Jr 8
8
1“Chiruheb' li kutan a'an -chan li Qaawa'- li xb'aqeleb' li awab'ej re Judá te'isiiq sa' li xmuqleb'aaleb'; li xb'aqeleb' li xninqaleb' ru winq, eb' laj tij, eb' li propeet ut li xb'aqel chixjunileb' li ke'wank Jerusalén te'isiiq 2ut te'hire'q chiru li saq'e, chiru li po ut chiruheb' chixjunil li xchahimal li choxa li ke'xra ut ke'xk'anjela ru, li ke'xtaaqe, li ke'patz'ok wi' ut ke'xloq'oni ru. Ink'a' chik te'xoke'q chi moko te'muqmanq; jo'kaqeb' aj chik li k'ot chiru ch'och'.#8,1-2 Jr 25,33. 3Ut q'axal us li kamk chiru li yu'amej cho'q reheb' chixjunil li te'kole'q re a reemaaru aj tenamit a'in, sa'eb' li na'ajej b'arwi' teb'incha'cha'i -chan li Nimajwal Yos-.
Ink'a' neke'raj xjalb'al li xk'a'uxeb'
4“At Jeremías, aatinaheb' li tenamit sa' ink'ab'a' chi jo'ka'in:
«Wi nat'ane'k junaq poyanam, nawakliik wi' chik;
wi nasachk sa' li xb'e, ma ink'a' tab'i' taasutq'iiq sa' li xna'aj?
5Ut k'a'ut naq li tenamit Jerusalén toj naxjipi rib'
ut naxq'etq'eti rib' chi junajwa?
Jwal kaw xch'ooleb' chirix li b'alaq'il na'leb'
ut ink'a' neke'raj sutq'iik chaq wik'in.
6Xe'wab'i chi us: maajun reheb' nayehok li yaal;
maajun naraho'k xch'ool chirix li xmaa'usilal
ut naxye ta: K'aru xinb'aanu?
Chixjunileb' xe'xjal xb'eheb' ut neke'xb'aanu li k'aru neke'raj;
xe'kaano'k ruheb',
kama'eb' chik li kawaay li neke'kaano'k ru chi yalok.
7Li nimla jotz sa' choxa naxnaw li xq'ehil li xsutq'ijik;
li mukuy, li wilix ut li xpatux ha'
neke'xnaw jo'q'e te'elq sa' li xna'ajeb'.
Ab'an lintenamit ink'a' naxnaw li xchaq'rab' li Qaawa'.#8,7 Is 1,3.
8Chanru naq nekeye laa'ex:
Wank qana'leb' ut qik'in wank li xchaq'rab' li Qaawa'?
Ma ink'a' tab'i' xe'xjal ru linchaq'rab' eb' laj tz'iib'
li junes b'alaq'il aatin neke'xye?
9Eb' li wankeb' xna'leb' te'kanaaq sa' xutaan;
taasachq xna'leb'eb' ut te't'ane'q sa' li xtik'ti'eb'.
Xe'xtz'eqtaana li raatin li Qaawa':
k'a' chik na'ok wi' li xna'leb'eb'?
10Jo'kan naq jalan chik taa'eechaninq re li rochocheb', li xk'aleb'aaleb' ut li rixaqileb'.
Chixjunileb', jo' kok' ut ninqi poyanam,
junes li k'aru us cho'q reheb' neke'xk'oxla;
ut eb' li propeet jo'wi' eb' laj tij,
ka'ajwi' b'alaq'ik neke'xb'aanu chixjunileb'.
11Yal neke'xkotz b'ayaq li xrahilaleb' lintenamit
rik'in xyeeb'al: Wank li tuqtuukilal;
ab'anan maak'a' li tuqtuukilal.#8,11 Jr 6,14; Ez 13,10.
12Tento raj xe'xutaanak b'ayaq
chi xb'aanunkil li jo'maajo'il na'leb' a'an,
ab'an maak'a' xxutaaneb'
chi moko xe'kaqo'k kach'inaq xb'aan li xb'aanuhomeb'.
Jo'kan naq te'tichk'oq ut te't'ane'q jo'eb' li junch'ol chik,
naq taawulaq xkutankil li xrahob'tesinkileb'»”,#8,10-12 Jr 6,12-15.
chan li Qaawa' Yos.
13“Twaj raj xxokb'al lintenamit jo' na'uxk re li triiw
-chan li Qaawa' Yos-;
ab'an chanchaneb' li xtoonal li uub' ut li iig li ink'a' na'uuchink ut chaqi eb' li xxaq.#8,13 Lk 13,7.
Jo'kan naq tinq'axtesi lintenamit reheb' laj numel b'e”.
14Ut eb' li tenamit te'xye:
“K'a'ut naq xaqxooko xaq arin?
Qach'utub'aq qib',
okaqo sa' li kawub'resinb'il na'ajej ut kamqo aran.
Li Qaawa', li qaYos, xooxkanab' chi kamk,
xooxk'e chi uk'ak ha' nakamsink,
xb'aan naq xoomaakob'k ut xqaq'etq'eti qib' chiru.
15Xqoyb'eni wank sa' tuqtuukilal,
ut maajun usilal xqataw.
Xqayo'oni li kawilal,
ut a' li xiwak xchalk sa' qab'een.
16Chalen chaq Dan neke'xeeyank chi chalk li xkawaayeb';
neke'tz'ejnak chi chalk, nachiq'lok li ch'och'.
Chalkeb' re chi xsachb'al li tenamit jo'wi' chixjunil li xsahil eechej;
te'xjuk'iheb' li na'ajej ut jo'k'ihaleb' li wankeb' chisa'”.
17“Tintaqlaheb' chaq eerik'in li k'anti' neke'kamsink,
li maak'a' naru wi' xtuulanob'resinkileb';
eb' a'an textiiweb' ut texkamsiheb'”,
chan li Qaawa' Yos.
Xrahil xch'ool li propeet xb'aan li xtenamit
18Q'axal ra sa' inch'ool,
ka'aj chik maa ninkamk.
19Yalaq b'ar na'ab'imank li xyaab'eb' lintenamit:
“Ma maa'ani chik li Qaawa' aran Sión?
Ma maak'a' chik li awab'ej aran?”, chankeb'.
Ut li Qaawa' kichaq'ok ut kixye rehab':
“K'a'ut naq xe'xchiq' injosq'il xb'aaneb' li xjalanil yoseb',
li maak'a' neke'ok wi' chi moko nawb'ileb' ru”, chan.
20Xnume'k xq'ehil li q'olok, xraqe'k li saq'ehil,
ab'an laa'o toj maji' nokookole'k.
21Namayok li waanm chirix li xrahilal lintenamit;
li xiwak x'eechanink we
ut li rahil ch'oolej yo chinkamsinkil.
22Ma maak'a' tawi' junaq b'an aran Galahad?
Ma maajun tawi' naru chi b'anok aran?
K'a'ut naq ink'a' nak'iraak lintenamit?
Currently Selected:
Jr 8: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
