Sal 40
40
SAALM 40 (39)
Yoxink ut tz'aamank
(Sal 70)
1Re li xjolomileb' laj b'ichanel. Xsaalm laj David.
2Xink'ojob' linch'ool rik'in li Qaawa',
ut a'an xk'utzub' chaq rib'
re rab'inkil li xyaab' inkux.
3Xinrisi chaq sa' xchamal li jul,
xinrisi sa' li saab' ha' yookin wi' chi sub'e'k,
xinxk'e chi b'eek sa' xb'een li saqoonak:
maak'a' chik tink'ul sa' linb'eenik.
4Xk'e chinb'icha jun li ak' b'ich
re xnimankil ut xb'ichankil ru li qaYos.
Naab'aleb' xe'ilok re ut xe'xkub'si xwankil,
xe'xk'ojob' xch'ooleb' rik'in li Qaawa'.
5Us xaq re li xkawuuk xch'ool rik'in li Yos,
us xaq re li ink'a' naxjunaji rib' rik'ineb' li q'etq'et,
a'eb' li sachenaqeb' chirixeb' li jalanil yos.
6At Qaawa', at inYos, naab'al li sachb'ach'oolej xab'aanu,
k'ajo' xk'ihal li xninqal ru aak'a'uxl chiqix:
maajun truuq xjuntaq'eetankil rib' aawik'in!
Nawaj raj xyeeb'al resil ut xpuktesinkil,
ab'an ink'a' ninruhank chi rajlankileb'.
7Mayejak ut yeechi'ink ink'a' xawaj,
xteeb'al b'an chik linxik xab'aanu.
Ink'a' xapatz' k'atb'il xul chi moko mayejak;
8jo'kan naq xinye: We'kin, chalk we, chankin.
Tz'iib'anb'il chiwix sa' li b'otb'ookil hu
9naq tento tinb'aanu laawajom.
At inYos, k'ajo' naq nasaho'k linch'ool chapaab'ankil,
wank laaChaq'rab' sa' li waanm chi junelik.#40,7-9 Heb 10,5-7.
10Xinpuktesi resil li xtiikilal laach'ool sa' li nimla ch'utam;
ink'a' xintz'ap xsa' we,
ch'olch'o chawu, at Qaawa'.
11Moko xintz'ap ta sa' li waanm naq tiik aach'ool,
xinpuktesi b'an resil laachaab'ilal ut laakolom;
ink'a' xinmuq laarahom ut laawuxtaan chiru laatenamit.
12A'ut laa'at, at Qaawa', maakanab' taxaq ruxtaanankil wu;
sa' xk'ab'a' laarahom ut laatiikilal
chinaak'aak'ale taxaq chi junelik.
13Xb'aan naq naab'al li rahilal sutsuukin wi',
ink'a' naru rajlankileb'.
Xnumtaak li maak sa' inb'een
ut ink'a' chik saqenk nin'ilok:
q'axal numtajenaqeb' chik linmaak
chiruheb' li rismal linjolom;
k'ajo' naq nach'inank linch'ool.
14Chakuy taxaq inmaak, at Qaawa', ut chinaakol;
seeb'a chaq aawib' chintenq'ankil, at Qaawa'!
15Che'kanaaq sa' xutaan ut che'sachq sa' xch'ooleb'
chixjunileb' li neke'ajok inkamsinkil!
Che'sutq'iiq chirixeb' chi sachsooqeb' xna'leb'
eb' li neke'ajok xb'aanunkil maa'usilal we!
16Che'q'ajq chirixeb' xb'aaneb' xxutaan
eb' li neke'se'enk we: “Ja, ja!”, chankeb'.
17Ab'an che'nujaq rik'in nimla sahil ch'oolej
chixjunileb' li neke'sik'ok aawe.
Che'xye chi junelik
jo'k'ihaleb' li neke'rahok re laakolom:
“Q'axal nim li Qaawa'!”, cha'qeb'.
18Us ta laa'in maak'a' wank we ut q'axal xtoq'ob'aal wu,
ab'an li Qaawa' na'ilok we.
At inYos, matb'ayk chaq:
laa'at laj tenq'ahom we ut laj kolol we.
Currently Selected:
Sal 40: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
