Malaquías 4
4
1Naquëranchin Sinioro shaꞌhuitaantarinpoaꞌ: “Caso Sinioroco yaꞌipi nanitapato shaꞌhuitaranquëmaꞌ: ‘Niꞌcoꞌ. Co huaꞌquiya quëranhuëꞌ, anaꞌintaꞌhuaso tahuëri naniarin. Ina tahuëri nanihuachin, ornoquë pën huënaratërinso pochin nisarin. Nocantopisopita, co noyahuëꞌ nipisopita, yaꞌipi inapita anaꞌintarahuë. Panca pënquë shinpitë aꞌnaroáchin huëyarinso pochin co noyahuëꞌ nipisopita anaꞌintarahuë. 2Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ. 3Anaꞌintaꞌhuaso tahuëri nanihuachin, canpitaso piyapinëhuëpitanquëma nicatomaꞌ, co noyahuëꞌ nipisopita minsëaramaꞌ. Nonëna huiquitërinso yanonën, toꞌpi toꞌpitapomaꞌ,’ itëranquëmaꞌ,” tënin.
Tiquiapon pochin pënëninsoꞌ
4Tiquiapon pochin Siniorosoꞌ pënëntaton: “Piyapinëhuë Moisësë itopisoꞌ, Sinai motopiquë pënëntërahuësoꞌ aninshitërahuë. Ama ina naniantatomarahuëꞌ, yonquiráco. Inaquë nanamëhuë, camaitërahuësopita, inapita israiroꞌsanquëma natëcamaso marëꞌ quëtëranquëmaꞌ.
5Niꞌcoꞌ. Anaꞌintaꞌhuaso tahuëri nanihuachin, paꞌpi huëhuëpiro nisarin. Coꞌhuara ina tahuëri naniátërasohuëꞌ, Iniasë pënëntonaꞌpi aꞌpataranquëmaꞌ. 6Ina pënëntohuachin huiꞌnahuanoꞌsasoꞌ, huiꞌninapitarëꞌ noya ninicatona yaꞌhuëantaponaꞌ. Sanapiꞌsanta huaꞌhuinapitarëꞌ inapoaponaꞌ. Huaꞌhuaroꞌsanta paꞌpinaꞌ, aꞌshinaꞌ, inapitarëꞌ napoaponaꞌ. Co ina pochin ninicatona yaꞌhuëantahuachinahuëꞌ, oꞌmarahuato yaꞌhuëramaso noꞌpaꞌ anaꞌintarahuë. Inapotato ataꞌhuantomiatarahuë,” tënin.
Currently Selected:
Malaquías 4: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
