Sal 48
48
SAALM 48 (47)
Li xloq'laj tzuul li Qaawa'
1B'ich. Xsaalm eb' li ralal xk'ajol laj Koré.
2Nim xwankil li Qaawa'!
Q'axal xk'ulub' naq taanimaaq ru li qaYos.
Sa' li xtenamit wank li xloq'laj tzuul,
3k'ajo' xchaq'alil ru;
aran nasaho'k xch'ool chixjunil li ruuchich'och'!
Li tzuul Sión a'an li xmuheb'aal li Qaawa',
a'an li tenamit nawank wi' li xnimal ru Awab'ej.#48,3 Mt 5,35.
4Li Yos nak'aak'alenk sa'eb' li rochoch
ut xk'utb'esi rib' tz'aqal cho'q saqoonak.
5Eb' li awab'ej xe'xjunaji rib' chi yalok,
jun chalikeb' sa' junajil sa' xb'een Sión;
6ab'anan naq xe'ril li tenamit,
xe'sachk xna'leb',
k'ajo' naq xe'xiwak ut xe'siksotk!
7Sachaamileb' xch'ool ut aakaneb' aj chik,
jo'keb' chaq jun li ixq ok re chi alank,
8jo'keb' li jukub' re li tenamit Tarsis
nalaje'sache'k xb'aan li iq' nachalk sa' releb'l saq'e.
9Jo' tz'aqal qab'ihom chaq resil,
ak xqil anaqwan sa' xtenamit li Nimajwal Yos,
sa' xtenamit li qaYos:
k'ojk'o Jerusalén chi junajwa xb'aan li Qaawa'.
10At qaYos,
naq wanko sa' laawochoch
naqak'oxla rix li xnimal aarahom.
11Jo' chanru laaloq'laj k'ab'a',
jo'kan ajwi' laaloq'al
nawulak toj sa' xmaril li ruuchich'och'!
Laa'at nakat-awab'ejink rik'in tiikilal.
12Sa' li tzuul Sión chiwanq sahil ch'oolejil,
che'pisk'oq li tenamit re Judá xb'aan xsahilaleb' xch'ool:
k'ajo' naq nakatraqok aatin sa' tiikilal!
13Chesutiiq li tzuul Sión ut cheq'otaq chaq rix,
cherajlaheb' li xnajt xteramil kab'l.
14K'ehomaq reetal chanru li tz'ak sutsu wi',
cheb'eeni chixjunileb' li xninqal ru ochoch,
re naq teepuktesi resil reheb' li maji' yo'lajenaqeb':
15A'in li Qaawa',
jo'kan xna'leb' li qaYos chi junelik.
A'an taab'eresinq qe junq'e junq'e kutan!
Currently Selected:
Sal 48: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
