Mateo 2

Tayora nitotonaꞌpiroꞌsaꞌ quënanpisoꞌ

1Quisososoꞌ Pirinquë nasitërin. Cotia parti chachin nasitërin. Naporoꞌ Irotisëri inaquë huaꞌanëntërin. Ina quëran tayora nitotonaꞌpiroꞌsaꞌ canquipi. Piꞌi pipirinso parti quëran huëꞌpi. Canquihuachinara, Quirosarinquë, natantiipi:

2—¿Insëquëtaꞌ nasha copirno nasitërin? Cotio copirno yaꞌconacasoꞌ nani nasitërin ipora. Yaꞌhuërai parti yaꞌhuasocoi, nasha tayora yaꞌnorinsoꞌ quënanai. Ina nicatoi: “Yosëri aꞌpaimarinsoꞌ nasitërin huachi,” taꞌtoi, huëꞌnai ina chinotapoi, itëraꞌpiapi.

3Ina natantahuaton, copirno Irotisë paꞌyanin. Quirosarinquë yaꞌhuëpisopitantaꞌ paꞌyanpi. 4Copirno paꞌyanaton, cotio maistroꞌsaꞌ, corto huaꞌanoꞌsaꞌ, inapita amatërin. Amatahuaton, natanin.

—¿Insëquëtaꞌ Cristo Yosëri aꞌpaimarinsoꞌ nasitapon? itërin.

5—Cotia parti chachin nasitapon. Pirinquë nasitapon, itopi. Iráca pënëntonaꞌpi ninoton, Yosë quiricanënquë ninshitërin.

6“Cotiaquë aꞌna ninanoꞌ yaꞌhuërin, Pirin itopisoꞌ.

Co panca ninanoyahuëꞌ niponahuëꞌ, inaquë aꞌna copirno nasitapon.

Naꞌa copirnoroꞌsaꞌ Cotia parti yaꞌhuëpirinahuëꞌ, inasoꞌ chini chiníquën nanantapon.

Yaꞌipi piyapinëhuëpita israiroꞌsaꞌ itopisoꞌ huaꞌanëntapon,” tënin Yosë, itopi.

7Copirnosoꞌ natanahuaton, co aꞌninquëchin yanatantërinhuëꞌ. Poꞌoana quëran tayora nitotonaꞌpiroꞌsaꞌ amatërin. Huëꞌpachinara, inaora quëparahuaton, nontërin:

—¿Ma yoquiquëtaꞌ nasha tayora yaꞌnorin? itërin.

Shaꞌhuitohuachinara, itantarin:

8—Pirinꞌpaꞌ nasha copirno nasitërin ipora. Inatohuaꞌ paatomaꞌ, noyá yonícoꞌ. Huaꞌhuasha quënanpatamaꞌ, huënantatomaꞌ, shaꞌhuitiintaco cantaꞌ paato chinochi, itërin nonpintaton.

9Ina natanahuatonaꞌ, paꞌpi huachi. Paꞌsapirinahuëꞌ, aꞌnanaya tayora quënaantapi. Yaꞌhuëpiquë niꞌpiso chachin inápaquë paaton, quëchitërarin. Huaꞌhuasha yacapatërinquë chachin tayora chiniconin. 10-11Ina niꞌsahuatonaꞌ, paꞌpi paꞌyatopi. Capa cancantatonaꞌ, pëiquë yaꞌconpi. Inaquë huaꞌhuasha quënanconpi. Aꞌshiontaꞌ yaꞌhuarin, Maria itopisoꞌ. Huaꞌhuasha quënanahuatonaꞌ, isonconahuatonaꞌ, chinotopi. Ina quëran caposoaꞌhuayanënapita iꞌsoatahuatonaꞌ, maꞌsha paꞌton nininsoꞌ quëtopi. Oro, yonarin pochin pimóchin nininsoꞌ, yaquiꞌ pimóchin nininsoꞌ inapita quëtopi. 12Ina quëran tashiꞌ huëꞌësoiꞌ, Yosë nohuanton, huaꞌnapi.

—Ama copirno yaꞌhuërinquë pantatomaꞌ, shaꞌhuitocosohuëꞌ, itërin anquëniri. Napoaton aꞌna ira paꞌtahuatonaꞌ, yaꞌhuëpiꞌpaꞌ canconpi huachi.

