Jr 18
18
Laj Jeremías sa' rochoch laj pak'onel
1Li Qaawa' ki'aatinak wik'in ut kixye we: 2“Xaqlin ut ayu sa' rochoch laj pak'onel, ut aran tinye aawe li k'aru toxaaye”. 3Laa'in kohin ut kintaw laj pak'onel chi k'anjelak sa' xb'een li xpak'leb'aal. 4Ab'anan ink'a' us ki'elk chiru li yo xpak'b'al; jo'kan naq kixtikib' wi' chik xyiib'ankil jalan chik, chiru ajwi' li seb' a'an, toj reetal kikanaak jo' tz'aqal nawulak chiru.
5Toja' naq li Qaawa' kinraatina chi jo'ka'in: 6“Ex aj Israel, ma ink'a' tab'i' naru tinb'aanu eere jo' naxb'aanu laj pak'onel a'in? Sa' wuq' laa'in jo'kex li seb' li nayoq'leek sa' ruq' laj pak'onel#18,1-6 Is 64,8; Eklo 33,13; Sab 15,7; Ro 9,20-21. -chan li Qaawa'-. 7Wan naq na'alaak sa' inch'ool xsachb'al, xjuk'b'al ut xputz'inkil junaq tenamit malaj awab'ejihom. 8Ab'anan wi li tenamit a'an naxkanab' xb'aanunkil li maa'usilal, laa'in ink'a' chik tinrahob'tesi jo' k'uub'k'u inb'aan. 9Wan ajwi' naq na'alaak sa' inch'ool xwaklesinkil ut xk'eeb'al xwankil junaq tenamit malaj awab'ejihom. 10Ab'anan wi li tenamit a'an naxb'aanu li ink'a' nawulak chiwu ut ink'a' naxpaab' li waatin, laa'in taach'inanq inch'ool chi xb'aanunkil li usilal xink'oxla xb'aanunkil re.
11“Jo'kan utan, ye a'in reheb' laj Judá ut reheb' laj Jerusalén: «Li Qaawa' xye chi jo'ka'in: Yookin xkawresinkil eerahob'tesinkil ut ak yookin xk'uub'ankil. Kanab'omaq xb'aanunkil li maa'usilal, tiikob'resiiq ru leeyu'am ut leeb'aanuhom». 12A'ut eb' a'an te'xye aawe: «Maab'ay aawib' chi aatinak, xb'aan naq nawulak chiqu xb'aanunkil li naraj li qach'ool ut li junjunq tixb'aanu jo' chanru naraj li xjipil»”.
Xinsachk sa' xch'ooleb' lintenamit
13Jo'kan naq li Qaawa' kixye chi jo'ka'in:
“Patz'onqex anaqwan reheb' li tenamit
ut ab'ihomaq ani reheb' ak rab'ihom junaq aatin jo' a'in.
Eb' laj Israel xe'xb'aanu li q'axal yib'ru.
14Ma naru tab'i' nalajk li ratz'amke sa' li tzuul Líbano?
Ma nachaqik tab'i' li ha' nakub'eek chaq sa'eb' li tzuul?
15Ab'an lintenamit xinxtz'eq chirix li xch'ool,
ut namayejak chik k'ajpom chiruheb' li jalanil yos.
Xe'tichk'ok ut xe'xkanab' li chaab'il b'e ink'utum chiruheb' junxil,
ut a' chik li ink'a' usil b'e ke'ok xtaaqenkil
li ink'a' xnawomeb' ru.
16Chi jo'kan xe'xsutq'isi li xna'ajeb' jo' li chaqich'och',
re naq se'enb'ilaqeb' chi junwaakaj.
Yalaq ani taanume'q aran
tixb'anb'ani li xjolom chi sachsooq li xch'ool.
17Jo' naq nanume'k li iq' nachalk sa' releb'l saq'e,
tincha'cha'iheb' laj Israel,
naq te'eleliq chiruheb' li xik' neke'ilok reheb'.
Ut ink'a' chik twuxtaana ruheb'
naq taawulaq xkutankil li rahilal a'an”.
Ke'xk'uub' xkamsinkil laj Jeremías
18Toja' naq ke'xye: “Kimqex ut qak'uub'aq chanru tqakamsi laj Jeremías. Junelik te'wanq aj tij re qatzolb'al, jo' ajwi' li wankeb' xna'leb' re te'xk'e qana'leb', ut wanqeb' ajwi' propeet li te'xye qe li raatin li Yos. Qajitaq laj Jeremías re naq taakamsiiq, ut miqapaab' chik chixjunil li naxye”, chankeb'.
19Ut laa'in kintijok chi jo'ka'in:
“At Qaawa', chak'ul taxaq lintij,
chawab'i aj ta wi' li yookeb' xyeeb'al eb' li xik' neke'ilok we.
20Ma maa'usilal na'eeqajuuk wi' li usilal?
Xb'aan naq yookeb' chi xpikb'al li jul re inmuqb'al.
Jultikaq aawe naq xintijok chawu
re xtz'aamankil laawuxtaan chirixeb'
ut xkolb'aleb' chiru li tojb'amaak.
21Ab'an anaqwan, at Qaawa', kanab'eb' chi kamk eb' li ralal xk'ajoleb'
xb'aan li we'ej malaj chi q'esnal ch'iich';
kanaaqeb' li rixaqil chi xmalka'anil ixq
ut maajunaq chik ralal xk'ajoleb'.
Eb' li b'eelomej kamqeb' xb'aan li raxkamk
ut eb' li saaj winq che'kamsiiq chi q'esnal ch'iich' sa' li yalok.
22Chi'ab'imanq li japok e sa' rochocheb'
naq te'chalq sa' junpaat jun teep chi aj elq' sa' xb'eeneb'.
Xb'aan naq xe'xpik li jul re inmuqb'al
ut xe'xk'e jun k'aam rub'el woq re inra'lenkil.
23At Qaawa', laa'at nakanaw chixjunil li yookeb' xk'uub'ankil re inkamsinkil.
Maakuy li xmaakeb'
chi moko chisachq sa' laach'ool li ink'a' us xe'xb'aanu.
Kamqeb' chawu ut isi laajosq'il sa' xb'eeneb'!”.
Currently Selected:
Jr 18: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
