Sal 35
35
SAALM 35 (34)
Xtij li tiik xch'ool naq yo chi rahob'tesiik
1Xsaalm laj David.
At Qaawa', yalon rik'ineb' li neke'raj yalok wik'in,
pleetin rik'ineb' li neke'pleetink we.
2Chap li koleb' ib' ut li ramleb' ch'iich',
ut xaqlin chaq chintenq'ankil.
3B'otz' laajutz' che' sa' rochoch
ut rameb' li neke'rahob'tesink we:
“Laa'in laj kolol aawe”, cha'qat we.
4Te'kaqo'q xb'aaneb' xxutaan
eb' li neke'raj inkamsinkil;
che'sutq'iiq chirixeb' chi sachsooqeb' xch'ool
eb' li neke'yoob'ank ch'a'ajkilal chiwix.
5Chanchanaqeb' taxaq li xmoqojil ixim sa' iq';
li x'ánjel li Qaawa' chicha'cha'inq reheb'.
6Q'oqyinaq taxaq ru li xb'eheb' ut yolyolaq ru,
naq yooq raanilasinkileb' xb'aan li x'ánjel li Qaawa'.
7Xb'aan naq xe'xk'e inra'lenkil chi maak'a' inmaak;
xe'xb'ekatq injulel, us ta ink'a' xinmaakob'k.
8Chichalq taxaq li sache'k sa' xb'eeneb' chi maak'a'eb' sa' xch'ool:
che'chape'q taxaq xb'aan li ra'al xe'xyiib',
che't'ane'q taxaq sa' li jul b'ekb'il xb'aaneb'!
9K'ajo' naq taasaho'q linch'ool rik'in li Qaawa';
sa chik tinwanq xb'aan naq xinaakol.
10Tinye chi anchal li waanm:
“At Qaawa', ani ta chik jo' laa'at
chi xkolb'al li maak'a' xmetz'ew chiru li kaw rib',
jo'wi' li neb'a' chiru li narahob'tesink re?”.
11Neke'chalje'k testiiw aj b'alaq',
yookeb' chinjitb'al chirix li ink'a' ninnaw.
12Usilal ninb'aanu reheb' a'an,
a'ut a' chik li maa'usilal nink'ul sa' ruq'eb'.
K'ajo' naq namayok li waanm!
13Naq xe'yajerk eb' a'an,
laa'in xink'e saak chiwix,
xinyot' linch'ool rik'in ayuun,
ut kok'aq xsa' yookin chi tijok sa' li waanm.
14Ninxik ninchalk chi lumluukin, chi ra sa' inch'ool.
K'ajo' naq xyot'e'k li waanm
kama' wi' xkamk linna', li was,
malaj junaq wamiiw.
15Ab'an naq xintaw inch'a'ajkilal,
xe'se'ek ut xe'ch'utlaak;
xe'xch'utub' rib' re xxik'b'al wilb'al:
maak'a' sa' inch'ool naq xine'xsak',
tik ink'a' xe'xkanab' inrahob'tesinkil.
16Sa' xmajelal li xpaab'aaleb' xine'reetz'u,
xe'xk'uxuxi ruuch reheb' re xxik'b'al wilb'al.
17Toj jo' najtil chik, at Qaawa', yal taawileb'?
Chinaakol taxaq chiruheb',
chawisi taxaq linyu'am sa' ruq'eb' li kaqkoj.
18Tinb'anyoxinq chawu sa' li nimla ch'utam
ut tinnima aawu sa' xyanqeb' li k'iila tenamit.
19Minse'ek taxaq xb'aan xmemileb' li xik' neke'ilok we;
mine'xmutz'uuchin taxaq
eb' li neke'tz'eqtaanank we chi maak'a' xyaalal.#35,19 Sal 69,5; Jn 15,25.
20Maawa' li tuqtuukil usilal yookeb' chi xyeeb'al;
a' b'an li b'alaq'il yookeb' chi xyoob'ankil
reheb' li tuulaneb' sa' qatenamit;
21Neke'xjap re chinse'b'al:
“Ja, ja, ak xqil rik'in qu!”, chankeb'.
22At Qaawa', laa'at aawilom,
matkanaak chi ch'anch'o,
at inYos, matkanaak chi najt wik'in.
23Ajsi aawu, waklin chintenq'ankil,
at inYos, at inNa' at inYuwa';
oken chinkolb'al.
24Raqon aatin chiwix
jo' chanru xtiikilal laach'ool.
At Qaawa', at inYos, mine'xse'e taxaq.
25Me'xye taxaq sa' xch'ooleb':
“A'an tz'aqal li qajom!”,
chi moko te'xye: “Xoonumtaak sa' xb'een!”.
26Xutaanal taxaq che'kanaaq ut che'eetz'uuq
eb' li neke'saho'k xch'ool rik'in li rahilal yookin xk'ulb'al;
che'kanaaq taxaq sa' xutaanal ut che'majewaaq
jo'k'ihal li neke'raj numtaak sa' inb'een.
27Che'b'ichanq ut chisaho'q sa' xch'ooleb'
jo'k'ihal li neke'raj naq us tin'elq;
junelik che'xyehaq: “Rajawal nim li Qaawa',
li nasaho'k xch'ool rik'in naq us na'elk laj k'anjel chiru!”.
28Ut laa'in tinb'icha laatiikilal,
k'ajo' naq tinnima aawu chiru chixjunil li kutan.
Currently Selected:
Sal 35: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
