Gn 31
31
Ki'elelik laj Jakob
1Laj Jakob kirab'i resil naq eb' li ralal laj Labán yookeb' chi xyeeb'al: “Laj Jakob x'eechanink re chixjunil li k'aru re li qayuwa' ut rik'inatq a'an xnumtaak li xb'ihomal”. 2Kixk'e reetal ajwi' naq ink'a' chik sa na'ile'k xb'aan laj Labán. 3Toja' naq li Qaawa' kixye re laj Jakob: “Sutq'in sa' rochoch laana' laayuwa', sa' laatenamit, ut laa'in wanqin aawik'in”.
4Laj Jakob kixtaqla xb'oqb'al lix Rakel ut xLiiy re naq te'chalq sa' li k'aleb'aal b'arwi' yo chi rilb'al li xketomq; 5ut kixye reheb': “Xink'e reetal naq leeyuwa' ink'a' chik sa nikinril; ab'anan li xYos linyuwa' wank wik'in. 6Laa'ex nekenaw chanru xink'anjelak chiru leeyuwa' chi anchal inch'ool; 7ut a'an xinxb'alaq'i ut lajeeb' sut xjalaxi lintojb'al. Ab'an linYos xinxtenq'a, ut leeyuwa' ink'a' xru xb'aanunkil li ink'a' us we. 8Wi a'an nayehok: «Laatojb'al a'anaqeb' li wakax tzipix rixeb'», toja' naq chixjunileb' li ral li wakax junes tzipix rixeb' naq neke'yo'laak. Ut wi naxye: «Laatojb'al a'anaqeb' li raqax rixeb'», toja' naq chixjunileb' li ral li karneer junes raqax chik rixeb' naq neke'yo'laak. 9Jo'ka'in naq li Yos xmaq' li xketomq leeyuwa' ut xk'e we laa'in.
10“Sa' jun kutan, sa' xq'ehil naq neke'b'atz'unk li ketomq, xintaqsi li wilob'aal ut sa' linmatk' xwil naq chixjunileb' li teelom neke'b'atz'unk rik'ineb' li ixqi karneer junes raqax, tzipix ut ch'ulakeb' li rixeb'. 11Toja' naq xwab'i xyaab' xkux li x'ánjel li Yos sa' linmatk': «At Jakob!», chan we. Xinchaq'ok: «We'kin». 12Ut a'an xye we: «Taqsi laawilob'aal ut k'e reetal naq chixjunileb' li teelom karneer li neke'b'atz'unk junes raqax, ch'ulak ut tzipix rixeb'. Xb'aan naq xwil chixjunil li xb'aanu aawe laj Labán. 13Laa'in li Yos li xink'utb'esi chaq wib' chawu Betel, b'arwi' xayul chi aseeyt li xaqab'anb'il pek naq xaye laawaatin rik'in jurament.#31,13 Gn 28,18-22. Xaqlin anaqwan, elen sa' li na'ajej a'in ut sutq'in sa' li tenamit xatyo'laak wi'»”.
14Toja' naq ke'chaq'ok lix Rakel ut lix Liiy: “Ma toj wank tab'i' k'a'aq re ru qe sa' rochoch li qayuwa' malaj qeechanihom? 15Ma ink'a' tab'i' kama' li ab'l aj chik naq nokooril, xb'aan naq xooxk'ayi ut xlow li qatz'aq? 16Jo'kan naq chixjunil li xb'ihomal li qayuwa' li xmaq'e'k xb'aan li Yos, a'an qe chik laa'o ut reheb' li qalal qak'ajol. B'aanu b'i' chixjunil li xye aawe li Yos”, chankeb' li ixq.
Laj Jakob koho aran Padán-Aram
17-18Kixaqliik laj Jakob ut kixtaqsiheb' li ralal ut eb' li rixaqil chirixeb' li kameey, re xik wan wi' laj Isahak li xyuwa' aran Kanahán. Kixk'am ajwi' chixjunil li xjunkab'lal ut eb' li ketomq li reechanihom chaq Padán-Aram. 19Sa' li kutan a'an, naq laj Labán yo chaq chi xb'esb'aleb' rix li xkarneer, lix Rakel kirelq'a li xkok' yoseb' li xyuwa'. 20Laj Jakob ink'a' kixye resil re laj Labán aj Aram naq elk re, 21ut koho sa' muqmu rochb'een chixjunil li k'aru wank re. Kiq'axonk junpak'al li nima' Éwfrates ut koho sa' xjayal li xtzuulul Galahad.