Iquipitoꞌpaꞌ ichitaꞌapisoꞌ

13Tayora nitotonaꞌpiroꞌsaꞌ paꞌpachinara, Yosë anquëninëni huëꞌënquë Cosi yaꞌnotahuaton itapon:

—Copirno nani chinotërin huaꞌhuasha tëpacaso marëꞌ. Apira sontaroꞌsaꞌ aꞌpararin ina yonicaiso marëꞌ. Napoaton aꞌnaroáchin ichitaꞌaquëꞌ. Aꞌshinë chachin Iquipitoꞌpaꞌ quëpaquëꞌ. Inaquë yacapatëquëꞌ. Noya huënantacasoꞌ nipachin, shaꞌhuitantaranquën, itërin anquëniri.

14Natanahuaton, aꞌnaroáchin Cosi huënsëintarin. Tashiꞌ nipirinhuëꞌ, huaꞌhuasha quëparin. Aꞌshinë chachin ichitaꞌarahuaton, Iquipitoꞌpaꞌ paꞌpi. 15Irotisë chiminaquë huarëꞌ inaquë yaꞌhuëpi. Iráca Yosë nohuanton, pënëntonaꞌpi ninorin: “Huiꞌnahuë Iquipitoꞌpaꞌ yacapatopirinhuëꞌ, ina quëran ocoiarahuë,” tënin Yosë. Huiꞌnin chachin Iquipitoquë yacapatohuachina, ninorinsoꞌ nanirin huachi.

Huaꞌhuasharoꞌsaꞌ tëpapisoꞌ

16Copirno Irotisësoꞌ tayora nitotonaꞌpiroꞌsaꞌ ninarápirinhuëꞌ, co yaꞌnopihuëꞌ. “Nonpintërinaco ipora,” taꞌton, chiníquën noꞌhuitërin. Noꞌhuitaton, sontaroꞌsaꞌ Pirinꞌpaꞌ aꞌparin quëmapiaꞌhuaroꞌsaꞌ tëpacaiso marëꞌ. “Iꞌhuá chachin tayora yaꞌnorin niꞌton, co canopiaꞌhuaroꞌsaráchin tëpacasoꞌ yaꞌhuërinhuëꞌ. Catoꞌ piꞌipitërinquë huarëꞌ tëpacoꞌ,” itahuaton, aꞌparin. Sontaroꞌsasoꞌ paꞌsahuatonaꞌ, yaꞌipi quëmapiaꞌhuaya Pirinquë yaꞌhuërinsopita tiquipi. Yaꞌcariyantaꞌ yonitonaꞌ, catoꞌ piꞌipitërinquë huarëꞌ tëpapi.

17-18Iráca ninoton, Yosë quiricanënquë Irimiasë ninshitërin:

“Namaquë naꞌnërinsoꞌ natanpi. Naquira naꞌnërárin, ayanárin.

Huaꞌhuinpitacoꞌ yonquiaton, naꞌnërarin.

‘Ama sëtëquësohuëꞌ,’ itopirinahuëꞌ,

nani chiminpi niꞌton, sëtárin,” tënin.

Iráca naporinso pochachin iporantaꞌ huaꞌhuaroꞌsaꞌ tëpapi niꞌton, aꞌshinaꞌ naꞌnërápi.

19Naporoꞌ Cosisoꞌ Iquipitoquë yacapatarin. Irotisë chiminpachina, Yosë anquëninëni yaꞌnotantarin. Huaꞌnarinso pochin Cosiri quënanin.

20—Huaꞌhuasha tëpanaꞌpi nani chiminin niꞌton, israiroꞌsaꞌ yaꞌhuëpiquë panantaquëꞌ. Huaꞌhuasha aꞌshinë chachin quëpantaquëꞌ, itërin.

21Ina natanahuaton, natërin. Quisoso aꞌshinë chachin quëparahuaton, inatohuaꞌ panantarin. 22Canconahuaton, nanan natantërin. “Irotisë huiꞌnin yaꞌhuërëꞌ huaꞌanëntantarin. Ariquirao itopisoari paꞌpin yaꞌhuërëtërin,” topi, natantërin. Ina tëꞌhuataton, co nohuantërinhuëꞌ inatohuaꞌ yaꞌhuëcasoꞌ. Naporahuaton, huaꞌnantarin.

—Ama copirno yaꞌhuërinquë chachin panantaquësohuëꞌ, itërin anquëniri. Ina natanahuaton, Cariria parti paꞌnin yaꞌhuëcaso marëꞌ. 23Inatohuaꞌ aꞌna ninanoꞌ yaꞌhuërin, Nasarito itopisoꞌ. Inaquë yaꞌhuërarin. Iráca pënëntonaꞌpiroꞌsaꞌ ninopi. “Cristo huëꞌpachin, Nasarito piyapi itaponaꞌ,” topi. Napoaton Yosë nohuanton, inaquë yaꞌhuaton, huiꞌnapitërin huachi.

Currently Selected:

Mateo 2: cbt

Highlight

Copy