Sal 50
50
SAALM 50 (49)
Li mayej li nawulak chiru li Yos
1Xsaalm laj Asaf.
Li Qaawa', li Yos q'axal nim xwankil, x'aatinak
ut xb'oqeb' chi ch'utlaak chixjunil li ruuchich'och',
chalen chaq sa' releb'l li saq'e toj sa' rokeb'l.
2Toj Sión, toj sa' li tenamit k'ajo' xchaq'alil ru,
nalemtz'unk chaq xloq'al li Qaawa'.
3We' chaq li qaYos, ut ink'a' taakanaaq chi ch'anch'o:
k'amol b'e chaq chiru jun li xam k'ajo' xtiqwal,
sutsu li Yos xb'aan jun xiwajel kaqsut-iq'.
4Chalen chaq toj taqe'q xb'oqeb' chi ch'utlaak li choxach'och'
re xraqb'al aatin sa' xb'een li xtenamit:
5“Ch'utub'aqeb' chiwu li neke'paab'ank we,
a'eb' li xe'xk'ul xch'ooleb'
linloq'laj sumwank rik'in mayej”, chan.
6Ut li choxa naxye naq li Yos a'an laj raqol aatin,
ut a'an junelik tiik xch'ool.
7“Ab'i, at intenamit, ok we chi aatinak.
Ab'i, Israel, tinch'olob' li yaal chawu.
Laa'in li Qaawa', laa'in laaYos.
8Moko laamayej ta nakatinq'us wi',
chi moko laak'atb'il yeechi'om li junelik nakaq'axtesi we.
9Moko tulinchap ta li ral laawakax,
chi moko eb' li teelom chib'aat li wankeb' sa' laawochoch.
10Xb'aan naq weheb' chixjunil li k'iche'il xul;
wankeb' cho'q we li ninqi xul chi o'q'ob' sa'atqeb' li tzuul.
11Nekeb'innaw ru chixjunileb' li xul neke'rupupik chiru choxa,
weheb' chixjunil li wankatqeb' chiru tzuultaq'a.
12Wi ta tintz'okaaq, moko tojo' sa ta raj tinye aawe,
xb'aan naq we li choxach'och' ut chixjunil li wank chisa'.
13Ma tintiwo'q tab'i' xtib'el teelom wakax,
ma tinwuk' tab'i' xkik'el teelom karneer?
14Laa'in li Nimajwal Yos!
Li mayej li taaq'axtesi we,
a'an jun ch'oolej li naxnaw yoxink;
chab'aanu chi tz'aqal li xayeechi'i we.
15Chayaab'a link'ab'a' sa' xkutankil laarahilal;
laa'in tatinkol ut laa'at tinaaloq'oni”.
16Ab'an li Yos naxye re li ink'a' us xna'leb':
“K'a'ut naq nakach'olob' xyaalal linchaq'rab',
k'a' naq nakat-aatinak chirix linloq'laj sumwank,
17laa'at li xik' nakawil laatijb'al inb'aan,
laa'at li nakatz'eqtaana chixjunil li waatin?
18Wi nakawil junaq aj elq', nakatxik chirix,
nakajunaji aawib' rik'ineb' laj muxul sumlaak.
19A' chik li ink'a' us nawulak chawu xyeeb'al;
q'axal seeb' li ru'uj aawaq' chi tik'ti'ik.
20Nakachunub' aawib' chi aatinak chirix xjolom laawas aawiitz'in,
ut a' ajwi' laawiitz'in nakamajewa.
21A'an a'in li nakab'aanu laa'at:
ma maak'a' tab'i' tinye chirix a'an?
Malaj nakak'oxla naq kama'inat?
Anaqwan tatinq'us, ok we chajitb'al.
22“Chetawaq xyaalal laa'ex li nikineetz'eq chirix leech'ool:
mare anchal texint'upi ut maajun taakoloq eere.
23Li mayej naxk'e inloq'al,
a'an jun ch'oolej li naxnaw yoxink.
Chinaapaab', ut laa'in tatinkol”.
Currently Selected:
Sal 50: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
