Mateo 1

Quisocristo shimashonënpita

(Lucas 3.23-38)

1Quisocristo nanamën shaꞌhuitaranquëmaꞌ. Inasoꞌ Yosë huiꞌnin. Iráca quëran huarëꞌ Yosë yonquirin ina aꞌpaimacaso marëꞌ. Tapico chachin Quisocristo shimashonën. Apraancontaꞌ shimashonën chachin. Yaꞌipi shimashonënpita iráca yaꞌhuëpisoꞌ shaꞌhuichinquëmaꞌ, nitotocoꞌ.

2Iráca Apraan huiꞌnahuanpachina, Isaco itopi. Ina quëran Isacontaꞌ huiꞌnahuanpachina, Cacopo itopi. Cacoposoꞌ naꞌa huiꞌninpita yaꞌhuëtërin. Aꞌnasoꞌ Cota itopi. 3Cotantaꞌ huiꞌnahuanpachina, Parisë, Saro, inapita itopi. Tamara huaꞌhuinpita inahuasoꞌ. Ina quëran Parisë huiꞌnahuanpachina, Isromo itopi. Inantaꞌ huiꞌnin yaꞌhuëtohuachina, Aramo itopi. 4Aramontaꞌ huiꞌnahuanpachina, Aminatapo itopi. Ina huiꞌnin Nasono itopi. Nasonontaꞌ huiꞌnahuanpachina, Sarëmon itopi. 5Sarëmon yasaꞌapachina, Nacapa manin. Huiꞌnin yaꞌhuëtohuachina, Pooso itopi. Poososoꞌ Rota macaton, huiꞌnahuanin. Opito itopi. Opitontaꞌ huiꞌnahuanpachina, Quisi itopi. 6Quisintaꞌ huiꞌnahuanpachina, Tapi itopi. Inasoꞌ copirno yaꞌconin. Ina quëran Oriasëcoꞌ saꞌin masahuaton, huiꞌnahuanin. Saromon itopi.

7Saromon huiꞌnin Nopoamo itopi. Ina huiꞌnin Apiasë itopi. Apiasëntaꞌ huiꞌnahuanpachina, Asa itopi. 8Asa huiꞌnin Cosahuato itopi. Cosahuatontaꞌ huiꞌnahuanpachina, Coramo itopi. Ina huiꞌnin Osiasë itopi. 9Osiasëntaꞌ huiꞌnahuanpachina, Cotamo itopi. Ina huiꞌnin Acaso itopi. Acasontaꞌ huiꞌnahuanpachina, Isiquiasë itopi. 10Ina huiꞌnin Manasisë itopi. Inantaꞌ huiꞌnahuanpachina, Amon itopi. Amon huiꞌnin Cosiasë itopi. 11Ina huiꞌnin Quiconiasë itopi. Iinpitantaꞌ yaꞌhuërin. Naporoꞌ cotioroꞌsasoꞌ, inimicoroꞌsari Papironia quëran huëcatonaꞌ, canaipi. Minsërahuatonaꞌ, napopinchin yaꞌhuëpiꞌpaꞌ quëpapi asacatacaiso marëꞌ.

12Ina piquëran Quiconiasë huiꞌnahuanpachina, Saratiri itopi. Ina huiꞌnin Soropapiri itopi. 13Inantaꞌ huiꞌnahuanpachina, Apioto itopi. Apioto huiꞌnin Iriaquimo itopi. Ina huiꞌnin Asoro itopi. 14Asorontaꞌ huiꞌnahuanpachina, Satoco itopi. Satoco huiꞌnin Aquimo itopi. Ina huiꞌnin Irioto itopi. 15Iriotontaꞌ huiꞌnahuanpachina, Iriasaro itopi. Iriasaro huiꞌnin Matan itopi. Ina huiꞌnin Cacopo itopi. 16Cacopontaꞌ huiꞌnahuanpachina, Cosi itopi. Cosi yasaꞌapachina, Maria manin. Ina huaꞌhuinsoꞌ Quisoso, Cristo itopisoꞌ.

17Nani Quisocristo shimashonënpita shaꞌhuitëranquëmaꞌ. Apraan quëran Tapi copirno yaꞌconaquë huarëꞌ shonca catapini shimashonënpita yaꞌhuëtërin. Ina quëran Papironiaquë quëpai huarëꞌ shonca catapini shimashonënpita ninshitantaranquëmaꞌ. Ina quëran Quisocristo nasitaquë huarëꞌ, shonca catapini chachin shimashonënpita ninshitantaranquëma huachi.

Quisocristo nasitërinsoꞌ

(Lucas 2.1-7)

18Apira Quisocristo nasitërinsoꞌ shaꞌhuichinquëmaꞌ, nitotocoꞌ. Naporo tahuëriꞌsaꞌ Cosisoꞌ, nani Maria nontërin macacaso marëꞌ. Napoaponahuëꞌ coꞌhuara mashatërasohuëꞌ, Ispirito Santo nohuanton inaora cayorin. 19Cosi nitotahuaton, paꞌyanin. Noya quëmapi niꞌton, yonquiarin. “¿Maꞌcha onpoꞌiya? Maria nani huaꞌhua maꞌpatërin. Co macaꞌhuasoꞌ yaꞌhuërinhuëꞌ. Co piyapiꞌsaꞌ shaꞌhuitarahuëꞌ, Maria tapanpachin. Coisëichin shaꞌhuitahuato, co masarahuëꞌ,” taꞌton, yonquirárin. 20Huëꞌësoꞌ, Yosë anquëninëni yaꞌnotimarin nontacaso marëꞌ.

—Tashita Cosi. Carinquën nohuitëranquën. Quëmasoꞌ Tapicoꞌ shinquën. Piꞌpian shaꞌhuitaponquën oꞌmarahuë. Maria noya maquëꞌ. Co quëmapiri sëꞌhuarinhuëꞌ. Ispirito Santo nohuanton, inaora cayorin. Napoaton noya maquëꞌ. 21Huaicasoꞌ nanihuachin, quëmapiaꞌhuaya nasitapon. Nasitohuachin, Quisoso itëquëꞌ. Piyapinënpita oshanënaꞌ inquitaton, nichaꞌësarin niꞌton, ina nininën acotëquëꞌ, itërin anquëniri. Itahuaton, panantarin huachi.

22Iráca Yosë nohuanton, pënëntonaꞌpi ninorin. Ninoton, Yosë quiricanënquë chachin ninshitërin:

23“Aꞌna tahuëri nanon inaora cayoapon.

Co quëmapiri sëꞌhuapirinhuëꞌ, napoapon.

Quëmapiaꞌhuaya huaihuachin, Imanino itapi,” tënin.

Yosë chachin oꞌmaton, yacaparinpoaꞌ, tapon naporin. Ina pochin nasitimahuachina, iráca ninopisoꞌ nanirin huachi.

24Cosisoꞌ capayatahuaton, Sinioro anquëninën natëton, Maria manin huachi. 25Macaponahuëꞌ, co ichihuëꞌërinhuëꞌ. Huaꞌhuin nasitërin piquëran huarëꞌ ichihuëꞌërin. Quëmapiaꞌhuaya nasitohuachina, Quisoso itopi.

Currently Selected:

Mateo 1: cbt

Highlight

Copy