Sal 51
51
SAALM 51 (50)
At Qaawa', chawuxtaana wu
1Re li xjolomileb' laj b'ichanel. Xsaalm laj David, 2naq kiq'use'k xb'aan laj Natán li propeet, xb'aan naq kixmux rib' rik'in lix Betsabé.
3At Qaawa', chawuxtaana wu sa' xk'ab'a' laarahom;
xb'aan xnimal aawuxtaan chakuy chasach linmaak,
4chawisi chi junwaakaj li ink'a' us xinb'aanu
ut chinaach'ajob'resi chiru linmaa'usilal.
5Ninnaw chi us naq xinq'et laawaatin,
rajlal nanaqk sa' inch'ool li maak xinb'aanu.
6Xinmaakob'k chawu, ka'ajwi' chawu xinmaakob'k;
xinb'aanu li ink'a' nawulak chawu.#51,5-6 Sal 32,5.
Jo'kan naq tz'aqal yaal li aatin xaraq sa' inb'een,
tiik aach'ool chi xyeeb'al naq wank inmaak.#51,6 Ro 3,4.
7Chak'e reetal naq sa' maak xinyo'laak,
ak aj maakin ajwi' chaq naq xinsiyaak rik'in linna'.
8Laa'at nakatsik'ok li yaal sa' li ch'oolej,
ut xak'e we li choxahil na'leb' sa' xchamal li waanm.
9Chakirkiri li ha' sa' inb'een,#51,9 Ex 12,22; Lv 14,51; Ez 36,25; Heb 9,13-14.19.
ut tinkanaaq chi saq ru linyu'am;
chinaach'ajob'resi,
ut q'axal saqpotz'inaqin chik chiru li ratz'amke.#51,9 Is 1,18.
10Chiwanq sahilal ut ninq'ehik;
chiweek'a wi' chik xsahil linch'ool,
us ta laa'at xaputz'i linb'aqel.
11Maak'e sa' aach'ool li xinmaakob'k wi',
ut chawisi chixjunileb' linmaak chi junajwa.
12K'e we jun tiikil ch'oolej ut saq ru;
chinaa'ak'ob'resi aj tawi' sa' linmusiq'.#51,12 Ez 11,19; 36,26; 2 Kr 5,17.
13Minaanajtob'resi taxaq sa' xnaq' aawu,
ut maawisi wik'in laaloq'laj musiq'.
14Chak'e wi' chik naq chiweek'a li sahilal
li nachalk rik'in laakolom;
chak'e xkawub' linch'ool rik'in laachaab'il musiq',
15re naq tink'ut laachaq'rab' chiruheb' li neke'xq'et laawaatin,
ut eb' laj maak te'sutq'iiq chaq aawik'in.
16Chinaakol taxaq chiru li kamk,
at inYos aj kololat we,
ut laa'in tinb'icha naq tiik laach'ool.
17At Qaawa', chate taxaq li xtz'uumal we,
re naq tinpuktesi resil li xnimal aawankil.
18Xb'aan naq ink'a' naxk'ul aawu li mayejak;
ut wi tinyeechi'i aawe junaq k'atb'il mayej,#51,18 Sal 40,7; 50,8-14.
ink'a' ajwi' taasaho'q laawaanm rik'in.
19Li mayej nawulak chiru li Yos, a'an naq taayot'e'q li qach'ool;
laa'at ink'a' nakatz'eqtaana li nayot'e'k xch'ool
ut naxkub'si rib' chawu, at Qaawa'.#51,19 Sal 34,19.
20Chawusilaatina taxaq li tenamit Sión sa' xk'ab'a' laarahom,
chawaklesi wi' chik li xsuttz'akil Jerusalén.
21Toja' naq tixk'ul aawu li mayejak tento xk'eeb'al,
jo'wi' li k'atb'il mayej ut chixjunil li nayeechi'imank.
Toja' naq te'mayejamanq li saaj wakax sa' xb'een laa'artal.
Currently Selected:
Sal 51: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
