Sal 38
38
SAALM 38 (37)
Tz'aamank sa' li rahilal
1Xsaalm laj David. Re xjultikankil.
2At Qaawa', minaaq'us sa' laajosq'il,
minaak'e chi xtojb'al linmaak sa' xpo'ik laach'ool.#38,2 Sal 6,2; Jr 10,24.
3Xb'aan naq xlaje'xlap rib' laasimaj sa' lintib'el,
ra naweek'a xb'aan li raalal laawuq' sa' inb'een;#38,3 Job 6,4; 16,12-13.
4maak'a' chik rusil lintib'el xb'aan laajosq'il,
maak'a' chik xkawilal linb'aqel xb'aaneb' linmaak.
5Relik chi yaal naq linmaak q'axal naxq'ax linteram,
k'ajo' raalal chiru xkawilal linmetz'ew.
6Linxox yo chi pojenk ut x'ok chi chuho'k:
xmaak'a'il inna'leb' naq yookin chi xk'ulb'al a'an;
7k'utzk'uukin aj chik, lub'luukin chi junajwa
ut q'axal ra sa' inch'ool chiru chixjunil li kutan.
8Xsipoje'k li xyi wix xb'aan li tiq,
maak'a' chik rusil lintib'el xb'aan li yajel;
9tawajenaqin, putz'inb'ilin chinjunxaqalil,
aakanin aj chik,
ka'aj chik maa na'elk li waanm.
10At Qaawa', ch'olch'o chawu chixjunil li nawaj,
moko muqmu ta naq yookin chi yaab'ak;
11natentotk li waanm,
yo chi lajk linmetz'ew,
a' ajwi' xsa' li wu yo chi moyk.
12Eb' li wamiiw ut eb' linkomon neke'kanaak chi najt,
eb' li wech'alal neke'elk chink'atq xb'aan linyajel.#38,12 Job 19,13.
13Eb' li neke'raj inkamsinkil neke'xyal xq'e chinra'lenkil;
eb' li neke'xrahi ch'a'ajkilal we
neke'xk'uub' inrahob'tesinkil,
ut chixjunil li kutan neke'xyoob' aatin chiwix.
14A'ut laa'in nintz'apxiki wib' ut ink'a' nawab'i,
ninb'aanu wib' jo' li mem,
ut ink'a' nin'aatinak;#38,14 Is 53,7.
15kama'in li winq li ink'a' na'ab'ink
ut ink'a' naxsume ru li nayeemank re.
16Aawik'in, at Qaawa', wank li woyb'enihom;
laa'at taasume linpatz'om, at Qaawa', at inYos.
17Ka'ajwi' a'in nintz'aama chawu:
“Mine'xse'e, me'numtaak sa' inb'een naq tintichk'oq!”.
18A'ut anaqwan kach'in chik maa nint'ane'k,
li rahilal wankin wi' tik ink'a' nikinxkanab'.
19Tinxooto linmaak chawu,
k'ajo' xrahil linch'ool xb'aan li xinmaakob'k wi'.
20Numtajenaqeb' chik li xik' neke'ilok we chi maak'a' xyaalal,
naab'aleb' li neke'tz'eqtaanank we chi maak'a' inmaak,
21eb' li neke'sumenk usilal rik'in maa'usilal
ut neke'jitok we xb'aan naq ninb'aanu li us.
22At Qaawa', minaakanab' injunes;
at inYos, matnajtok wik'in!
23Chalqat sa' junpaat chintenq'ankil,
at inNa' at inYuwa', aj Kololat we!
Currently Selected:
Sal 38: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
