Sal 49
49
SAALM 49 (48)
Ink'a' us xk'ojob'ankil qach'ool sa' xb'een li b'ihomal
1Re li xjolomileb' laj b'ichanel. Xsaalm eb' li ralal xk'ajol laj Koré.
2Chejunilex laa'ex li tenamit, ab'ihomaq a'in;
chex'ab'inq laa'ex li wankex junsut junrub'el choxa,
3laa'ex li maak'a' eewankil
ut li q'axal wank eeloq'al,
jo' b'ihom jo' neb'a', ab'ihomaq a'in!
4Ok we xyeeb'al choxahil na'leb',
tinch'olob' xyaalal li naweek'a sa' li waanm;
5tink'e inch'ool chi rab'inkil eb' li jaljookil ru aatin,
rik'in aarp tink'e chi nawe'k li muqmuukil na'leb'.
6K'a'ut naq tinxiwaq sa' xq'ehil li rahilal,
naq sutsuuqin xb'aaneb' li ink'a' useb' xna'leb',
7eb' li k'ojk'ookeb' xch'ool rik'in li k'aru wank reheb',
ut neke'xnimob'resi rib' rik'in li xnimal ru xb'ihomaleb'?
8Ch'olch'o naq maajun taaruhanq chi xkolb'al rib' xjunes
chi moko xq'ajkamunkil chiru li Yos li xkolb'al li xyu'am.
9Xb'aan naq q'axal terto nakole'k wi' li qayu'am
ut maajun wa tz'aqalaq li tumin
10re naq toj yo'yooqo ut ink'a' ta tookamq.
11K'utk'u utan naq neke'kamk chixjunileb':
li wankeb' xna'leb' jo'wi' eb' li jip ut li maak'a'eb' xna'leb';
ut sa' ruq' jalaneb' chik te'xkanab' li xb'ihomaleb'.
12Li xjuleb' a'anaq li rochocheb' chi junajwa,
a'anaq li xmuheb'aaleb' junq'e junq'e kutan,
us ta sa' xk'ab'a'eb' wank li xhuhil li xch'och'eb'.
13Li winq ink'a' nakanaak rik'in li xb'ihomal chi junelik,
chanchan b'an eb' li xul li neke'kamk.#49,13, 21 Ek 3,19.
14Jo'ka'in te'xk'ul eb' li neke'xk'e xloq'al xjuneseb' rib';
jo'ka'in te'oso'q li neke'xnimob'resi rib'eb'.
15Jo'kaqeb' li karneer naq te'k'ame'q sa' xb'alb'a;
a' li kamk laj k'aak'alehom reheb'.
Eb' li tiikeb' xch'ool te'wanq xwankil sa' xb'eeneb'.
Eq'la ajwi' na'ok chi lajk li xch'och'el xsululeb',
ut li xb'alb'a a'anaq li rochocheb' chi junelik!
16A'ut li Yos tinxkol chiru xwankil li kamk
ut tinixk'am rik'in.
17Matk'oxlak wi wank junaq na'ok chi b'ihomo'k,
naq nak'ihank ut natamk li xjunkab'lal,
18xb'aan naq sa' li xkamik maak'a' tixk'am chirix,#49,18 Job 1,21; Ek 5,14; 1 Ti 6,7.
chi moko li xjunkab'lal taaxik rochb'een.
19Naq toj yo'yo, mare xreek'a xsahil li xch'ool
ut eb' li poyanam xe'xnima xk'ab'a' xb'aan li xb'ihomal;
20ab'anan taaq'ajq taasutq'iiq rik'ineb' li xna' xyuwa'
li maajoq'e chik te'ril li kutan saqenk.
21Li winq ink'a' nakanaak rik'in li xb'ihomal chi junelik,
chanchan b'an eb' li xul li neke'kamk.
Currently Selected:
Sal 49: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
