Jr 15
15
1Li Qaawa' kixye we: “Us ta tole'xxaqab' rib' chiwu laj Moisés#15,1 Ex 32,11-14; Nm 14,13-19. ut laj Samuel#15,1 1 S 7,5-9. chi tz'aamank chirix li tenamit a'in, laa'in ink'a' twuxtaana ruheb'. Ye reheb' naq elqeb' chiwu ut xikaqeb' chi najt. 2Ut wi te'xpatz' aawe: «B'ar tooxik?», taaye reheb':
«Li Qaawa' xye chi jo'ka'in:
Li teneb'anb'ileb' kamk sa' xb'eeneb' xb'aan li yajel,
li yajel taakamsinq reheb';
li teneb'anb'ileb' kamk sa' xb'eeneb' xb'aan li yalok,
sa' li yalok te'kamq;
eb' li tento te'kamq xb'aan li we'ej,
a' li we'ej taakamsinq reheb';
eb' li tento te'isiiq sa' li xna'ajeb',
te'k'ame'q sa' jalanil tenamit».#15,2 Jr 43,11; Ap 13,10.
3“Laa'in tintaqla chaq kaahib' paay chi rahilal sa' xb'eeneb': wan te'kamq sa' li yalok, wan te't'upiiq xb'aaneb' li tz'i', wan te'lowe'q ut te'sache'q xb'aaneb' li josq' aj xul ut eb' li so'sol -chan li Qaawa'-. 4Tink'eheb' chi xiwak chixjunileb' li tenamit sa' ruuchich'och' xb'aan li maak kixb'aanu aran Jerusalén laj Manasés, ralal laj Esekías, awab'ej re Judá.#15,4 2 R 21,1-16; 2 Kr 33,1-9.
Taachalq jun xnimal rahilal xb'aan li yalok
5“Ani tawi' taa'iloq xtoq'ob'aal aawu, a Jerusalén?
Ani tawi' taaraho'q xch'ool chawix
malaj ani taaxaqliiq chi xk'eeb'al xsahil laach'ool?
6Laa'at xattz'eqtaanank we ut xkohat
-chan li Qaawa'-.
Jo'kan naq laa'in xintitz'k chi xkuyb'al laamaak:
xintaqsi li wuq' sa' aab'een charahob'tesinkil ut xinsach aawu.
7Xinchiileheb' laawalal aak'ajol rik'in li rahilal
naq xwisiheb' sa' li xna'ajeb';
maajun chik li ralal xk'ajol lintenamit xinkanab' sa' li xmuheb'aal:
xinsacheb' ru xb'aan naq ink'a' xe'xkanab' li ink'a' usil b'e.
8K'ajo'eb' li xmalka'an sa' xyanqeb',
q'axal naab'aleb' chik chiru li samahib' chire li palaw.
Chiru li kutan xe'chalk eb' laj sachonel
re xkamsinkileb' li xna'eb' li saaj al.
T'anaamil sa' xb'eeneb' li xiwak ut li rahilal.
9Q'axal ra xk'ul li na'b'ej li wank wuqub' li ralal,
k'ajo' naq xmayok li xch'ool!
Xkanaak sa' xutaanal ut xsache'k li xwankil;
xq'oqyino'k ru li saq'e naq toj kutan.
Ut eb' li te'kole'q sa' xyanqeb',
laa'in tinq'axtesiheb' chi kamk
chiruheb' li xik' neke'ilok reheb'”,
chan li Qaawa' Yos.
Li propeet namayok xch'ool ut nataqlaak wi' chik xb'aan li Qaawa'
10Q'axal ra wankin, at inna'.
Jwal us raj naq ink'a' kinyo'laak,
xb'aan naq sa' lintenamit chixjunileb'
neke'wech'ok wik'in ut xik' nikine'ril.
Maajun wan wi' ink'as chi moko ink'ehom to' tumin,
ab'anan chixjunileb' neke'majewank we.
11At Qaawa', ye we wi ink'a' us xink'anjelak chawu,
wi ink'a' xintijok chirixeb' li xik' neke'ilok we,
naq yookeb' chaq chi k'uluk rahilal ut rahil ch'oolej.
12“Ma natoqe'k tab'i' li q'unilch'iich' li yuub'il rik'in q'anch'iich',
li nachalk sa' xjayal releb'l iq'?
13At Israel, xb'aan chixjunil li xatmaakob'k wi' sa' laana'aj
laa'in tinq'axtesi laab'ihomal ut laasahil eechej
reheb' li xik' neke'ilok aawe,
re naq te'xk'am chi maatan.
14Tatinkanab' cho'q xmuneb' li xik' neke'ilok aawe
sa' jun tenamit li ink'a' aanawom ru,
xb'aan naq k'ajo' injosq'il xchalk sa' aab'een,
chanchan junaq xam li tixsach aawu chi junwaakaj”,
chan li Qaawa'.
15At Qaawa', laa'at nakanaw chixjunil;
jultikaqin aawe ut kim chintenq'ankil.
Maakuy chik xmaakeb' li yookeb' xsik'b'al inkamsinkil:
mare anchal tinkamq laa'in.
Jultikaq aawe naq sa' aak'ab'a' ninkuy li majewaak.
16Naq xak'e we laawaatin,
xink'uleb' chi anchal linch'ool ut xintzeka;
a'an tz'aqal nak'ehok xsahil li waanm,
xb'aan naq sik'b'il wu aab'aan,
at Qaawa', at Nimajwal Yos.
17Maajun wa xinwank sa' xyanqeb' li neke'ch'uch'ib'k
chi moko sa' xyanqeb' li neke'sub'uk kutan;
junelik xinb'eek injunes xb'aan naq laa'at wankat wik'in,
ut laajosq'il na'eek'asink re linch'ool.
18K'a'ut naq ink'a' naraqe'k linrahilal?
K'a'ut naq ink'a' chik naru xkotzb'al xrahil li waanm?
At Qaawa', ma chanchanat li yal k'oxlanb'il ha' cho'q we,
kama'at jun roqha' li nab'alaq'ink we?
19Toja' naq li Qaawa' kixye we chi jo'ka'in:
“Wi tatsutq'iiq chaq wik'in,
laa'in tatink'ul wi' chik ut tat-ok wi' chik chi k'anjelak chiwu.
Wi taakanab' xyeeb'al memil aj aatin
ut taatikib' xyeeb'al li jwal aajel ru,
laa'at li tat-aatinaq sa' ink'ab'a'.
A'eb' li poyanam tento te'sutq'iiq aawik'in,
moko laa'at ta li tatsutq'iiq rik'ineb'.
20Laa'in tatinxaqab' chiruheb' a'an
jo' jun kumul chi tz'ak li jwal kaw rib',
jo' xkawil li q'anch'iich',
li maajoq'e taaruuq xjuk'b'al.
Te'yaloq aawik'in, ab'an ink'a' te'numtaaq sa' aab'een,
xb'aan naq wankin aawik'in chakolb'al ut chatenq'ankil.#15,20 Jr 1,18.
21Tatinkol sa' ruq'eb' li ink'a' useb' xna'leb'
ut tatwisi rub'el xwankileb' li josq' aj winq”,
chan li Nimajwal Yos.
Currently Selected:
Jr 15: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