Laj Labán koxtaw laj Jakob
22Sa' rox li kutan laj Labán kirab'i resil naq laj Jakob x'elelik. 23Kixch'utub'eb' li rech'alal ut kixtaaqe laj Jakob chiru wuqub' kutan, toj reetal koxtaw sa' li xtzuulul Galahad. 24Ab'anan chiru li q'oqyink a'an li Yos kixk'utb'esi rib' chiru laj Labán sa' xmatk' ut kixye re: “K'e reetal, mat-aatinak sa' josq'il rik'in laj Jakob”.
25Laj Labán koxtaw laj Jakob naq yo chi hilank chiru tzuul. Toja' naq laj Labán kixxaqab' li xmuheb'aal aran, sa' li xtzuulul Galahad, rochb'eeneb' li rech'alal, 26ut kixye re laj Jakob: “K'aru xab'aanu? K'a'ut naq xinaab'alaq'i? Xak'ameb' chaq linrab'in chanchaneb' wi' li preex. 27K'a'ut naq xat-elelik sa' muqmu? Xinaab'alaq'i ut maak'a' xaye we. Laa'in xatinchaq'rab'i raj sa' sahil ch'oolej, b'ichank ut wajb'ak. 28A'ut laa'at chi moko xinaakanab' chi xtz'ub'aleb' ru li walal ut eb' linrab'in. Naraj naxye, xmaak'a'il aana'leb' xab'aanu wi' a'in. 29Wank inwankil re xb'aanunkil aawe li ink'a' us, ab'an li xYos laayuwa' xye we ewer chi q'eq: «K'e reetal, mat-aatinak sa' josq'il rik'in laj Jakob». 30Ninnaw naq laa'at xat-elelik xb'aan naq xawaj ru xik sa' rochoch laayuwa'; ab'anan k'a'ut naq xawelq'aheb' chaq linkok' yos?”.
31Kichaq'ok laj Jakob ut kixye re laj Labán: “Xinxiwak, xink'oxla naq mare anchal taamaq'eb' chiwu laarab'in. 32Ab'anan li ani taataweb' wi' laakok' yos, ink'a' chikole'q li xyu'am! Chiruheb' li qech'alal naru taasik' li k'aru aawe wank wik'in ut chak'amaq”. Laj Jakob ink'a' naxnaw naq lix Rakel ki'elq'ank reheb' li kok' yos.
33Ki'ok laj Labán sa' xmuheb'aal laj Jakob ut lix Liiy, sa' xmuheb'aaleb' ajwi' li wiib' chi ixq aj k'anjel chiruheb', ut maak'a' kixtaw. Ki'elk sa' xmuheb'aal lix Liiy ut ki'ok sa' xmuheb'aal lix Rakel. 34Ab'an lix Rakel kixokok chaq re li kok' yos, kixmuq rub'el li k'ojarib'aal wank chirix li kameey ut kik'ojlaak sa' xb'een. Naq laj Labán kixpoqle chixjunil li muheb'aal, maak'a' kixtaw. 35Toja' naq kixye lix Rakel re li xyuwa': “Ink'a' chijosq'o'q linyuwa' naq ink'a' tinxaqliiq chiru, xb'aan naq xintikib' xk'ulb'al li naqak'ul laa'o ixq”, chan. Jo'kan naq laj Labán kixpoqle chixjunil li muheb'aal ut ink'a' kixtaweb' li xyos.
