Sal 37
37
SAALM 37 (36)
K'aru toxe'kanaaq wi' laj maak ut li tiik xch'ool
1Xsaalm laj David.
Michalk aak'a'uxl xb'aaneb' li ink'a' useb' xna'leb',
maakaqali eb' li ink'a' neke'xb'aanu li tiikilal.
2Xb'aan naq junpaat te'chaqiq kama' naxk'ul li pim;
kama' natz'umaak li pach'aya' naq te'oso'q.
3Kawaq aach'ool rik'in li Qaawa' ut b'aanu li us,
wanqat sa' laana'aj ut chatk'iiq sa' tuqtuukilal;
4chiwanq xsahil aach'ool rik'in li Qaawa'
ut taak'ehe'q aawe li naraj laawaanm.#37,1-4 Pr 23,17-18; 24,19-20; Eklo 9,11-12.
5Chaq'axtesi aawib' rub'el roq rub'el ruq' li Qaawa',
k'ojk'ooq aach'ool rik'in,
ut A'an taatenq'anq aawe;#37,5 Pr 16,3; Eklo 2,6.
6tixk'e chi kutano'k li xtiikilal laawaanm jo' naq nasaqewk,
taalemtz'unq li xchaab'ilal laayu'am jo' naq nawa'leb'o'k.
7Hilan rik'in li Qaawa',
chiwanq aawoyb'enihom rik'in;
matjosq'o'k xb'aan li winq li us na'elk sa' chixjunil,
chi moko xb'aaneb' li tenamit li junes raaxiik' neke'xyoob'.
8Matpo'k, chakanab' laajosq'il;
wi yal ch'inpo'aqat, ra taachalq sa' aab'een:
9xb'aan naq eb' laj b'aanuhom maa'usilal te'sache'q chi junajwa,
a'ut li k'ojk'ookeb' xch'ool rik'in li Qaawa'
te'reechani li chaab'il na'ajej.#37,9 Pr 2,21-22.
10Sa' jun ch'ina k'amok maak'a'aqeb' chik li ink'a' useb' xna'leb';
us ta taasik'eb' sa' li xna'ajeb',
ab'an maab'ar chik taataweb'.
11A'ut eb' li neb'a' te'reechani li chaab'il na'ajej.#37,11 Dt 11,8-9; Sal 25,12-13; Mt 5,5.
K'ajo' xnimal li tuqtuukil usilal te'xyal chi junelik!
12Li ink'a' us xna'leb' naxk'uub' raaxiik' sa' xb'een li tiik xch'ool,
naxk'uxuxi ruuch re sa' xb'een xb'aan xjosq'il.
13Ab'an li Qaawa' naxse'e xaq li yib'ru xna'leb':
naxnaw naq wulak re xq'ehil naq taasache'q.
14Li ink'a' useb' xch'ool neke'risi xch'iich'eb' sa' rochocheb',
ut neke'xyu' rix li xna' simaj
sa' xb'een li neb'a' ut li toq'ob' ru,
re xkamsinkileb' li tiikeb' ru xyu'am.
15Ab'an a'eb' ajwi' li xch'iich' taaxeq'oq reheb',
li xna' xsimajeb' talaje'toqje'q chiruheb'.
16Us ta kach'in ajwi' li k'aru re li tiik xch'ool,
ab'an q'axal us wi' chik chiru xb'ihomaleb' laj maak,#37,16 Pr 15,16.
17xb'aan naq li ink'a' useb' xna'leb' taajuk'e'q li xwankileb',
a'ut li tiikeb' xch'ool a' li Qaawa' taakuutunq reheb'.
18Li Qaawa' naxk'aak'aleheb' li tiikeb' xch'ool
jo' najtil te'wanq sa' ruuchich'och';
ut li k'aru te'reechani,
taawanq chi junelik.
19Moko ra ta te'xk'ul sa' xq'ehil li rahilal;
ut naq taawanq we'ej,
numtajenaqaq li xtzekemqeb'.
