Jr 14
14
Li xnimal chaqi'eel ut we'ej
1Li Qaawa' ki'aatinak rik'in laj Jeremías xb'aan xmajelal li ha', ut kixye re:
2“Judá yo chi yaab'ak xb'aan xrahil xch'ool;
yookeb' li kamk eb' li xtenamit
ut neke't'anaxink li poyanam chiru ch'och'.
Japjo re Jerusalén xb'aan li rahilal.#14,2 Is 3,26; Lm 1,4.
3Eb' li ninqeb' xwankil neke'xtaqla li xmooseb' chi sik'ok ha';
eb' a'in neke'xik wankeb' wi' li kumb', ut maak'a' li ha'.
Neke'sutq'iik chaq chi maak'a' xsa' li xkukeb';
sachsookeb' xch'ool ut tz'aptz'ookeb' li xjolomeb' sa' t'ikr xb'aan xxutaaneb'.
4X'atz'je'k li ch'och' xb'aan naq maak'a' li hab';
jo'kan naq xe'wiib'ank xch'ool eb' laj k'alom ut xe'xtz'ap li xjolomeb'.
5Ut eb' li kej, naq neke'alank,
neke'xkanab' li ral xjuneseb' sa' k'iche',
xb'aan naq maak'a' chik li pim re te'xwa'.
6Eb' li k'iche'il b'uur neke'xxaqab' rib' sa' xb'eeneb' li t'ojoch aj b'ool,
neke'xjiq' li iq' jo'keb' laj xojb',
moymoy aj chik xsa' li ruheb' xb'aan naq maak'a' chik li raxpim”.
7At Qaawa', us ta li xk'ihal li qamaak nokooxjit chawu,
tenq'aho sa' xk'ab'a' xnimal laarahom.
Relik chi yaal naq naab'al wa xqaq'etq'eti qib' ut xoomaakob'k chawu.
8Laa'at li xyo'oon laj Israel,
laa'at laj kolol qe sa' li rahilwank:
k'a'ut naq nakab'aanu aawib' chi jalan laatenamit sa' li na'ajej a'in?
Chanchanat laj numel b'e li nakanaak yal jun q'oqyink ajwi'.
9K'a'ut naq kama'at li winq sachenaq xna'leb'?
Jo'kat junaq aj puub' li ink'a' naruhank chi tenq'ank.
Ab'anan laa'at wankat sa' qayanq, at Qaawa',
ut laa'o laatenamit q'axtesinb'il aawe:
moohaakanab' qajunes anaqwan!
10Jo'ka'in kixye li Qaawa' chirix li tenamit Israel: “Li tenamit a'in q'axal nawulak chiru xb'eeninkil rib' yalaq b'ar; ink'a' neke'hilank junpaataq. Jo'kan naq moko sa ta sa' inch'ool chirixeb'. Anaqwan ok we chi xjultikankil li xmaakeb' ut tink'eheb' chi xtojb'al rix a'an”.
11Li Qaawa' kixye we: “Mattijok chiwu chirix li tenamit a'in. 12Us ta te'ayuuniq, ink'a' twab'i li xyaab' xkuxeb'. Us ta te'xq'axtesi we naab'al li k'atb'il mayej ut li xyeechi'omeb', ink'a' tink'ul chi sa sa' inch'ool, tinsach b'an ru li tenamit a'in rik'in q'esnal ch'iich', rik'in we'ej ut raxkamk”.
13Ut laa'in kinye: “At Qaawa' Yos, k'e reetal naq eb' li propeet yookeb' chi xyeeb'al reheb' li tenamit: «Ink'a' teeril yalok chi moko we'ej, tink'e b'an tuqtuukil usilal chi junajwa sa' li tenamit a'in», chankeb'”.
14Toja' naq li Qaawa' kixye we:
“B'alaq'ik yookeb' li propeet a'an sa' ink'ab'a'. Laa'in ink'a' xintaqlaheb' a'an, ink'a' xinchaq'rab'iheb' chi moko xin'aatinak rik'ineb'. Tik'ti' li neke'xye, b'alaq'il moy u, yal xk'a'uxeb' winq li maak'a' aj e: a'an a'in li neke'xye resil eere eb' li propeet a'an. 15Jo'kan naq laa'in, li Qaawa', ninye chi jo'ka'in chirixeb' li propeet a'an li neke'aatinak sa' ink'ab'a' us ta ink'a' xintaqlaheb', ut neke'xye naq ink'a' taawanq li raaxiik' chi moko li we'ej sa' li tenamit a'in: Eb' li propeet a'an te'kamq xb'aan li raaxiik' ut li we'ej. 16Ut eb' li tenamit a'an te'kanaaq chi t'ant'o sa'atqeb' li b'e re Jerusalén: te'kamq xb'aan li raaxiik' ut li we'ej, chi maajun taamuquq reheb', rochb'eeneb' li rixaqil ut eb' li ralal xk'ajoleb'. A' ajwi' li xmaa'usilaleb' tinq'aplusi sa' xb'eeneb'. 17Ye reheb' li tenamit li aatin a'in:
«Chi q'eq ut chi kutan ink'a' ninkanab' li yaab'ak
xb'aan li nimla rahilal yo xk'ulb'al lintenamit,
k'ajo' xnimal li xtiq'ilal!
18Wi ninxik sa' li k'aleb'aal,
nintaweb' li xe'kamsiik chi q'esnal ch'iich';
wi nin'ok sa' li tenamit, nawileb' li poyanam li kamkeb' re xb'aan li we'ej.
Ut eb' li propeet jo'wi' eb' laj tij
neke'chalk neke'xik sa' li tenamit chi sachsookeb' xch'ool»”.
19At Qaawa', ma xatz'eqtaana laj Judá chi junajwa?
Ma xattitz'k chi rilb'al li tenamit Sión?
K'a'ut naq xoohaatiq' chi ink'a' chik took'iraaq?
Xqoyb'eni wank sa' tuqtuukilal,
ut maak'a' junaq usilal xqataw.
Xqayo'oni li kawilal,
ut a' li xiwak xchalk sa' qab'een.
20At Qaawa', naqaxooto li qamaa'usilal
jo'wi' li xmaakeb' li qaxe' qatoon,
xb'aan naq xoomaakob'k chawu.
21Moohaatz'eqtaana sa' xk'ab'a' laarahom,
chi moko chatz'eq chirix laach'ool laaloq'laj k'ojarib'aal.
Jultikaq aawe laaSumwank qik'in
ut maasach xwankil a'an.
22Ma wank tab'i' junaq xyoseb' li najtil tenamit
li nataqlank chaq li hab'?
Ma nachalk tab'i' li musmus hab' sa' choxa yal xjunes rib'?
Ink'a', at Qaawa', at qaYos!
Laa'at nakattaqlank chaq re,
laa'at nakatb'aanunk re chixjunil a'an.
Jo'kan naq aawik'in nokoo'oyb'enink chi junelik.
Currently Selected:
Jr 14: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
