Sal 44
44
SAALM 44 (43)
Xrahil xch'ool li xtenamit li Yos
1Re li xjolomileb' laj b'ichanel. Xb'icheb' li ralal xk'ajol laj Koré.
2At qaYos, rik'in qaxik xqab'i resil
ut eb' li qana' qayuwa' xe'xseeraq'i qe
k'aru xab'aanu najter q'e kutan,
naq toj wankeb' chaq eb' a'an.
3Rik'in laawuq' xawaanilasiheb' li tenamit,
xarahob'tesi chixjunileb' li poyanam
re xk'ojob'ankil eb' li qana' qayuwa' sa' li xna'ajeb',
re naq te'k'iiq ut te'nimanq.
4Ch'olch'o naq moko rik'in ta yalok u
xe'reechani li na'ajej,
chi moko rik'in li xnimal xwankileb' xe'q'axok u,
sa' xk'ab'a' b'an laawankil,
rik'in laanim uq' ut li xlemtz'unkil xnaq' aawu,#44,4 Dt 8,17-18; Jos 24,12; Jue 7,2.
xb'aan naq k'ajo' xaraheb' chaq.
5At inYos, at Eechal we, junes sa' aach'ool
x'alaak naq taaq'axoq u laj Jakob;
6rik'in laatenq'aal xoonumtaak sa' xb'eeneb' li xik' neke'ilok qe;
sa' aak'ab'a' laa'at xqayeq'iheb' li q'axal neke'rahob'tesink qe.#44,6 Sal 60,14.
7Moko rik'in ta xna' linsimaj xintaw xkawub' linch'ool,
chi moko linch'iich' xk'ehok we chi xq'axb'aleb' ru,
8laa'at b'an xatkolok qe sa' ruq'eb' li neke'yalok qik'in,
laa'at xak'uteb' xxutaan li xik' neke'ilok qe.
9At Qaawa', junelik tqanima qib' sa' laak'ab'a',
kok'aq xsa' tatqaninq'ehi ut tooyoxinq chawu.
10A'ut anaqwan xoohaakanab' qajunes ut xak'ut qaxutaan,
ink'a' chik nokoohaawochb'eeni naq nokooxik chi yalok.#44,10 Sal 60,12; 108,12.
11Xoohaak'e chi elelik chiru laj xik'il uuchinel,
ut eb' li xik' neke'ilok qe
xe'xmaq' chiqu li k'aru wank qe.
12Xoohaaq'axtesi chi kamk
jo' na'uxk reheb' li karneer,
ut xoohaacha'cha'i sa'atqeb' chixjunil li tenamit.
13Xak'ayi laatenamit ut maak'a' nakara xb'aan,
ink'a' xab'ihomob'resi aawib' rik'in li xtz'aq.
14Xak'ut qaxutaan chiruheb' li tenamit li nach' wankeb':
nokoohe'xse'e ut nokoohe'reetz'u eb' li wankeb' chi qasutam:
15xoohaakanab' jo' xb'atz'uuleb' li poyanam,
neke'reek'asi li xjolomeb' naq nokoohe'ril.
16Junelik yookin xk'oxlankil li xmajewankil inloq'al;
tik nintz'ap li wu xb'aan linxutaan,
17naq chajchookeb' re chinhob'b'al ut chinmajewankil.
K'ajo' naq xik' nikine'ril ut nikine'xmaa'usila.
18Chixjunil a'in xchalk sa' qab'een
us ta ink'a' xatsachk sa' qach'ool,
chi moko xqaq'et ta laaloq'laj Sumwank.
19Ink'a' xoosutq'iik chiqix re aakanab'ankil,
chi moko xoo'elk ta sa' laab'e re aatz'eqtaanankil.
20A'ut laa'at xoohaateni ut xoohaakut sa' rahil na'ajej,
xoohaak'e sa' aak'ab', sa' xmu li kamk!
21Wi xsachk ta sa' qach'ool xk'ab'a' li qaYos,
wi xqataqsi ta li quq' re xloq'oninkil li jalanil yos,
22ma ink'a' ta raj xk'e reetal li Qaawa',
li nanawok chixjunil li wank sa' li ch'oolej?
23Ab'an wulaj wulaj yooko chi kamsiik sa' laak'ab'a',
chanchano eb' li karneer re kamsiik.#44,23 Ro 8,36.
24Ajsi aawu, at Qaawa'!
K'a' naq yookat chi wark?
Waklin chaq, moohaatz'eqtaana chi junajwa!
25K'a' naq nakamuq laawilob'aal chiqu?
Ma maak'a' sa' laach'ool li qarahilal ut li xtoq'ob'aal qu?
26Xb'aan naq tz'ajtz'ooko chiru ch'och',
ut li qayu'am yo chi sub'e'k sa' pojtz'.
27Waklin chaq,
kim chi qatenq'ankil,
ut choohaakol taxaq xb'aan laarahom!
Currently Selected:
Sal 44: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
