Jr 19
19
Li jorb'il ch'och'kuk
1Jo'ka'in kixye we li Qaawa': “Ayu sa' rochoch laj pak'onel ut loq' chaq junaq ch'och'kuk. Taak'ameb' chawix wiib' oxib'aqeb' li xcheekelal li tenamit ut wiib' oxib'aqeb' aj tij. 2Chirix chik a'an tatxik sa' xtaq'ahil Ben-Hinón,#19,2-6 2 R 23,10; Jr 7,30-32; 32,34-35. sa' li Rokeb'aal laj Pak'onel, ut aran toxaaye li aatin tinye aawe. 3Taaye reheb': «Ab'ihomaq li raatin li Qaawa', ex awab'ej re Judá jo'wi' laa'ex li wankex Jerusalén. Li Nimajwal Yos, li xYos laj Israel, xye chi jo'ka'in: Nimla rahilal li tintaqla sa' xb'een li na'ajej a'in, toj reetal taaraho'q sa' xxikeb' li te'ab'inq re. 4Xb'aan naq xine'xtz'eqtaana eb' laj Israel ut xe'xsach xwankil li na'ajej a'in, naq xe'mayejak k'ajpom chiruheb' li jalanil yos, li ink'a' xnawom ruheb' a'an chi moko eb' li xmama' rixa'aneb', chi moko eb' li awab'ej re Judá. Ut naab'aleb' li maak'a'eb' xmaak xe'xkamsi arin. 5Xe'xyiib'atq li tijob'aal cho'q re laj Bahal re xk'atb'aleb' li ralal xk'ajoleb' cho'q mayej sa' xk'ab'a' laj Bahal,#19,5 Lv 18,21; Is 57,5; Jr 7,31. ut laa'in ink'a' xintaqlaheb' xb'aanunkil li na'leb' a'in, ink'a' inyehom reheb' chi moko ink'oxlahom kach'inaq. 6Jo'kan naq taawulaq xkutankil naq li na'ajej a'in ink'a' chik tixk'ab'a'in Tófet chi moko xTaq'ahil Ben-Hinón, tixk'ab'a'in b'an chik xTaq'ahil li kamsink -chan li Qaawa'-. 7Sa' li na'ajej a'in tinjuk' chixjunil li xk'uub'ahomeb' laj Judá ut eb' laj Jerusalén. Tink'eheb' chi kamsiik ut chi sache'k xb'aaneb' li xik' neke'ilok reheb', cho'q xtib' eb' li so'sol ut eb' li josq' aj xul. 8Joxk' ut xiwajel tinkanab' li tenamit a'in: chixjunileb' li te'nume'q arin te'sachq xna'leb' chi rilb'al a'an ut te'xse'e li xsachik li tenamit. 9Tink'eheb' li poyanam chi xtzekaheb' li ralal xk'ajoleb'; li junjunq tixtzeka xtib'el li ras riitz'in, xb'aan naq k'ajo'aq li rahilal ut li we'ej, naq sutsuuq li tenamit xb'aaneb' li xik' neke'ilok reheb' jo'wi' xb'aaneb' li te'ajoq xkamsinkileb'».#19,9 Dt 28,53-57; Ez 5,10.
10“Chirix chik a'an taaxuji li ch'och'kuk chiru chixjunileb' laawochb'een 11ut taaye reheb': «Li Nimajwal Yos xye chi jo'ka'in: Jo'ka'in tz'aqal tinb'aanu re li tenamit a'in ut eb' li xpoyanamil, jo' naq najormank junaq ch'och'kuk, li ink'a' chik naru xyiib'ankil. Ut chixjunileb' li poyanam te'muqmanq Tófet, xb'aan naq maak'a'aq chik na'ajej re muquk. 12Jo'kan ajwi' tinb'aanu re li tenamit a'in ut eb' li xpoyanamil: tinkanab' li na'ajej jo' tz'aqal Tófet -chan li Qaawa'-. 13Chixjunileb' li ochoch re Jerusalén, li rochocheb' li awab'ej re Judá ut eb' li kab'l xe'mayejak wi' k'ajpom chiru chixjunileb' li chahim ut xe'mayejak b'iin chiruheb' li jalanil yos, te'kanaaq chi muxb'il ruheb', jo' tz'aqal Tófet»”.
14Naq laj Jeremías kisutq'iik chaq Tófet, b'arwi' kitaqlaak xb'aan li Qaawa' chi aatinak sa' xk'ab'a', kixaqliik sa' rokeb'aal li rochoch li Yos ut kixye reheb' chixjunil li tenamit: 15“Li Nimajwal Yos, li xYos laj Israel, xye chi jo'ka'in: «Tintaqla chaq chixjunil li rahilal xinye resil, sa' xb'een li tenamit a'in ut sa' xb'een chixjunileb' li wankeb' chi xsutam, xb'aan naq xe'xjipi rib' ut ink'a' xe'xpaab' li waatin», chan li Qaawa'”.
Currently Selected:
Jr 19: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
