Jr 21
21
Li xyehom li Qaawa' cho'q reheb' li xtaql laj Sedesías
1A'an a'in li aatin kixye li Qaawa' re laj Jeremías, naq laj Sedesías, li awab'ej re Judá, kixtaqla laj Pasjur, ralal laj Malkías, jo' ajwi' laj Sofonías, laj tij, ralal laj Mahasías, chi xyeeb'al re laj Jeremías: 2“B'aanu usilal, patz'on chiqix rik'in li Qaawa' k'a'ut naq laj Nabukodonosor, li awab'ej re Babilonia, x'ok chi yalok qik'in. Mare anchal tixb'aanu junaq sachb'ach'oolej li Qaawa' re naq tookanab'aaq sa' xyaalal xb'aan laj Nabukodonosor”.
Toja' naq li Qaawa' kiraatina laj Jeremías, 3ut a'in kixye reheb' li xtaql laj Sedesías: “Yehomaq li aatin a'in re laj Sedesías: 4«Jo'ka'in xye li Qaawa', xYos laj Israel: Laa'in tink'eheb' chi elelik laasoldaad chiruheb' laj Babilonia ut chiruheb' laj Kaldeha li yookeb' chi yalok eerik'in chirix li xsuttz'akil li tenamit, ut tolinch'utub'eb' sa' li tenamit a'in. 5Laa'in ajwi' jun tinyaloq eerik'in, rik'in xnimal inwankil ut inmetz'ew, chi k'ajo'aq injosq'il sa' eeb'een. 6Tinkamsiheb' chixjunileb' li wankeb' sa' li tenamit a'in; eb' li poyanam ut eb' li xul te'kamq xb'aan jun li xiwajel raxkamk. 7Chirix chik a'an tinq'axtesi laj Sedesías, li awab'ej re Judá, sa' ruq' laj Nabukodonosor ut sa' ruq'eb' li neke'ajok xkamsinkil. A'aneb' te'choyoq xkamsinkileb' li te'kole'q sa' li tenamit chirix li raaxiik', li raxkamk ut li we'ej. Tink'eheb' chi kamsiik chi ch'iich', chi maak'a'aq toq'ob'ank u ut usilal cho'q reheb' -chan li Qaawa'-.
8«Ut reheb' li tenamit a'in taaye: Li Qaawa' xye chi jo'ka'in: Anaqwan tink'ut cheru wiib' li b'e, li xb'ehil li yu'am ut li xb'ehil li kamk. 9Ani taakanaaq sa' li tenamit a'in, taakamq sa' li yalok, xb'aan li we'ej malaj xb'aan li raxkamk. Ab'an li taa'elq ut tixq'axtesi rib' sa' ruq'eb' laj Kaldeha li yookeb' chi sutuk tenamit, taakole'q, ink'a' taakamq.#21,9 Jr 38,2. 10Xb'aan naq xink'uub' xrahob'tesinkil li tenamit a'in ut ink'a' chik nawaj rusilankil. Tinq'axtesi sa' ruq' li awab'ej re Babilonia, ut a'an taak'atoq re#21,10 Jr 38,17-18. -chan li Qaawa'-.
Li xyehom li Qaawa' cho'q re li awab'ej re Judá
11«Eb' li ralal xk'ajol li awab'ej re Judá aatinaheb' sa' ink'ab'a' chi jo'ka'in: Ab'ihomaq li raatin li Qaawa'. 12Ex ralal xk'ajol laj David, a'an a'in li naxye li Qaawa':
Rajlal kutan b'aanuhomaq li tiikilal;
kolomaqeb' li yookeb' chi rahob'tesiik
sa' ruq'eb' laj rahob'tesinel.
Mare anchal, xb'aan leemaa'usilal,
taachalq injosq'il sa' eeb'een jo' li xam,
ut maajun chik taaruuq chi chupuk re.
13Laa'in, li Qaawa', yo tz'aqal injosq'il sa' eeb'een
li nim eewankil chiru taq'a,
jo'kex li saqoonak chiru li helhookil ru ch'och'.
Laa'ex nekeye: Ani taachalq chi yalok qik'in?
Ani toltawoq qe sa' li qakawub'resinb'il tenamit? chankex.
14Laa'in tinraqoq aatin sa' eeb'een
jo' chanru leeyehom ut leeb'aanuhom;
tinchoqle leek'iche' ut taak'atq chixjunil li wank chi xsutam.
Laa'in, li Qaawa', xinyehok re a'in»”.
Currently Selected:
Jr 21: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
