Gn 34

Lix Dina kik'ehe'k sa' xutaan

1Lix Dina, xrab'in laj Jakob rik'in xLiiy, ki'elk re rilb'aleb' li rixqilal li tenamit. 2Laj Sikem, ralal laj Jamor aj Jib, aj jolominel re li na'ajej a'an, kiril lix Dina, kixk'am, kiwark rik'in ut kixmux li xtuq'ixqilal. 3Ab'anan xkoho xch'ool chirix lix Dina, xrab'in laj Jakob; kixra li ixqa'al ut kiraj xk'ojob'ankil xch'ool. 4Jo'kan naq laj Sikem kixye re laj Jamor li xyuwa': “K'am chaq cho'q wixaqil li ixqa'al a'an”.

5Kirab'i laj Jakob naq laj Sikem kixmux xtuq'ixqilal lix Dina li xrab'in, ab'an eb' li ralal wankeb' chaq sa' k'aleb'aal chi ilok ketomq; jo'kan naq maak'a' kixye toj sa' xk'ulunikeb' li ralal. 6Laj Jamor, xyuwa' laj Sikem, koho wan wi' laj Jakob re raatinankil.

7Naq eb' li ralal laj Jakob ke'rab'i li kik'ulmank, ke'sutq'iik chaq sa' xk'al ut ke'po'k li xch'ooleb'. K'ajo' naq ke'chalk xjosq'il, xb'aan naq nimla maak li kixb'aanu laj Sikem naq kiwark rik'in li xrab'in laj Jakob: a'an ink'a' naru xb'aanunkil! 8Laj Jamor kiraatinaheb' ut kixye: “Laj Sikem li walal xkoho xch'ool chirix leerab'in; jo'kan utan k'ehomaq re cho'q rixaqil. 9K'ehomaq leerab'in qe ut k'amomaqeb' li qe cho'q eere, ut qech'alalaq qib'. 10Kanaaqex qik'in: yamyo li ch'och' cho'q eere. Kab'lanqex, chexb'eeq arin ut eechanihomaq li na'ajej”, chan.

11Laj Sikem kixye re li xyuwa' li ixqa'al ut reheb' li ras: “Nintz'aama usilal cheru. Chekuyaq inmaak ut tink'e eere li teepatz' we. 12Xaqab'omaq xtz'aq linsumlajik, us ta q'axal terto, ut laa'in tink'e eere li teepatz' we. Ab'anan k'ehomaq li ixqa'al cho'q wixaqil”.

13Toja' naq eb' li ralal laj Jakob ke'xchaq'b'e sa' b'alaq'il laj Sikem ut laj Jamor li xyuwa'; ut jo'ka'in ke'xye re li kixmux xtuq'ixqilal lix Dina li ranab'eb': 14“Ink'a' naru tqab'aanu a'an: xk'eeb'al li qanab' re junaq li ink'a' setb'il xtz'uumal xtz'ejwal, xb'aan naq a'an xutaanal cho'q qe. 15Laa'o naru tqak'e eere, wi teeb'aanu li naqab'aanu laa'o, naraj naxye wi taasetmanq xtz'uumal xtz'ejwal chixjunileb' li teelom sa' eeyanq. 16Toja' naq tqak'e eere eb' li qarab'in ut laa'o toosumlaaq rik'ineb' leerab'in laa'ex; tookanaaq sa' eeyanq ut junajaqo aj chik chi tenamit eerik'in. 17Ab'anan wi ink'a' nokooheerab'i chirix xsetb'al xtz'uumal leetz'ejwal, tqak'am li qarab'in ut tooxik”, chankeb'.

18Laj Jamor ut laj Sikem, ralal laj Jamor, ke'xk'ulub'an xch'ool eb' li aatin a'in, 19ut li al sa' junpaat kixb'aanu a'an, xb'aan naq naxra li xrab'in laj Jakob. Nim xwankil laj Sikem chiru chixjunileb' li wankeb' sa' rochoch li xyuwa'; 20jo'kan naq a'an rochb'een laj Jamor koheb' sa' rokeb'aal li tenamit ut ke'raatinaheb' li rech tenamitul: 21“Eb' li winq a'in xe'chalk sa' tuqtuukilal -chankeb'-. Che'kanaaq sa' li qatenamit, che'b'eeq chi maajun taach'i'ch'i'inq reheb', xb'aan naq toj wank naab'al li ch'och' sa' li qana'aj cho'q reheb'. Qak'amaq li xrab'ineb' cho'q qixaqil ut tqak'eheb' li qe reheb'. 22Ab'anan eb' li winq a'in te'kanaaq sa' qayanq jo' junaq aj chik chi tenamit, ka'ajwi' wi tqab'aanu jo'eb' a'an: wi tqaset xtz'uumal li qatz'ejwal chiqajunilo li teelom. 23Eb' li xwakax, chixjunileb' li xketomq ut li k'aru wank reheb' tqeechani laa'o. Ab'anan qak'ulub'aq li raatineb' re naq te'kanaaq sa' qayanq”.

24Chixjunileb' li yookeb' chi nume'k sa' rokeb'aal li tenamit, ke'rab'i laj Jamor ut laj Sikem li ralal, ut ke'xset xtz'uumal xtz'ejwal chixjunileb' li teelom, jo'k'ihaleb' li neke'nume'k sa' rokeb'aal li tenamit.

Laj Simehón ut laj Leví ke'xk'e reeqaj li kixk'ul lix Dina

25Sa' rox li kutan, naq eb' a'an toj ra wankeb', laj Simehón ut laj Leví, ralaleb' laj Jakob ut raseb' lix Dina, ke'xchap li xch'iich'eb', ke'ok sa' li tenamit chi maak'a' xch'a'ajkilaleb' ut ke'xkamsi chixjunileb' li winq. 26Ke'xkamsi ajwi' laj Jamor ut laj Sikem chi ch'iich', ke'risi chaq lix Dina sa' rochoch laj Sikem ut koheb'. 27Ke'wulak ajwi' eb' li junch'ol chik li ralal laj Jakob, ke'nume'k sa' xb'eeneb' li kamenaq ut ke'relq'a li k'aru wank reheb' li poyanam li ke'xmux xtuq'ixqilal li ranab'. 28Kilaje'xchap eb' li ketomq, eb' li wakax, eb' li b'uur ut chixjunil li k'aru wank sa' li tenamit ut sa'eb' li k'aleb'aal: 29ke'xk'am chixjunil li xjunkab'laleb', eb' li xkok'al, eb' li ixq ut ke'relq'a chixjunil li wank sa' li rochocheb'.

30Toja' naq laj Jakob kixye reheb' laj Simehón ut laj Leví: “Laa'ex xineek'e sa' jun nimla rahilal ut xik' ilb'ilaqin xb'aaneb' li poyanam a'in, xb'aaneb' laj Kanahán ut eb' laj Perés. Ink'a' k'iheb' li neke'ochb'eenink we, ut wi eb' a'an te'xch'utub' rib' re yalok wik'in, tinsache'q laa'in jo'wi' chixjunil linjunkab'al”. 31Ab'anan eb' a'an ke'chaq'ok: “Ma us tab'i' naq xe'xk'am li qanab' jo' junaq aj yumb'eet?”, chankeb'.

Currently Selected:

Gn 34: QQC

Highlight

Copy