Gn 35

Laj Jakob kisutq'iik Betel

1Li Yos kixye re laj Jakob: “Xaqlin, taqen Betel ut kanaaqat aran. Toxaayiib' jun li artal cho'q re li Yos li kixk'utb'esi rib' chawu naq kat-elelik chiru laj Esaú laawas”.#35,1 Gn 28,11-17. 2Toja' naq laj Jakob kixye reheb' li wankeb' sa' rochoch jo' ajwi' reheb' chixjunil li rochb'een: “Isihomaq chixjunileb' li jalanil yos li wank eerik'in. Chech'ajob'resi eerib' ut jalomaq leeraq'. 3Yo'qeb' sa' junpaat sa' li na'ajej Betel, xb'aan naq aran toxinyiib' jun li artal cho'q re li Yos li kitenq'ank we sa' xq'ehil xrahilal linch'ool ut xinrochb'eeni sa' linb'eenik”.

4Eb' a'an ke'xq'axtesi re laj Jakob chixjunileb' li jalanil yos li wankatqeb' rik'ineb', jo'kan ajwi' li xka'xikeb'; ut laj Jakob kixmuqeb' rub'el li ji li wank chi xk'atq Sikem. 5Chirix chik a'an koheb', ut jun nimla xiw kikub'eek sa' xb'eeneb' li tenamit li wankeb' chi xsutam; jo'kan naq ink'a' ke'xtaaqe eb' li ralal laj Jakob.

6Laj Jakob kiwulak toj Lus, Betel ajwi' xk'ab'a', li wank sa' xteepal Kanahán, rochb'een chixjunileb' li yookeb' chi xik chirix. 7Aran kixyiib' jun li artal ut “Yos re Betel” kixk'e cho'q xk'ab'a' li na'ajej a'an, xb'aan naq aran li Yos kixk'utb'esi rib' chiru naq yo chi elelik chiru li ras. 8Sa'eb' li kutan a'an kikamk lix Débora, laj ilol re lix Rebeka, ut kimuqe'k rub'el jun li ji, chi xk'atq Betel. Laj Jakob kixk'e “xJihul li yaab'ak” cho'q xk'ab'a' li na'ajej a'an.

9Naq kisutq'iik chaq laj Jakob Padán-Aram, li Yos kixk'utb'esi wi' chik rib' chiru ut kirosob'tesi:

10“Laak'ab'a' laa'at a'an aj Jakob,

ab'anan ink'a' chik taak'ab'a'in Jakob,

aj Israel b'an chik taak'ab'a'in”,#35,10 Gn 32,28. chan li Yos.

Ut aj Israel kixk'e cho'q xk'ab'a'. 11Chirix chik a'an kixye:

“Laa'in li Nimajwal Yos.

Chiwanq aawalal aak'ajol ut chatk'ihanq.

Jun tenamit ut xk'ihaleb' li poyanam te'yo'laaq aawik'in,

ut wankeb' awab'ej te'elje'q aawik'in.

12Li ch'och' li xink'e re laj Abrahán ut re laj Isahak

tinq'axtesi aawe

jo' ajwi' reheb' laawalal aak'ajol chirix laakamik”.#35,11-12 Gn 17,4-8.

13Naq li Yos ki'elk sa' li na'ajej b'arwi' x'aatinak rik'in laj Jakob, 14a'in kixxaqab' jun li pek cho'q loq'laj eetalil. Kixhoy b'iin sa' xb'een ut kixyul chi aseeyt. 15Ut laj Jakob Betel kixk'e cho'q xk'ab'a' li na'ajej a'an b'arwi' x'aatinak li Yos.#35,14-15 Gn 28,18-19.

Xyo'lajik laj Benjamín ut xkamik lix Rakel

16Eb' a'an ke'elk Betel, ut kach'in chik maa neke'wulak Efratá, lix Rakel riil ki'alank. 17Sa' xrahil li alank kiyehe'k re xb'aan laj xokol k'uula'al: “Kawu aach'ool, xb'aan naq teelom ajwi' a'in!”. 18Ut sa' relik xch'ool, naq kamk re, lix Rakel kixk'e aj Ben-Oní cho'q xk'ab'a' li k'uula'al; ab'an li xyuwa' aj Benjamín kixk'e cho'q xk'ab'a'.

19Kikamk lix Rakel ut kimuqe'k sa' xb'ehil Efratá, Belén ajwi' nayeemank re. 20Sa' xb'een li xmuqleb'aal, laj Jakob kixxaqab' jun li pek cho'q loq'laj eetalil: a'an xpekul xmuqleb'aal lix Rakel li wank chalen toj anaqwan.

Li xmaak laj Rubén

21Laj Israel ki'elk aran ut koxyiib' li xmuheb'aal toj junpak'al Mikdal-Éder. 22Ut naq laj Israel wank sa' li na'ajej a'an, koho laj Rubén chi wark rik'in lix Bilhá, li rixaqil jun chik li xyuwa', ut laj Israel kixnaw a'an.

Eb' li ralal laj Jakob

(1 Kr 2,1-2)

23Eb' li ralal xk'ajol laj Jakob kab'lajuheb'. A'aneb' a'in li ralal li kiwank rik'in lix Liiy: laj Rubén, a' li xb'een ralal laj Jakob; laj Simehón, laj Leví, laj Judá, laj Isakar ut laj Sabulón. 24A'aneb' a'in li ralal li kiwank rik'in lix Rakel: laj José ut laj Benjamín. 25A'aneb' a'in li ralal li kiwank rik'in lix Bilhá, aj k'anjel chiru lix Rakel: laj Dan ut laj Neftalí. 26A'aneb' a'in li ralal li kiwank rik'in lix Silpá, aj k'anjel chiru lix Liiy: laj Gad ut laj Aser. A'aneb' a'in li ralal laj Jakob li ke'yo'laak chaq Padán-Aram.

Xkamik laj Isahak

27Laj Jakob kiwulak wan wi' laj Isahak li xyuwa', aran Mambré, Kiryat-Arbá ajwi' xk'ab'a' (Hebrón nayeemank re anaqwan), b'arwi' ke'wank laj Abrahán ut laj Isahak.#35,27 Gn 13,18. 28B'eleek'aal (180) chihab' wank re laj Isahak, 29naq ki'elk li xmusiq' ut kikamk: koxjunaji rib' rik'ineb' li xxe'toonil yuwa' chi ak tiix chi us ut xikenaq xhab'. Ut kimuqe'k xb'aan laj Esaú ut laj Jakob, eb' li ralal.

Currently Selected:

Gn 35: QQC

Highlight

Copy