20A'ut eb' laj maak te'sache'q chi junajwa;
te'oso'q eb' li xik' neke'ril li Qaawa',
kama' li xchaq'alil ru li pim,
chanchanaqeb' li sib' sa' iq' naq te'sachq.
21Li ink'a' us xna'leb' nato'onink
ut ink'a' chik naxk'e reeqaj li xto';
a'ut li tiik xch'ool a'an aj uxtaan
ut nasihink chi anchal li raanm.
22Li osob'tesinb'il xb'aan li Qaawa',
a'an taa'eechaninq re li chaab'il na'ajej;
ab'an li tz'eqtaananb'il xb'aan,
taasache'q chi junajwa.
23A' li Qaawa' nab'eresink re li winq;#37,23 Pr 20,24.
nasaho'k sa' xch'ool rik'in rilb'al li xyu'am.
24Us ta taatichk'oq, ab'an ink'a' taat'ane'q,
xb'aan naq ch'iloninb'il xb'aan li Qaawa'.
25Sa' chaq insaajilal ut chalen anaqwan sa' intiixilal
maajun wa wilom junaq tiik xch'ool tz'eqtaananb'il ta xb'aan li Yos,
chi moko wab'ihom naq eb' li ralal xk'ajol xe'xlemooxni ta xwaheb'.
26Rajlal kutan na'uxtaanank ut nak'ehok to':
eb' li ralal xk'ajol te'osob'tesiiq chi junelik.
27Kol aawib' chiru li maa'usilal ut b'aanu li us,
ut junelik wanq junaq aamuheb'aal,
28xb'aan naq li Qaawa' naxra li tiikil ch'oolej,
ut ink'a' naxkanab' xjuneseb' li neke'paab'ank re.
Li ink'a' useb' xna'leb' te'sache'q chi junajwa;
li ralal xk'ajoleb' laj maak te'isiiq chi junwaakaj.#37,28 Job 18,19.
29Ab'an li tiikeb' xch'ool te'reechani li chaab'il na'ajej,
ut aran te'wanq junq'e junq'e kutan.
30Li chaab'il xch'ool junes choxahil na'leb' naxye;
naq na'aatinak, junes li yaal na'elk sa' re.
31Xb'aan naq wank sa' xch'ool li xchaq'rab' li xYos
ut ink'a' nakab'roxink xk'a'uxl sa' xb'e li Qaawa'.
32Li ink'a' us xna'leb' naxk'e reetal li tiik xch'ool
ut naxsik' chan raj ru naq tixkamsi;
33ab'an li chaab'il xyu'am
ink'a' taak'ehe'q sa' ruq' laj maak xb'aan li Yos,
chi moko taateneb'aaq maak sa' xb'een
naq wanq li raqb'a aatin.
34Kawaq aach'ool rik'in li Qaawa' ut b'aanu li rajom:
taak'ehe'q aaloq'al ut taaweechani li chaab'il na'ajej;
laa'at toxaawil xsachik li ink'a' useb' xna'leb'.
35Ak wilom li ink'a' us xch'ool chi xnimob'resinkil rib',
chanchan jun nimla tz'unu'j che' naq xxaqab' rib';
36xinnume'k wi' chik ut maak'a' chik sa' xna'aj,
xinsik'i ut maab'ar chik xtawmank.
37Il li tiik xch'ool ut k'e reetal li chaab'il xna'leb':
ani nawank sa' tuqtuukilal, te'wanq ralal xk'ajol;
38ab'anan eb' laj maak te'sache'q xwankil,
eb' li ralal xk'ajol li ink'a' useb' xna'leb'
te'sachq chi junajwa.
39Rik'in li Qaawa' nachalk chaq xkolb'aleb' li tiikeb' xch'ool:
A'an li xkawub' xch'ooleb' naq wankeb' sa' rahilal.#37,39 Sal 9,10.
40Li Qaawa' natenq'ank reheb' ut narisiheb' sa' rahilal;
narisiheb' sa' ruq' laj maak ut naxkoleb',
xb'aan naq rub'el roq neke'muhenk.
Currently Selected:
Sal 37: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
