Gn 32

1Laj Jakob kixchap xb'e ut eb' li x'ánjel li Yos ke'elk chaq chi xk'ulb'al. 2Naq kirileb', kixye laj Jakob: “A'an a'in xna'aj li Yos”, chan; ut Majanáhin kixk'e cho'q xk'ab'a' li na'ajej a'an.

Laj Jakob kixkawresi rib' chi xk'ulb'al laj Esaú

3Laj Jakob kixtaqlaheb' xtaql chi uub'ej rik'in laj Esaú li ras, sa' li na'ajej Seír, sa' xteepal Edom, 4ut kixchaq'rab'iheb' chi jo'ka'in: “Cheyehaq re linqaawa' Esaú: «Jo'ka'in xye chaq laj Jakob laj k'anjel chawu: Xinwank chaq jun k'amok rik'in laj Labán ut aran xinb'ayk chaq chalen toj anaqwan. 5Xweechani chaq eb' li b'ooyx, b'uur, karneer, winq ut ixq aj k'anjeleb' chiwu; ut anaqwan xintaqla xyeeb'al resil aawe, at inqaawa', re naq chinaak'ul sa' usilal», cha'qex re laj Esaú”.

6Naq eb' li taql ke'sutq'iik chaq rik'in laj Jakob, ke'xye re: “Xoowulak rik'in laj Esaú laawas, ut a'an chalk re chak'ulb'al rochb'eeneb' jun o'q'ob' (400) chi winq”.

7K'ajo' naq kixiwak laj Jakob ut ki'ok xk'a'uxl! Kixjek'iheb' li rochb'een jo' ajwi' eb' li xkarneer, li xwakax ut eb' li xkameey, ut kixk'eheb' sa' wiib' na'ajej: 8“Wi laj Esaú taachalq chi yalok rik'in li jun ch'uut, te'kole'q li jun ch'uut chik”, chan.

9Chirix chik a'an laj Jakob kixye: “At xYos linyuwa' Abrahán ut xYos linyuwa' Isahak, at Qaawa' li xaye we: «Sutq'in sa' laana'aj, sa' laatenamit, ut laa'in chaab'ilaqin aawik'in», 10moko ink'ulub' ta xk'ulb'al laawusilal ut laachaab'ilal li xak'ut chiwu laa'in aj k'anjelin chawu! Xb'aan naq ka'ajwi' linxuq' wan chaq we naq kinnume'k junxil sa' li nima' Jordán, ut anaqwan wiib' siir kab'al wank we. 11Chinaakol taxaq sa' ruq' li was, sa' ruq' laj Esaú, xb'aan naq ninxiwa ru: mare anchal taachalq ut tinxsach wochb'eeneb' li ixq ut eb' li kok'al. 12Laa'at xatyehok we: «Relik chi yaal naq chaab'ilaqin aawik'in. Tink'eheb' chi k'ihank laawalal aak'ajol: jo'aqeb' li samahib' chire li palaw li ink'a' naru rajlankil xb'aan xk'ihal»,#32,12 Gn 22,17. chankat we”, chan laj Jakob.

13Laj Jakob kixnumsi li q'oqyink aran. Moqon chik, sa' xyanq li jo'ch'inal jo'nimal wank chiru, kixchap jun maatan li tixk'e re laj Esaú li ras: 14lajeek'aal (200) chi ixqi chib'aat ut junmay chi teelom chib'aat, lajeek'aal chi ixqi karneer ut junmay chi teelom karneer. 15Lajeeb' xka'k'aal chi kameey li yookeb' chi k'iiresink, rochb'eeneb' li ral; ka'k'aal chi ixqi wakax ut lajeeb' li teelom, junmay ixqi b'uur ut lajeeb' li teelom, 16ak xch'uut xch'uut li junjunq, ut kixk'eheb' reheb' laj k'anjel chiru: “Q'axonqex chiwu, ak xyanq xyanq li junjunq chi ch'uut teekanab'”, chan reheb'.