36Q'axal kijosq'o'k laj Jakob chiru laj Labán, kixch'iila ut kixye re: “K'aru linmaak? K'aru xinmaakob'k wi' naq nikinaataaqe chaq sa' josq'il? 37Naq xapoqle chixjunil li k'a'aq ru we, k'aru re laajunkab'al xataw arin? K'e arin chiruheb' li wech'alal ut chiruheb' laawe: a'anaqeb' aj raqol aatin chiqix qakab'ichal. 38Junmay chihab' wokik chi k'anjelak aawik'in: eb' laakarneer ut eb' laachib'aat maajun wa ke'xtz'eq li ral, ut eb' li xteelomil laaketomq maajun xintzeka laa'in. 39Maajun wa xink'am chaq aawik'in junaq laaketomq kamsinb'il xb'aaneb' li josq' aj xul: junelik xink'e reeqaj a'an ut laa'at xapatz' we aatojb'al xb'aan li xe'relq'a chi q'eq malaj chi kutan. 40Chi kutan xinkuy xtiqwal li saq'e li natawasink we, ut chiru q'oqyink xinkuy li ke naq tik ink'a' nakub'eek inwara xb'aan a'an. 41Jo'ka'in naq xinwank chiru junmay chihab' sa' laawochoch: kaalaju chihab' xink'anjelak chirixeb' laawiib' chi rab'in ut waqib' chihab' chirixeb' laaketomq. Lajeeb' sut xajalaxi lintojb'al! 42Wi ta li xYos laj Abrahán ut li xYos laj Isahak linyuwa' ink'a' xinxtenq'a, relik chi yaal naq xinaataqla raj chaq anaqwan chi maak'a' wank we. Ab'anan li Yos xril xtoq'ob'aal wu ut lintawajik, ut ewer chi q'eq xatxq'us”, chan laj Jakob.
Li sumwank li ke'xk'ojob' laj Labán ut laj Jakob
43Kichaq'ok laj Labán ut kixye re laj Jakob: “Eb' li ixq a'in inrab'ineb'. Weheb' ajwi' eb' li kok'al ut eb' li karneer a'in: we chixjunil li jo'ch'inal jo'nimal nakawil. Ut k'aru truuq tinb'aanu cho'q reheb' linrab'in a'in malaj reheb' li kok'al li xe'xk'e we? 44Kim b'i', ut qaxaqab'aq jun sumwank qakab'ichal li taach'olob'anq li yaal chiqix”.
45Toja' naq laj Jakob kixxok jun li pek ut kixxaqab' cho'q loq'laj eetalil. 46Ut kixye reheb' li rech'alal: “Xokomaq chaq naab'al li pek”. Chixjunileb' ke'xokok chaq pek, ke'xtuub' aran ut ke'tzekank sa' xb'eeneb' li tuub'anb'il pek. 47Laj Labán kixk'e Yegar-Sahadutá cho'q xk'ab'a' li na'ajej a'an; ut laj Jakob Galed kixk'e cho'q xk'ab'a'.
48Toja' naq kixye laj Labán: “Li tub'tuukil pek a'in nach'olob'ank li yaal chiqix anaqwan”. Jo'kan naq Galed kixk'ab'a'in; 49Mispá ajwi' xk'ab'a' li jun tuub' chi pek a'an, xb'aan naq kixye laj Labán: “Li Qaawa' taxaq chik'aak'alenq qe naq tqajek' qib'. 50Wi laa'at taarahob'tesiheb' linrab'in, wi taak'am jalaneb' chik ixq chirixeb' a'in, us ta maajun yooq chi qilb'al, a' taxaq li Yos chiyehoq li yaal chiqix qakab'ichal”.
51Kixye wi' chik laj Labán re laj Jakob: “Waye' li jun tuub' chi pek a'in ut li loq'laj eetalil li xinxaqab' sa' qayanq qakab'ichal. 52A'an reetalil naq laa'in ink'a' naru tinq'axonq wankat wi', chi moko laa'at truuq tatnume'q arin re xb'aanunkil junaq na'leb' ink'a' us. 53Li xYos laj Abrahán ut li xYos laj Najor chiraqoq taxaq aatin sa' qab'een”.
Toja' naq laj Jakob kixye xjurament sa' xk'ab'a' li Yos naloq'oniik xb'aan laj Isahak li xyuwa'. 54Chirix chik a'an laj Jakob kimayejak chiru li Qaawa' sa' xb'een li tzuul ut kixb'oqeb' li rech'alal chi tz'aqonk. Eb' a'an ke'tz'aqonk ut ke'xnumsi li q'oqyink aran.
55Eq'la chi us laj Labán kixtz'ub' ruheb' li xkok'al ut eb' li xrab'in, kirosob'tesiheb' ut kisutq'iik sa' li xtenamit.
Currently Selected:
Gn 31: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
