Jr 20
20
Laj Jeremías ut laj Pasjur
1Laj Pasjur, ralal laj Imer, li xjolomileb' li neke'ilok re li rochoch li Yos, kirab'i li kixye laj Jeremías; 2jo'kan naq kixk'e chi sak'e'k li propeet ut chi nat'e'k li roq sa' nat'che', li wank sa' li xNimla Okeb'aal laj Benjamín, chi xk'atq li rochoch li Yos. 3Sa' li kutan jun chik laj Pasjur kirisi laj Jeremías sa' li nat'che' ut laj Jeremías kixye re: “Li Qaawa' xjal laak'ab'a', Magor-Misabib chik taak'ab'a'in. 4Xb'aan naq li Qaawa' xye chi jo'ka'in: «Tink'e naq taaxiwa aawib' aajunes ut tatkanaaq cho'q xxiweb' chixjunileb' laawamiiw. Laa'at taawileb' naq te'kamsiiq chi ch'iich' xb'aaneb' li xik' neke'ilok reheb'. Tinq'axtesi chixjunileb' laj Judá sa' ruq' li awab'ej re Babilonia re naq te'k'ame'q sa' li tenamit a'an ut te'kamsiiq chi ch'iich'. 5Tinq'axtesi ajwi' chixjunil li xb'ihomal Jerusalén, jo'ch'inal jo'nimal terto xtz'aq ut chixjunil li xsahil eechej eb' li awab'ej re Judá, sa' ruq'eb' li xik' neke'ilok reheb' re naq te'k'ame'q Babilonia. 6Ut laa'at, a Pasjur, tatchape'q aawochb'een laajunkab'al ut texk'ame'q Babilonia. Aran toxatkamq ut tatmuqe'q aawochb'eeneb' laawamiiw li xab'alaq'iheb' rik'ineb' laawaatin»”.
Laj Jeremías kiyaab'ak
7At Qaawa', xinaab'oq ut xinaaq'unb'esi,
ut laa'in xinsume linb'oqb'al;
laa'at jwal kaw aawib' chiwu,
jo'kan naq xaq'ax wu.
Chixjunileb' nikine'xse'e rajlal
ut nikine'reetz'u wulaj wulaj.
8Rajlal naq ninjap we chi aatinak,
junes rahilal ut sachok li ninye.
Junelikeb' chinhob'b'al ut chinse'enkil
xb'aan naq ninpuktesi laawaatin.
9Rajlal naq ninye: “Ink'a' chik tink'oxla li Qaawa'
chi moko tin'aatinaq chik sa' xk'ab'a' A'an”,
ab'anan laawaatin chanchan jun li xam lochlo sa' linch'ool,
li naxk'at chaq xsa'eb' linb'aqel.
Us ta nawaj raj xchupb'al, ab'anan ink'a' ninruuk xb'aanunkil.#20,9 Am 3,8; 1 Ko 9,16.
10Nawab'i naq neke'hashotk eb' li poyanam:
“Yalaq b'ar wank li rahilal.
Kimqex ut qajitaq”, chankeb'.
Eb' li wamiiw yookeb' ajwi' royb'eninkil naq tinluktaaq,
ut neke'xye: “Mare tixkanab' rib' chi b'alaq'iik;
toja' naq toonumtaaq sa' xb'een
ut tqak'e reeqaj re li naxye”,#20,10-12 Sal 6,10-11; 31,14-19; 109,30-31; Jr 20,3; 46,5; 49,29; Lm 2,22. chankeb'.
11Ab'an laa'at, at Qaawa', wankat wik'in
jo' junaq aj yalonel li q'axal kaw rib'.
Eb' li xik' neke'ilok we te'oso'q
ut ink'a' te'ruuq xq'axb'al wu;
ink'a' us te'elq, se'enb'ilaqeb' chi junelik,
ut junelik taajultikamanq naq xe'kanaak sa' xutaan.
12At Nimajwal Yos li nakayal rixeb' li tiikeb' xch'ool,
li nakanaw ut nakawil k'aru wank sa' xch'ool li winq,
k'ut chiwu chanru naq tat-eeqajunq sa' xb'eeneb',
xb'aan naq xinq'axtesi wib' sa' laawuq'.#20,12 Jr 11,20.
13B'ichahomaq ut loq'onihomaq ru li Qaawa',
xb'aan naq A'an xkolok reheb' li wankeb' sa' rahilal
sa' ruq'eb' li ink'a' useb' xna'leb'.
14Majewanb'ilaq li kutan kinyo'laak wi'.#20,14-18 Job 3,1-19.
Ink'a' chi'osob'tesiiq li kutan kinxyoob'tesi wi' linna'.
15Majewanb'ilaq li kik'ehok xsahil xch'ool linyuwa'
naq kixye re: “Xyo'laak jun aateelom al”.
16Li winq a'an chisache'q taxaq ru jo'eb' li tenamit
li ke'sache'k xb'aan li Qaawa' chi ink'a' kiril xtoq'ob'aaleb' ru.
Chirab'i ta li japok e xb'aan li rahilal eq'la
ut li b'oqok chi yalok sa' li wa'leb',
17xb'aan naq li Qaawa' ink'a' kinxk'e chi kamk rik'in linna'.
A' raj linna' kikanaak cho'q inmuqleb'aal,
ut laa'in maajoq'e raj kinyo'laak!
18K'a' tawi' aj e naq kinyo'laak,
yal re xaq k'uluk rahilal ut ch'a'ajkilal,
ut re kanaak sa' xutaan chi junelik?
Currently Selected:
Jr 20: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