17Ut kixye re li xb'een aj k'anjel chiru: “Naq taak'ul laj Esaú li was sa' b'e ut a'an tixpatz' aawe: «Ani laj eechal aawe ut b'ar yookat chi xik? Ani aj e li ketomq a'in li yookat chi xk'amb'al?», 18taaye re: «Re laj Jakob laj k'anjel chawu: a'in jun maatan cho'q re linqaawa' Esaú. Ut a'an yo chaq chi chalk chiqix», cha'qat re”.

19Jo'kan ajwi' kixye re li xkab'il, re li roxil ut reheb' chixjunil li yookeb' chi xik chirixeb' li xketomq: “Jo'ka'in teeraatina laj Esaú naq teek'ul. 20Teeye ajwi' re: «Laj Jakob laj k'anjel chawu yo chaq chi chalk chiqix», cha'qex re”.

Xb'aan naq laj Jakob naxye sa' xch'ool: “Xb'enwa tinq'unb'esi li was rik'in li maatan a'in, k'amol b'e chiwu. Toja' naq tin'aatinaq rik'in: mare anchal tinxk'ul sa' usilal”. 21Jo'kan naq kixtaqla li maatan chi uub'ej ut kixnumsi li q'oqyink sa' xmuheb'aal.

Laj Jakob kixyal xmetz'ew rik'in li Qaawa' Yos

22Chiru li q'oqyink a'an kiwakliik laj Jakob, kixk'am chi xkab'ichaleb' li rixaqil, jo'wi' chi xkab'ichaleb' li ixq aj k'anjel chiruheb' ut eb' li xjunlaju chi ralal, ut kiq'axonk junpak'al li nima' Yabok. 23Kixk'ameb' ut kixk'eheb' chi q'axonk junpak'al li ha'; jo'kan ajwi' kixnumsi chixjunil li k'aru wank re.

24Naq kikanaak xjunes laj Jakob, jun li winq kixyal xmetz'ew rik'in toj reetal kihik'e'k. 25Ab'an kiril naq ink'a' naxq'ax ru; jo'kan naq kixtoch' li rich'mul xb'aqel li ra' laj Jakob, ut kib'oq'e'k xb'aqel li ra' naq yo chi xyalb'al xmetz'ew. 26Kixye li winq: “Ach'ab'in, xb'aan naq ak saqewk re”. Kichaq'ok laj Jakob: “Ink'a' tatwach'ab' toj reetal tinaawosob'tesi”, chan.

27Toja' naq li winq kixpatz': “Ani aak'ab'a'?”. Naq laj Jakob kixye li xk'ab'a', 28li winq kixye: “Chalen anaqwan ink'a' chik taak'ab'a'in aj Jakob, aj Israel b'an chik laak'ab'a'. Xb'aan naq xayal laametz'ew rik'in li Yos ut rik'ineb' li winq, ut xatq'axok u”.#32,28 Gn 35,10. 29Kixpatz' laj Jakob: “B'aanu usilal, ye we laak'ab'a'”, chan. Ab'an li winq kixye: “K'a' aj e naq nakapatz' link'ab'a'?”. Ut kirosob'tesi aran.

30Laj Jakob kixk'e cho'q xk'ab'a' li na'ajej a'an Penuel, xb'aan naq kixye: “Xwil ru li Yos ut xkole'k linyu'am”.#32,22-30 Sab 10,10-12. 31Yo chi elk li saq'e naq laj Jakob ki'elk sa' li na'ajej Penuel; ab'an nayeeqan aj chik li ra'. 32Jo'kan naq eb' laj Israel chalen toj anaqwan ink'a' neke'xtzeka li rich'mul xb'aqel ra' li xul, li wank sa' xtiqilal li ra', xb'aan naq kitoch'e'k li rich'mul xb'aqel li ra' laj Jakob.

Currently Selected:

Gn 32: QQC

Highlight

Copy