Sal 34
34
SAALM 34 (33)
Xb'ihomal li neb'a'
1Xsaalm laj David. Kixb'icha naq ki'elk chiru laj Abimélek, yo chaq chi xpak'b'al rib' jo' kaan ru.
2Tin'usilaatina li Qaawa' chi junelik,
tinnima ru rik'in xtz'uumal we chi junelik.
3Laa'in ninnima wib' sa' xk'ab'a' li Qaawa':
ab'ihomaq laa'ex li neb'a' ut chisaho'q sa' eech'ool!
4Qanimaaq ru li Qaawa' wochb'eenex,
junxikikaqo chi xterq'usinkil li xk'ab'a'.
5Xinpatz'ok re li Qaawa',
ut a'an xinxsume chaq:
xinrisi sa' chixjunil li xiw xiw wankin wi'.
6Eb' li neke'xka'ya li Qaawa'
taalemtz'unq li rilob'aaleb' kama' li saq'e;
ink'a' te'kaqo'q xb'aaneb' xxutaan.
7Naq li neb'a' naxyaab'a li xk'ab'a', na'ab'iik xb'aan;
li Qaawa' nakolok re chiru chixjunil li xrahilal.
8Li x'ánjel li Qaawa' naxk'aak'ale ut naxkoleb'
jo'k'ihaleb' li neke'paab'ank chiru li Yos.
9Yalomaq ut k'ehomaq reetal:
makach'in xchaab'ilal li Qaawa'!#34,9 1 P 2,3.
Us xaq reheb' li neke'muhenk rik'in.
10Cheroxloq'iiq li Qaawa' laa'ex li sik'b'il eeru xb'aan,
xb'aan naq eb' li neke'paab'ank chiru
maak'a' taamajelo'q reheb'.
11Eb' li b'ihom neke'kanaak sa' neb'a'il ut sa' we'ej,
ab'an eb' li neke'xsik' li Qaawa'
maak'a' taamajelo'q reheb'.
12Ex walal ink'ajol, kimqex ut chineerab'ihaq:
twaj xk'utb'al cheru roxloq'inkil li Qaawa'.
13Ma nakawaj naq najtaq roq laayu'am?
Ma nakarahi naq sa taanumsi naab'aleb' li kutan?
14Chara li ru'uj aawaq' chiru li ink'a' us,
miwank li tik'ti' sa' xtz'uumal aawe;
15chawisi aawib' sa' li maa'usilal ut chab'aanu li us,
chasik' li tuqtuukilal ut chak'e aach'ool chirix a'an.
16Li Qaawa' naxk'aak'aleheb' li tiikeb' ru xyu'am,
ut narab'iheb' naq neke'xyaab'a li xk'ab'a'.
17Ab'an xik' narileb' laj b'aanuhom maa'usilal#34,12-17 1 P 3,10-12.
re naq maak'a'aq chik xpatz'b'aleb' sa' ruuchich'och'.
18Neke'xyaab'a xk'ab'a' li Qaawa', ut a'an narab'iheb';
narisiheb' sa' chixjunil li rahilal wankeb' wi'.
19Nach' wank li Qaawa' rik'ineb' li neke'maynak xch'ool:
a'an naxkoleb' li maak'a' chik royb'enihomeb'.
20Numtajenaq li rahilal neke'xk'ul li tiikeb' xch'ool;
ab'an li Qaawa' na'isink reheb' sa' chixjunil.
21A'an nakolok reheb' chixjunil li xb'aqeleb'
re naq maajun junaq reheb' taatoqe'q.#34,21 Jn 19,36.
22Ab'an li ink'a' useb' xna'leb',
a' li maa'usilal taakamsinq reheb';
eb' li neke'tz'eqtaanank re li tiik xch'ool
te'k'ehe'q xtojb'al rix li xmaakeb'.
23Li Qaawa' naxkoleb' laj k'anjel chiru;
maak'a'aq tojb'amaak sa' xb'eeneb' li neke'muhenk rik'in.
Currently Selected:
Sal 34: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
