Sal 33
33
SAALM 33 (32)
Xnimankil ru li Yos aj Yoob'tesinel ut aj Kolonel
1Chexsaho'q ut chexb'ichanq sa' xk'ab'a' li Qaawa' jo'k'ihalex li nekexpaab'ank,
xb'aan naq xk'ulub'eb' loq'onink li saqeb' ru xch'ool.
2Chexyoxinq chiru li Qaawa' rik'in kitaar,
chenimaaq xloq'al rik'in aarp li lajeeb' ru;
3b'ichahomaq junaq ak' b'ich cho'q re a'an,
tooch'omaq li wajb' chi chaab'il chi sahaq sa' eech'ool!
4Xb'aan naq tz'aqal yaal li raatin li Qaawa',
ut chixjunil li xb'aanuhom ub'elanb'il sa' xb'een li yaal.
5A'an q'axal naxra li tiikil ch'oolej ut li yaal;
nujenaq li ruuchich'och' rik'in xrahom li Yos.
6Xb'aan raatin li Qaawa' ki'uxk li choxa;
rik'in li xmusiq' kiyoob'tesiik chixjunil li wank chisa'.#33,6-7 Gn 1,3-31; Jn 1,3.
7Naxch'utub' xha'el li palaw kama' sa' junaq kuk,
ut naxk'eheb' sa' xna'aj xk'ihaleb' xchamal li ha'.
8Chixjunil li ruuchich'och' chixxiwaaq ru li Qaawa',
chesiksiki eerib' chiru li wankex junsut junrub'el choxa.
9Xb'aan naq ki'aatinak, ut jo'kan ki'uxk;
ki'ok chi taqlank, ut kiyaalo'k chixjunil.
10Li Qaawa' naxpo' li xk'uub'ahomeb' li xninqal ru tenamit,
ut naxk'e chi maak'a' na'ok wi' li xk'a'uxeb' li poyanam.
11Ab'an li xk'uub'ahom li Qaawa' xaqxo chi junelik;
chixjunil li naxk'oxla wank junq'e junq'e kutan.
12Us xaq re li tenamit li wank cho'q xYos li Qaawa',#33,12 Sal 144,15.
li tenamit sik'b'il ru cho'q reechanihom.
13Li Qaawa' na'ilok chaq toj sa' choxa,
ut naril chixjunileb' li poyanam:
14toj sa' chaq li xloq'laj k'ojarib'aal
naxka'ya jo'k'ihaleb' li wankeb' junsut junrub'el choxa.
15A'an kiyiib'ank re li junjunq chi ch'oolej
ut naxk'e reetal jo'ch'inal jo'nimal li neke'xb'aanu.
16Moko nakole'k ta li awab'ej xb'aan naq numtajenaqeb' laj puub',
chi moko taakole'q li kaw rib' xb'aan xnimal li xmetz'ew.
17Maak'a' na'ok wi' li kawaay re li kolb'a ib';
us ta q'axal nim li xkawilal, ink'a' truuq taakoloq.#33,16-17 1 S 17,47; Os 1,7; Jdt 9,7.
18Ab'an li Qaawa' naxk'aak'aleheb' li neke'xiwank ru,
eb' li wankeb' royb'enihom rik'in li xrahom,
19re naq te'kole'q chiru li kamk
ut te'ch'oolaniiq sa' xkutankil li we'ej.
20Laa'o kaw qach'ool rik'in li Qaawa':
a'an laj tenq'ahom qe ut li xkolb'al qib'.
21Rik'in a'an nasaho'k li qach'ool,
k'ojk'o li qaanm rik'in li xloq'laj k'ab'a'!
22Chahoy taxaq laarahom sa' qab'een, at Qaawa',
jo' naq xaqxo aawik'in li qoyb'enihom.
Currently Selected:
Sal 33: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
