Jr 16
16
Li xyu'am li propeet a'an jun eetalil
1Li Qaawa' kixye we chi jo'ka'in: 2“At Jeremías, matsumlaak sa' li tenamit a'in chi moko chiwanq aawalal aak'ajol. 3Xb'aan naq jo'ka'in ninye laa'in li Qaawa' chirixeb' li alal k'ajolb'ej li te'yo'laaq sa' li tenamit a'in ut chirixeb' ajwi' li na'b'ej yuwa'b'ej li te'wanq xkok'al: 4te'kamq xb'aan li xiwajel yajel, ut maajun taayaab'aq chirixeb' chi moko te'muqe'q. Neke'jilixink chiru ch'och' te'kanaaq jo'kaqeb' li k'ot. Li raaxiik' ut li we'ej taakamsinq reheb'; te'lowe'q xb'aaneb' li so'sol ut eb' li josq' aj xul”.
5Li Qaawa' kixye wi' chik we: “Mat-ok sa' junaq ochoch b'arwi' yo li yo'lenk kamenaq. Matyaab'ak chirixeb' li kamenaq chi moko taak'ojob' xch'ooleb', xb'aan naq sa' li tenamit a'in xwisi linrahom, lintuqtuukil usilal ut li wuxtaan -chan li Qaawa'-. 6Sa' li tenamit a'in te'kamq eb' li kok' ut ninqi poyanam, ut maajun reheb' taamuqe'q. Ink'a' taawanq rahil ch'oolejil; maajun taayaab'aq chirixeb' chi moko te'xjo li xjolomeb'. 7Maajun taak'ehoq chi tzekank chi moko chi uk'ak li xk'uluk kamk, us ta na'b'ej yuwa'b'ej li xkamk.
8“Mat-ok sa' junaq ochoch b'arwi' yo li ninq'ehik, maak'ojob' aawib' chi tzekank ut chi uk'ak sa' xyanqeb'. 9Xb'aan naq jo'ka'in ninye laa'in, li Nimajwal Yos, li xYos laj Israel: tinsach chixjunil li sahil ch'oolejil sa' li tenamit a'in chiru leeyu'am; maak'a'aq chik ninq'ehik ut b'ichank sa' li sumlaak.#16,9 Jr 7,34; 25,10; Ap 18,23. Laa'ex teeril rik'in leeru.
10“Naq taaseeraq'i chixjunil a'in reheb' li tenamit, te'xpatz' aawe: «K'a'ut naq li Qaawa' xtaqla chaq sa' qab'een li nimla rahilal a'in? K'aru li ink'a' us xqab'aanu? K'aru xqamaakon chiru li Qaawa' li qaYos?». 11Toja' naq taaye reheb': «Xb'aan naq kine'xtz'eqtaana eb' leena' leeyuwa' -chan li Qaawa'- ut koheb' xch'ool chirixeb' li jalanil yos; ke'xloq'oni ruheb' ut ke'k'anjelak chiruheb'. Kine'xtz'eqtaana laa'in ut ink'a' ke'xpaab' linchaq'rab' ink'ehom reheb'. 12Ut laa'ex q'axal yib' wi' chik ru xeb'aanu chiruheb' a'an, xb'aan naq li junjunq eere laa'ex naxb'aanu li maa'usilal li naraj xch'ool xb'aanunkil ut ink'a' ajwi' nikineepaab'. 13Jo'kan naq texwisi sa' li na'ajej a'in ut texxik sa' jun tenamit li ink'a' eenawom ru chi moko rilomeb' leena' leeyuwa', ut aran texk'anjelaq chiruheb' li jalanil yos, xb'aan naq ink'a' chik nawil xtoq'ob'aal eeru».
14“Ab'anan chalk re xkutankil naq ink'a' chik taayeemanq: «Loq'oninb'ilaq li Qaawa' li ki'isink chaq reheb' laj Israel sa' li tenamit Ejiipt», 15te'xye b'an chik: «Loq'oninb'ilaq li Qaawa' li xk'amok re laj Israel sa' li tenamit wan chaq sa' xjayal releb'l iq' ut sa' chixjunileb' li na'ajej b'arwi' kixcha'cha'iheb'».#16,14-15 Is 43,16-19; Jr 23,7-8. Laa'in teb'ink'am chaq wi' chik sa' li ch'och' ink'ehom reheb' li xxe'toonil yuwa'eb'.
16“Xb'enwa tintaqlaheb' chaq naab'al li poyanam chi xchapb'aleb' laj Israel, jo' na'uxk reheb' li kar; chirix chik a'an tintaqlaheb' chaq laj yo re xsik'b'aleb' sa'eb' li tzuul, sa' xb'eeneb' li b'ool ut sa'atqeb' li xloot' li pek#16,16 Hab 1,14-15. -chan li Qaawa'-. 17Xb'aan naq kutan saqenk chiwu chixjunil li xb'aanuhomeb', nawil li xmaakeb' ut nink'e reetal chi us li xmaa'usilaleb'. 18Ka'sut te'xtoj rix li xmaakeb' ut li maa'usilal xe'xb'aanu, xb'aan naq xe'xmux ru linna'aj rik'in xtz'i'b'eetal aj jalanil yos ut xe'xnujob'resi li ch'och' chi jo'maajo'il b'aanuhom”.
Xtij laj Jeremías
19At Qaawa', laa'at linkawilal ut li xkawub' linch'ool;
laa'at nakatkolok we naq wankin sa' rahilal.
Toj sa' xkaaxukuutil li ruuchich'och' te'chalq aawik'in
chixjunileb' li tenamit ut te'xye aawe:
“Relik chi yaal naq junes jalanil yos, maak'a' aj e ut maak'a'eb' xwankil
li ke'xloq'oni eb' li qana' qayuwa'.
20Ma naru naq li winq tixyiib' junaq xyos?
Moko yoseb' ta li xb'aanuhomeb' a'an”, cha'qeb'.
21“Jo'kan naq anaqwan tink'ut chiruheb'
linloq'al ut linwankil,
re naq te'xnaw naq Nimajwal Yos nink'ab'a'in”, chan li Qaawa'.
Currently Selected:
Jr 16: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
