Gn 33

Ke'xk'ul rib' laj Esaú ut laj Jakob

1Laj Jakob kixtaqsi li rilob'aal ut kiril naq laj Esaú yo chi chalk rochb'eeneb' jun o'q'ob' (400) chi winq. Toja' naq kixq'axtesiheb' li kok'al sa' ruq' lix Liiy, sa' ruq' lix Rakel ut sa' ruq'eb' li wiib' chi ixq aj k'anjel chiruheb'. 2Kixk'eheb' li wiib' chi ixq chi uub'ej rochb'eeneb' li xkok'al; chirixeb' a'an kixk'e lix Liiy rochb'eeneb' li xkok'al ut, sa' xmaril, kikanaak lix Rakel rochb'een laj José. 3Chirix chik a'an koho chi uub'ej ut kixwiq'ib' rib' wuqub' sut toj reetal kiwulak wan wi' li ras. 4Ab'an laj Esaú ki'aanilak chi xk'ulb'al, kixq'alu chi xkux, kixtz'ub' ru ut kiyaab'ak. 5Tikto kixtaqsi li rilob'aal ut, naq kirileb' li ixq ut eb' li xkok'al, kixye: “Aniheb' a'in li neke'ochb'eenink aawe?”. “A'aneb' li ralal laj k'anjel chawu li ke'k'ehe'k re xb'aan li Qaawa'”, chan laj Jakob.

6Toja' naq ke'jilok chaq eb' li ixq rochb'eeneb' li xkok'al ut ke'xwiq'ib' rib' chiru laj Esaú. 7Kinach'ok ajwi' lix Liiy rochb'eeneb' li xkok'al ut ke'xwiq'ib' rib'; moqon chik kijilok chaq laj José ut lix Rakel, ut ke'xwiq'ib' ajwi' rib' chiru.

8Toja' naq kixpatz' laj Esaú: “K'a' aj e li k'iila ketomq a'in li xink'uleb' sa' b'e?”. Kichaq'ok laj Jakob: “Re tintaw usilal chiru linqaawa'”, chan re. 9Ab'an laj Esaú kixye: “At wiitz'in, tz'aqal wank we: aawehaq chixjunil li k'aru aawe”. 10Kichaq'ok laj Jakob: “Maamin b'i'an. Wi xintaw usilal chawu, k'ul li maatan ninyeechi'i aawe, xb'aan naq xinaak'ul sa' usilal: chanchan xwil ru li Yos naq xatwil. 11K'ul b'i' li maatan xink'am chaq cho'q aawe: li Yos xinrosob'tesi ut numtajenaq li k'aru we”, chan. Ut kirelaji ru toj reetal laj Esaú kixk'ul li xmaatan.

Laj Jakob kixjek' rib' rik'in laj Esaú

12Chirix chik a'an kixye laj Esaú: “Elqo arin, tatwochb'eeni laa'in”. 13Kichaq'ok laj Jakob: “Linqaawa' naxnaw naq toj kok'eb' linkok'al, ut wankeb' inkarneer ut wakax li toj yookeb' chi tu'resink: wi tinlub'tesiheb' chiru jun kutan, te'kamq chixjunileb' linketomq. 14K'amolb'ehaq b'i' linqaawa' chiru laj k'anjel chawu, ut tinxik laa'in timil jo' neke'b'eek linketomq li wankeb' chi uub'ej, jo'wi' eb' li kok'al, toj reetal tinwulaq wan wi' linqaawa', aran Seír”, chan. 15Kixye laj Esaú: “Tinkanab'aq aawik'in wiib' oxib'aq li neke'ochb'eenink we”. Kichaq'ok laj Jakob: “K'a' aj e? Tz'aqalaq rik'in naq usilal xintaw chiru linqaawa'”, chan.

16Sa' ajwi' li kutan a'an laj Esaú kisutq'iik Seír. 17Ut laj Jakob koho Sukot: aran kixyiib' xmuheb'aal jo'wi' naab'al li kuukil ochoch cho'q reheb' li xketomq. Xb'aan a'an Sukot kixk'e cho'q xk'ab'a' li na'ajej a'an.

Laj Jakob kiwulak Sikem

18Naq ki'elk chaq Padán-Aram, laj Jakob kiwulak Sikem chi maak'a' kixk'ul, ut kihilank sa' xka'yab'aal li tenamit, sa' xteepal Kanahán. 19Chiru o'k'aal chi tumin plaat kixloq' jun siir li ch'och'#33,19 Jos 24,32; Jn 4,5. rik'ineb' li ralal laj Jamor, xyuwa' laj Sikem, ut aran kixyiib' li xmuheb'aal. 20Chirix chik a'an kixwaklesi jun li artal, ut “El, xYos laj Israel” kixk'e cho'q xk'ab'a'.

Currently Selected:

Gn 33: QQC

Highlight

Copy