamsink.
4Jo' najtil chik taawanq li ch'och' chi ra sa' xch'ool
ut chaqi aj chik li pim sa'eb' li tzuultaq'a?
Xb'aan li xmaa'usilaleb' li poyanam
xe'osoje'k eb' li ketomq ut eb' li xik'anel xul.
Xb'aan naq neke'xye:
“Li Qaawa' ink'a' naxnaw li naqab'aanu”, chankeb'.
Li xsumehom li Yos
5“Wi nakatlub'k chi aanilak chirixeb' li neke'xik chi roqeb' -chan li Qaawa'-,
chanru taawaj xyalb'al aawu rik'ineb' li neke'xik chirixeb' li kawaay?
Wi ch'i'ch'i' wankat sa' jun li na'ajej maak'a' wi' ch'a'ajkilal,
k'aru taab'aanu naq wanqat sa' xk'iche'il Jordán?
6A'aneb' ajwi' laawas aawiitz'in, eb' laawech'alal
xe'b'alaq'ink aawe ut nakate'xhob' chirix aajolom.
Maak'ojob' aach'ool chirixeb'
naq nakate'raatina rik'in ch'ina'usil aatin.
Li Qaawa' ra xch'ool chirix li xtenamit
7“Xinkanab' li rochochil laj Israel
ut xintz'eqtaana li weechanihom.
Xinq'axtesi li jwal raaro inb'aan
sa' ruq'eb' li xik' neke'ilok re.
8Xb'aan naq lintenamit li jwal ninra
xik' xinril jo' jun li kaqkoj sa' li k'iche'.
Xe'xjap reheb' sa' inb'een;
jo'kan naq xeb'intz'eqtaana.
9Lintenamit kama' chik li xik'anel xul ch'ina'us rilb'al,
ut chixjunileb' li k'uch neke'rupupnak sa' xb'een.
Kimqex, chejunilex li k'iche'il xul;
ch'utub'omaq eerib' chi xt'upinkil!
10Naab'aleb' laj k'aak'alenel ketomq xe'xsach li wawimq
ut xe'xteni ru li weechanihom;
joxk' aj chik xe'xkanab' linna'aj li jwal raaro inb'aan,
chanchan chik li chaqich'och'.
11Nayamnak ut nakirnak xe'xkanab'
chi q'axal toq'ob'aal ru;
po'lem xkanaak chixjunil,
ab'an maajun naraho'k b'ayaq xch'ool chirix.
12Sa' xb'eeneb' chixjunil li t'ojoch aj tzuul
xe'chalje'k chaq eb' laj elq'
xb'aan naq laa'in, li Qaawa', wank jun inq'esnal ch'iich'
li tinsach wi' chixjunil li na'ajej toj sa' xmaril,
ut maajun taakole'q.
13Xe'awok triiw, ut k'ix chik xe'xxok;
maak'a' rajb'al naq xe'k'anjelak chi kaw.
Te'xutaanaq chi xxokb'al li kach'in ajwi'
xb'aan naq k'ajo' li xxamlel linjosq'il”.
Xyeechi'om li Qaawa' reheb' li tenamit li nach' wankeb' rik'in laj Israel
14Jo'ka'in kixye li Qaawa': “Chixjunileb' li rechkab'al laj Israel ink'a' useb' xna'leb'. A'aneb' li xe'sachok re li na'ajej ink'ehom re li tenamit Israel; jo'kan naq laa'in twisiheb' sa' li xna'ajeb', ut twisiheb' chaq laj Judá sa' xyanqeb'. 15Ab'anan naq akaq xinsacheb' ru, tinsutq'iiq chaq ut tintoq'ob'a ruheb', ut tink'ameb' chaq wi' chik sa' li xna'ajeb' ut sa' li xtenamiteb'. 16Relik chi yaal naq a'aneb' xe'tzolok re lintenamit chi yehok jurament sa' xk'ab'a' laj Bahal, ab'an anaqwan naru te'wanq sa' xyanqeb' lintenamit wi relik chi yaal naq neke'xtzol li xpaab'aaleb' laj Israel ut neke'yehok jurament sa' ink'ab'a', sa' xk'ab'a' li yo'yookil Yos. 17A'ut li tenamit li ink'a' taapaab'anq chiwu, laa'in twisiheb' sa' li xna'ajeb' ut tink'eheb' chi sache'k chi junwaakaj”, chan li Qaawa'.
Currently Selected:
Jr 12: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
